Xaqani Cəfərli: "Qənaətimcə, bu məqam onun korrupsiyada iştirakından daha təhlükəli olduğu üçün ona hökmən aydınlıq gətirilməlidir"
Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin barəsində olan hökmdən verilən apellyasiya şikayəti üzrə məhkəmə prosesi keçirilib.
Nizami Məmmədovun vəkili Rəşad Mirmehdizadə apellyasiya şikayətini müdafiə edib.
O, çıxışında bildirib ki, mediada dərc olunan məlumatlara görə, cəmiyyətdə elə təəssürat yaranıb ki, bütün məbləği 4 nəfər mənimsəyib: "Mediada ümumi məbləğ 143 milyon göstərilir. Hamı da elə bilir ki, bütün məbləğ bu 4 şəxsə aiddir. Lakin bu belə deyil. Bununla yanaşı, istintaq dövründə satınalma epizodu üzrə Nizami Məmmədov ifadə verib. Bu epizod üzrə təqsirli bilindiyimizi sonda bildik. Həmçinin istintaq zamanı ifadə verən şəxslər məhkəmədə ifadələrini təkzib etdi. Halbuki, onlar ifadələrində pulları Nizami Məmmədova verdiklərini demişdilər...
Məlikməmməd Qurbanov müqavilələr əsasında "Azərsun"dan 20 milyon aldığını və həmin puldan 400 000 manat götürdüyünü, qalan pulu da Nəcməddin Sadıkova verdiyini bildirib. Həmçinin, Nəcməddin Sadıqovun göstərişi əsasında həmin puldan 800 000 manatı Nizami Məmmədova hissə-hissə verdiyini bildirib. Ümumiyyətlə, nə satınalmanın, nə də maliyyə xidmətinin Baş Qərargah rəisinə aidiyyəti var".
Göründüyü kimi, apaçıq ifadə var ki, "Azərsun"dan alınan 20 milyonun 400 mini bir adama, 800 mini Nizami Məmmədova, qalanı Nəcməddin Sadıqova verilib. Ancaq hələ Nəcməddin Sadıqov məhkəmədə ifadə verməyib.
Mediada, cəmiyyətdə və sosial şəbəkələrdə belə rəy formalaşıb ki, Nəcməddin Sadıqovu Rusiya himayə edir, Kremldən onun mühakiməsi istiqamətində addım atılmasına imkan vermirlər. Bu nə dərəcədə doğrudur?
Məsələni baki-xeber.com-a şərh edən politoloq Xaqani Cəfərli bildirdi ki, Müdafiə Nazirliyində aşkara çıxarılmış korrupsiya ilə bağlı Baş Qərargahın sabir rəisi Nəciməddin Sadıqovun adı hallansa da, bu şəxsin məhkumların sırasında yer almaması haqlı olaraq cəmiyyətdə bəzi suallar doğurub. Cəmiyyətdə belə rəy mövcuddur ki, Nəciməddin Sadıqovun korrupsiya əməlləri ilə bağlı ciddi iddiaların olmasına baxmayaraq məhkumların sırasında yer almaması bu şəxsin Rusiya tərəfindən müdafiə olunması ilə bağlıdır. Bu elə bir məsələdir ki, sübut etmək çox çətindir. Bunu ancaq aidiyyəti qurumlar edə bilər.
N.Sadıqovun Rusiyaya bağlı olması haqqında uzun illərdir ki, cəmiyyətdə fikir var. Qənaətimcə, bu məqam onun korrupsiyada iştirakından daha təhlükəli olduğu üçün ona hökmən aydınlıq gətirilməlidir.
Digər tərəfdən, Rusiyanın ayrı-ayrı postsovet ölkələrinin güc strukturlarında rəhbər vəzifələrə özünə yaxın kadrların təyin olunmasına nail olduğu haqqında çoxsaylı məlumatlar var. Bu isə bizə əsas verir deyək ki, N.Sadıqovun Rusiyaya bağlı olması haqqındakı fikirlər heç də əsassız deyil. Ancaq yenə də bu məsələyə aidiyyəti orqanlar aydınlıq gətirməlidir.
Əgər N.Sadıqov Rusiyaya bağlıdırsa, Moskvanın onu qorumağa çalışması anlaşılandır. Bütün böyük dövlətlər kimi Rusiya da yaxşı bilir ki, öz adamına sahib çıxmasa bir daha heç kim ona xidmət etməz. Suriyanın keçmiş prezidenti Bəşər Əsədin hazırda Rusiyada olması və qorunması bunun ən sonuncu nümunəsidir".
Akif NƏSİRLİ
