Qasım Hacıyev: “Həm cəmiyyətimiz, həm elmi ictimiyyətimiz tərəfindən, həm də digər səviyyələrdə uydurma “Yeni Naxçıvan” yeparxiyasının ləğv edilməsi tələbi qoyulmalıdır”
Ermənilərin təxribatları bütün istiqamətlərdə davam edir. Son illər “Yeni-Naxçıvan” barədə danışmağa başlayıblar. Hətta erməni katolikosu II Qareginin Rusiya və “Yeni-Naxçıvan” erməni yeparxiyasının dəvəti ilə Minskə getdiyi deyilir.
Qareginin hara getdiyi, hansı kilsədə nə etdiyi bizim üçün maraqlı deyil. Burda diqqət çəkən məsələ bütün Rusiyanın və "Yeni Naxçıvanın" yeparxiyasından danışılmasıdır. Bu “Yeni-Naxçıvan” nədir? Bu yeparxiyanın adı nə vaxta qədər belə gedəcək və yanlış rəy yaradacaq? Bunun qarşısı alınmadıqca spekulyasiyalara yer qoyur. Onsuz da ermənilərin Naxçıvanla bağlı iddiaları var. Burda da bu yeparxiyanı “bütün Rusiyanın və Yeni-Naxçıvan” yeparxiyası adlandırırlar. Bunun adını dəyişdirməlidirlər. Naxçıvan adında bir yer var, o da Azərbaycan torpağıdır, Azərbaycan ərazisidir.
İkinci yer hardadırsa bir göstərsinlər görək. "Yeni Naxçıvan" yeparxiyası haranı əks etdirir? Niyə Azərbaycan rəsmi olaraq buna etiraz etmir?
Məsələn, vaxtilə Yuqoslaviya dağılandan sonra Makedoniya adlı dövlət yarananda Yunanıstan etiraz etdi ki, o dövlət adını dəyişib Şimali Makedoniya qoysun. Çünki Yunanıstanın özünün Makedoniya adlı bir əyaləti var və dünya ictimaiyyəti çaşır ki, görəsən bu hansı Makedoniyadır? Dövlətin adını dəyişib Şimali Makedoniya qoyun, biz də bilək ki, onun bizim dövlətimizin ərazisi ilə əlaqəsi yoxdur.
İndi də "Yeni Naxçıvan" deyirlər, onun adını dəyişdirsilər. Onsuz da ermənilərin Naxçıvanla bağlı iddiaları, planları var
“Ermənilərin cavabları sərt şəkildə verilməli, bu iddialarının qarşısı alınmalı və Qarabağ, “Yeni-Naxçıvan” sözləri onların leksikonundan çıxarılmalıdır”
Professor Qasım Hacıyev “Bakı-Xəbər”ə bildirdi ki, ermənilərin bu saxtakarlığı illərdir mövcuddur: “Bu böyük bir təxribatdır və bu təxribatın qarşısının alınması çox vacibdir. Ermənilər hər gün yeni-yeni təxribatlar düşünüb ortaya atırlar. Ermənilərin həm siyasi, həm də dini mənada apardıqları siyasət ilk növbədə region ölkələrinin ərazilərinə, tarixinə, mədəniyyətinə təhdiddir. İnanmıram ki, ermənilər təxribatdan və saxtakarlıqdan başqa bir şey düşünsünlər. Bu gün Minskdə ilk erməni kilsəsinin açılması nə belarus xalqına, nə də başqalarına lazımdır. Bunlar ancaq kimisə narahat etmək, təxribat törətmək üçün ermənilərə lazımdır. Erməni kilsəsinin yaranma tarixinə aid o qədər uydurmalar var ki, saymaqla bitməz”.
Q.Hacıyev bildirdi ki, onlar Naxçıvana qarşı həmişə ərazi iddiasında olublar və bu iddiaları baş tutmadıqda isə gedib Rusiyada Azərbaycana qarşı təxribatlarla məşğul olur, “Yeni-Naxçıvan” adlı qondarma bir yeparxiya yaradırlar. “Təsəvvür edin, bunlar o qədər saxtakardırlar ki, Rusiyada belə bir yeparxiya yaradıblar. Göstərmək istəyirlər ki, guya bunlar nə vaxtsa Naxçıvanda yaşayıblar, ordan köçdükləri üçün onun adını Rusiyada yaşadırlar (?). Bu birmənalı olaraq Naxçıvana qarşı ərazi iddiası ilə bağlıdır. Hesab edirəm ki, Rusiya dövləti ermənilərə belə bir şərait yaratmalı deyildi. Onların bu xəstə ideyasının qarşısını birinci Rusiya almalı idi. Rusiyanın əlaqədar qurumları özləri ermənilərə belə bir şərait yaradırlar ki, onlar Azərbaycanın Naxçıvan ərazisinin adı ilə özlərinə hansısa yeparxiya yaratsınlar. Çox təəssüflər olsun ki, Moskvada Ermənistan Qriqoryan kilsəsinin Rusiya və “Yeni Naxçıvan” üzrə yeparxiyasının iqamətgahı da mövcuddur. Bu birbaşa təxribatdır və bu təxribatın qarşısı alınmalıdır. Rusiyada belə bir təxribatçı qurum fəaliyyət göstərir. Bu yolverilməzdir”.
Q.Hacıyev qeyd etdi ki, vaxtilə çar Rusiyası torpaqlarımızı işğal edib ərazilərimizi parçaladı, erməniləri Cənubi Qafqaza gətirib Azərbaycan torpaqlarında məskunlaşdırdı, torpaqlarımıza qarşı əsassız iddialar irəli sürməkləri üçün imkanlar açdı, bu gün isə Rusiya hökuməti erməni kilsəsinə Naxçıvan adından istifadə etməyə şərait yaradır. “Ermənilər Rusiya ərazilərinə də iddialar edir. Bunu dəfələrlə demişik. Gedib Rusiyada oturub “Yeni – Naxçıvan” adlı qondarma bir yeparxiyadan danışırlar. Bilirsiz, vaxtilə Qriboyedov çara yazırdı ki, erməniləri Rusiya ərazilərinə buraxmaq, orda onlara dövlət yaratmaq olmaz, onlar kompakt yaşayandan bir müddət sonra “bura bizim ata-baba torpağımızdır” deyə iddia edəcəklər. Rusiya dünən də erməniləri himayə edib, bu gün də edir.
Ermənilərin yazdığı, dediyi saxtakarlıqdır, ədavət yaratmaq üçün əllərindən gələni ediblər.
Vaxtilə Rusiya başqa ölkələrlə köməkləşib Birinci Qarabağ müharibəsində erməniləri “qalib” etdilər. İndi torpaqlarımız azad olunub, orda ermənilərin izi-tozu da yoxdur, heç olmayacaq. Onların indiki şəraitdə Qarabağdan əlləri üzüldüyündən başqa təxribatlar törədirlər. Bunlar uydurma “Yeni-Naxçıvan” yeparxiyası yaratmaqla istəyirlər ki, yenidən xristian dünyasının diqqətini cəlb edib onlardan dəstək alsınlar.
Hesab edirəm ki, həm cəmiyyətimiz, həm elmi ictimiyyətimiz tərəfindən, həm də digər səviyyələrdə uydurma “Yeni Naxçıvan” yeparxiyasının ləğv edilməsi tələbi qoyulmalıdır. Bu cəfəng fikirlər yığışdırılmalıdır.
Naxçıvan heç vaxt erməni torpağı olmayıb, olmayacaq da.
Ermənilər Rusiyanın Rostov-Don vilayətində “Yeni-Naxçıvan “ adlı bir yaşayış yeri yaradıblar, bunu “tarixiləşdiriblər”. Söhbət ondan gedir ki, “Yeni Naxçıvan”ı yeni yaradıblar, bizim Naxçıvandan guya bunlar qovulub və onlar da gedib Rostovda məskən salıblar. Halbuki, Naxçıvana ermənilər XIX əsrin əvvəllərində köçürülüb, ordan da özləri çıxıb getdilər. Necə ki, Bakıdan, Qarabağdan, başqa ərazilərimizdən getdilər. Onların məqsədi belə idi ki, azərbaycanlıları Azərbaycan ərazisindən çıxarıb burda özlərinə yurd-yuva qursunlar, bunu bacarmadılar və könüllü şəkildə getdilər. İndi o təxribatı canlandırmaq üçün bu cür avantürist fikirlərə düşürlər. Ermənilərin cavabları sərt şəkildə verilməli, bu iddialarının qarşısı alınmalı və Qarabağ, “Yeni-Naxçıvan” sözləri onların leksikonundan çıxarılmalıdır” - deyə Q.Hacıyev qeyd etdi.
İradə SARIYEVA
