Məhərrəm Zülfüqarlı: “... saxtakarlıqdır, gerçək deyil”
Ermənilər dünyanın harasında yaşayırlarsa, həmin ərazidə mütləq “qədimdən yaşadıqlarını” car çəkməyə başlayırlar. Özlərini Qüdsdə “yerli icma” kimi qələmə verən erməni icması İsrailin ictimai televiziya kanalı Kan11-də Eurovision şərhçisinin bəyanatından inciyib. Sputnik Ermənistan xəbər verir ki, bu barədə “Save the ArQ” hərəkatı məlumat yayıb.
Erməni icması “Eurovision”un erməni iştirakçısı Parqın çıxışından sonra müsabiqənin israilli şərhçisinin, xüsusən, “İnana bilmirəm ki, biz bu uşaqlara Qüdsdə bütöv bir blok vermişik. Bu mahnıya qulaq asdıqdan sonra hiss etdiyimiz şey budur” sözlərini “irqçi” adlandırıb.
Ermənilər iddia edir ki, erməni icması Qüdsdə guya 1700 ildir mövcuddur. İddia edirlər ki, guya Qüdsdə erməni “irsi” var və ermənilər “ucuz təhqirlərə və revizionist şərhlərə dözmür”.
“Save the ArQ” iddia edib ki, Qüdsdəki “erməni məhəlləsi heç kimə hədiyyə edilməyib”, guya bu məhəllə əsrlər boyu mövcud olub (?) və Qüdsdə ermənilər tərəfindən tikilib və qorunub saxlanılıb(?).
İddia ediblər ki, guya şəhərin mənəvi və mədəni həyatına dəyərli töhfələr verən ermənilərin mövcudluğu bütün dünyada tanınır.
Guya Qüdsdəki “tarixi erməni məhəllələri” tolerantlığa, birgəyaşayışa “töhfələr” verib.
Qüdsdəki erməni icmasının 1700 illik tarixi var?
“Ermənilər daim yəhudiləri yamsılamaqla məşğul olublar”
Tarix elmləri doktoru, professor Məhərrəm Zülfüqarlı bildirdi ki, Qüdsdəki erməni icmasının 1700 illik tarixinin olduğu barədə deyilənlər yalan və saxtakarlıqdır: “Ermənilər həm xristian, həm müsəlman aləmini, həm də iudey-yəhudi dini tərəfdarlarını öz saxtakarlıqları ilə bezdirib. Birincisi, hind-Avropa xalqı olan ermənilər vətəni olmayan bir toplum kimi dünyaya yayılıblar. Hara yayıblarsa oranı özlərinə "vətən" hesab ediblər. O cümlədən, Fələstin ərazisində də yaşayırlar. Bilirsiz ki, xristianlıq Fələstin ərazisində yaranıb və İsa peyğəmbərin çarmıxa çəkilməsi də orda baş verib. Qüdsdə də həm müsəlmanların, həm xristianların, həm də yəhudilərin yaşadıqları məhəllələr var. Ermənilər orda qədim dövrdən yaşamayıb, digər yerlərdə olduğu kimi ora da gəlmə əhalidir”.
M.Zülfüqarlı qeyd etdi ki, hansı xalqın, hansı dövlətin qədim tarixi, mədəniyyəti varsa ermənilər özlərini ora yamaq etməyə çalışırlar.
“Bunların bir toplum olaraq kökləri Hind-Avropaya aid olsa da bu ərazilərə də, Kiçik Asiya yarımadasına da Balkanlardan gəliblər...
Ermənilər daim yəhudiləri yamsılamaqla məşğul olublar. Yəni dünyada Holokost faciəsi məsələsi gündəmdədir, dünya ölkələri faşist Almaniyasının yəhudilərə qarşı törətdiklərini tez-tez gündəmə gətirir, yəhudilərə qarşı soyqırım həyata keçirildiyi bildirilir. Ermənilər də eynən bunu yamsılamaqla qondarma "soyqırım" məsələsini ortaya atırlar. Yəhudilər kimi özlərini dünyada qırğına məruz qalan xalq kimi qələmə vermək istəyirlər.
Erməni icmasının Qüdsdə 1700 illik tarixinin olması məsələsi saxtakarlıqdır, gerçək deyil. Bunlar özlərini “qədim xalq” kimi, eyni zamanda “soyqırıma” məruz qalan xalq olaraq göstərməklə dünya xalqları arasında müəyyən bir rəy yaratmaq istəyirlər. Bu isə boş bir şeydir.
Həqiqət ondan ibarətdir ki, tarix boyu ermənilər müxtəlif imperiyalara xidmət edib sonra xəyanət ediblər. Müasir dövrdə bir sıra güclü dövlətlərin icraçısı rolunu oynayırlar. Yəni əvvəl çar Rusiyasına, sonra Sovetlərə, ardınca Rusiya Federasiyasına xidmət ediblər. İndi də Qərb ölkələrinə xidmət etməklə Rusiya imperiyasına xəyanət edirlər. Bu məsələdə də tarixə və müqəddəs yerlərə istinad etməklə özlərinə saxta tarix yaratmaq istəyirlər. Ermənilər vətənsiz bir toplumdur, imperiyalara xidmət etməklə özləri də əziyyət çəkib, qonşulara da ziyan veriblər.
İndiki Ermənistan hakimiyyəti erməniləri bu cür nağıllardan qurtarmaq istəsə də, hələ ki, bir müsbət nəticə ortada yoxdur” - deyə M.Zülfüqarlı bildirdi.
İradə SARIYEVA
