Azər Həsrət: "Azərbaycan Güney Qafqazın digər iki ölkəsindən qat-qat irəlidədir və Avropadan baxanda bu çox aydın görünür"
Azərbaycan siyasi rəhbərliyinin apardığı məqsədyönlü və çoxvektorlu xarici siyasətin nəticəsidir ki, Aİ ilə dövlətimiz arasında siyasi münasibətlər tamamilə normal məcrada inkişaf etməkdədir.
Özünü bizə düşmən hesab edən qonşumuz Ermənistan Aİ ilə münasibətlərində regionda əlahiddə və inhisarçı mövqeyə sahiblənməyə, Avropa ilə xüsusi əlaqələr qurmağa çalışırdı. Ermənistan Cənubi Qafqazda Avropa ilə münasibətlərdə inhisarçı mövqeyə sahiblənmək istəyirdi. Aİ-də də Ermənistanın bu cəhdlərini dəstəkləyən kifayət qədər qüvvələr var idi. Amma Azərbaycan nə Avropa Birliyinə üzvlüklə bağlı qanun qəbul edib, nə də Avropaya inteqrasiyanı prioritet elan edib. Əksinə, Avropanın müxtəlif təsisatları vaxtaşırı olaraq Azərbaycanı əsassız tənqid atəşinə tuturdu. Belə olan halda nədən Avropa təsisatları və ölkələrinin diqqəti Ermənistanda deyil, Azərbaycandadır?
Siyasi şərhçi Azər Həsrət məsələ ilə bağlı baki-xeber.com-a müsahibəsində bildirdi ki, Azərbaycanın üzərində diqqət həmişə olub, bundan sonra da olacaq: "Çünki Güney Qafqazın kilid ölkəsi Azərbaycandır. Bu, Azərbaycanın iqtisadi və insan potensialına, təbii resurslarına, dünya siyasətində yerinə və çəkisinə, eyni zamanda, Prezident İlham Əliyevin liderlik qabiliyyətinə görə müəyyən olunur. Azərbaycan Güney Qafqazın digər iki ölkəsindən qat-qat irəlidədir və Avropadan baxanda bu çox aydın görünür. Belə bir şəraitdə avropalılar nəyə görə Azərbaycanı bir kənara itələyib Ermənistandan yapışmalıdır?
Birincisi, Ermənistanı Avropa Birliyinə dəvət etməyiblər, qanun qəbul etməklə deyil ki? İkincisi də AB-də oturan, ağlı başında olan liderlər başa düşür ki, Guney Qafqazda irəli getmək yalnız Azərbaycanla işbirliyindən keçir. Yəni Azərbaycan səninlə deyilsə, Güney Qafqaz sənin üçün əlçatmaz olacaq. Nə Ermənistan, nə də Gürcüstan Avropa üçün bu imkanı Azərbaycansız təmin edə bilməz. Ona görə də Azərbaycana və onun liderinə Avropada belə diqqət var.
Buna baxmayaraq, Avropada müəyyən mərkəzlər və müəyyən dövlətlər anti-Azpərbaycan siyasəti yürüdür, bizə qarşı kampaniyalar aparır. Adicə Tiranadakı toplantıda Fransa prezidenti Emmanuel Makronun Azərbaycan Prezidentinə şəxsən yaxınlaşması, onunla görüşməsi, Azərbaycan Prezidentinin öz xarizması ilə onu əzməsi göz önündədir. Bilirsiniz ki, Fransa anti-Azərbaycan ritorikasından əl çəkmir, Paşinyanı qaldırıb dağ başına qoymaq istəyirlər. Amma o görüşdə Azərbaycan Prezidenti öz xarizması ilə Fransa prezidentini dünyanın, o cümlədən də Paşinyanın gözû önündə əzib keçdi. Fransa prezidenti də bunu qəbul etmək zorunda qaldı. Ona görə də Azərbaycanı heç kim küncə sıxışdırıb gözardı edə bilməz. Nə qədər bizə qarşı qüvvələr olsa da, Avropa liderləri anlayır ki, Azərbaycansız mümkün deyil".
Dəniz NƏSİRLİ
