ABŞ dövlət katibi Marko Rubio bildirib ki, Ukrayna böhranının həllində irəliləyiş olmasa, Vaşinqton Rusiyaya qarşı yeni sərt iqtisadi sanksiyalar tətbiq edə bilər.
Təzyiqlərin iki aydır davam etdiyini bildirən Rubio, Rusiyaya qarşı sanksiyaların tətbiqi ilə bağlı iki senator tərəfindən Konqresə təqdim edilən qanun layihəsinə diqqət çəkib.
Təklif olunan qanun layihəsi təkcə Rusiyaya deyil, həm də Rusiyadan neft, təbii qaz, uran və digər strateji məhsulları idxal edən ölkələrə qarşı 500%-ə qədər gömrük rüsumlarının tətbiqini nəzərdə tutur. Rubio bunun Rusiya tərəfinə açıq şəkildə çatdırıldığını və Ağ Evin bu təşəbbüsləri dayandırmaq səlahiyyətinin olmadığını vurğulayıb.
Oxşar müzakirələr Avropa Birliyində də gedir. 17-ci sanksiya paketi qüvvəyə minən kimi bəzi üzvlər Rusiya ilə ticarətin tamamilə kəsilməsi və oxşar cəza rüsumlarının tətbiqi məsələsini gündəmə gətirib. Kreml cəbhəsi isə bu bəyanatları “boş təhdidlər” kimi qiymətləndirir və Moskvanın sülhə açıq olduğunu, lakin təzyiq və ultimatumlarla danışıqların aparılmasına imkan verməyəcəyini bildirir. Prezident Putin isə sanksiyaları dəstəkləyən Qərb liderlərini birbaşa hədəfə alaraq, onların siyasətini “məntiqsiz və zərərli” adlandırıb.
TAHİR
