Qulamhüseyn Əlibəyli: “Belə kobud çağırış Rusiyanı işğalı genişləndirməyə həvəsləndirir”
Tramp Zelenskini Ukraynada müharibəyə son qoymaq üçün Rusiya ilə danışıqlara mane olmaqda ittiham edib.
“Ukrayna prezidenti Volodimir Zelenski "The Wall Street Journal"ın ön səhifəsində lovğalanır ki, "Ukrayna heç vaxt Krımın işğalını tanımayacaq. Burada danışılası bir şey yoxdur". Belə bir bəyanat Rusiya ilə sülh danışıqlarına mane olur, çünki Krım illər əvvəl, prezident Barak Hüseyn Obamanın dövründə itirilib və artıq müzakirə olunmur. Heç kim Zelenskidən Krımı Rusiya ərazisi kimi tanımasını xahiş etmir, amma o, Krımı bu qədər geri istəyirsə, niyə 11 il əvvəl Rusiya Krımı bir güllə atmadan tutanda Ukrayna onun üçün mübarizə aparmadı? Üstəlik, bu ərazidə çoxdan, hələ "Obama təslim etməzdən" əvvəlki vaxtdan Rusiya sualtı qayıqlarının iri bazaları yerləşir”,- Tramp “Truth Social” hesabında yazıb.
Trampın fikrincə, sülh sazişi artıq yaxındır və kozırları olmayan Zelenski bunu anlamalıdır, əks halda, ölkəni tamamilə itirmək ilə risk edir. Tramp hesab edir ki, Zelenskinin açıqlamaları Ukraynada qırğınları yalnız uzadır.
Rusiyaya gücü çatmayan Tramp açıq-aşkar Zelenskini təslim olmağa çağırır. Tramp zəif tərəf olan Ukraynaya təzyiqləri daha da artırır və güzəştə məcbur edir.
“İşğala məruz qalan dövləti güzəştə sövq etmək doğru deyil və tarix bunu Trampa, ABŞ-a bağışlamaz”
Sözügedən məsələni “Bakı-Xəbər”ə şərh edən sabiq millət vəkili, hüquqşünas Qulamhüseyn Əlibəylinin fikrincə, ümumiyyətlə, Tramp fəaliyyətə başladığı gündən Rusiyanın geosiyasi işğalçılıq maraqlarını müdafiə edən bir xarici agent kimi çıxış etməyə başladı: “Müharibəni bir günə dayandıracağını vəd edən Tramp, ilk növbədə Ukraynaya təzyiq göstərməklə müharibənin dayandırılmasını düşünürdü. Hətta bir sıra hallarda şou da təşkil edirdi. Bütövlükdə götürəndə müharibə ilə bağlı Trampın fəaliyyətində bir ardıcıllıq yoxdur. İlk növbədə o, çalışırdı ki, Ukrayna ərazisində təbii sərvətləri nəzarətinə alsın. Onun əvəzində Rusiyanın işğal etdiyi əraziləri, bu ölkənin ərazisi kimi tanısın. Ancaq burada bir problem var. Problem ondan ibarətdir ki, ABŞ Konqresi Krımı Rusiya ərazisi kimi tanımağı qadağan edib. Tramp kimi qeyri-ciddi prezidentlər nə qədər çalışsalar da, Konqresin müəyyən etdiyi bu çərçivəni, qadağaları aşmaq səlahiyyətinə malik deyil. Ona görə də Tramp ilk növbədə müharibədə bir zəif tərəf kimi çıxış edən, ərazisi işğal edilən Ukraynaya kobud şəkildə təzyiqlər göstərməyə başladı ki, tezliklə Rusiya ilə dil tapsın. Yəni öz ərazisinin bir hissəsini Rusiyaya verməklə sülh müqaviləsi imzalasın. Digər ərazilərini isə, bir növ ABŞ-a icarəyə versin. Orada Birləşmiş Ştatlar o təbii sərvətlərdən istifadə etsin. Rusiya vəziyyəti belə görəndən sonra iştahı daha da artdı. Belə kobud çağırış Rusiyanı işğalı genişləndirməyə həvəsləndirir. Putinin strateji hədəfi bütün Ukraynanı ələ keçirməkdir. Sonra isə Pribaltika ölkələrini və Polşanı tutmaq. Bir müddət əvvəl Tramp Rusiyanı yeni sanksiyalarla hədələyirdi. Putin bunu ciddi qəbul etmədi və Ukraynaya yönəlik işğalçılıq siyasətini davam etdirdi. Daha vəhşicəsinə Ukrayna şəhərlərini bombaladı. Bu, o deməkdir ki, əslində mahiyyət etibarı ilə Rusiya Trampın mövqeyini, hansı addımlar atacağını bilir. Ona görə də özünün geosiyasi məqsədlərini həyata keçirmək istəyir. Bu baxımdan hesab edirəm ki, Tramp belə təzyiqlərə son qoymalıdır. İşğala məruz qalan dövləti güzəştə sövq etmək doğru deyil və tarix bunu Trampa, ABŞ-a bağışlamaz. Rusiya işğalı genişlənsə bu, son nəticədə Birləşmiş Ştatların nüfuzuna güclü zərbə olacaq”.
Vidadi ORDAHALLI
