Məhəmməd Əsədullazadə: “İndiki mərhələdə tərəflər arasında sülh sazişinin imzalanması gözlənilmir”
Yaxın gələcəkdə Ermənistan və Azərbaycan arasında dövlət başçıları formatında danışıqlar keçirilə bilər. Bu barədə Ermənistan parlamentinin spikeri Alen Simonyan jurnalistlərə bildirib.
“Ermənistan və Azərbaycan arasında müzakirələr davam edir və onların davam etdirilməsi barədə razılıq var. Yaxın zamanda müzakirələrin dövlət başçıları formatında, həmçinin xarici işlər nazirləri formatında davam etdiriləcəyini istisna etmirəm”, - o vurğulayıb. A.Simonyanın sözlərinə görə, bu proseslər sülh sazişinin imzalanma vaxtını və yerini müəyyən etməyə yönəlib.
Maraqlıdır, iki dövlət başçısının görüşü hazırkı şəraitdə nəyi dəyişə bilər?
“Növbəti görüş üçün praktiki əsas olmalıdır və Ermənistan konkret addımlar atmalıdır”
Sözügedən məsələyə aydınlıq gətirən politoloq Məhəmməd Əsədullazadə “Bakı-Xəbər”ə açıqlamasında bununla bağlı bir sıra məqamlara toxundu: “Təbii ki, Azərbaycanla Ermənistan arasında vaxtaşırı təmaslar olur və dövlətlər arasında münasibətlərin tənzimlənməsi, tərəflər arasında sülh sazişinin imzalanması ilə bağlı müəyyən proseslər gedir. Sülh sazişinin bəndləri razılaşdırılıb. Əsas odur ki, Ermənistan Konstitusiyasını dəyişməlidir. Ən azından, Azərbaycana qarşı ərazi iddialarını oradan çıxarmalıdır ki, etimad yaransın. Albaniya paytaxtında cənab Prezidentlə Paşinyan arasında ikitərəfli və nümayəndə heyətlərinin iştirakı ilə görüş keçirilib. Növbəti görüş də ola bilər. Ancaq növbəti görüş üçün praktiki əsas olmalıdır və Ermənistan konkret addımlar atmalıdır. Çünki top İrəvandadır. Bunun yolu isə daha çox Konstitusiyadan ölkəmizə yönəlik ərazi iddialarının çıxarılmasından keçir. Ola bilər ki, bu müstəvidə hansısa danışıqlar aparılsın. Həmçinin sülh müqaviləsinin harada imzalanması ilə bağlı danışıqlar ola bilər. Görünür, Alen Simonyan hansısa məlumatlara malik olduğundan belə mesajlar verir. Çünki Simonyan sıradan bir erməni rəsmisi deyil, parlamentin spikeridir. Bir çox hallarda danışıqlarda iştirak edir. Hansısa malumatlara malik olmasa, belə deməz. Fikrimcə, Azərbaycanla Ermənistan sülh sazişi ilə bağlı artıq siyasi iradə də ortaya qoyublar. Xüsusən Azərbaycan tərəfi sülhdə maraqlıdır. Ancaq indiki mərhələdə tərəflər arasında sülh sazişinin imzalanması gözlənilmir. Çünki Ermənistan Konstitusiyası dəyişmədən müqavilə ola bilməz. Ona görə ki, bu məsələ Azərbaycanın başlıca şərtlərindən biridir. Belə olan halda hansısa möcüzə gözləmək real görünmür”.
Vidadi ORDAHALLI
