Elçin Rüstəm: “Bu qərar sayəsində ölkənin beynəlxalq turizm sahəsindəki mövqeyi güclənəcək”
Məlum olduğu kimi, Azərbaycanla Çin arasında viza rejimi ləğv edilib. Bununla bağlı “Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş” imzalanıb.
Maraqlıdır, bəs bu qərar turizm axınına necə təsir edəcək?
“Vizasız səyahət imkanlarının yaradılması iki ölkə arasında qarşılıqlı etimadın və əməkdaşlığın dərinləşməsinə, eləcə də turizm əlaqələrinin genişlənməsinə mühüm töhfə vermək məqsədi daşıyır”
Turizm sahəsi üzrə ekspert Elçin Rüstəm “Bakı-Xəbər”-ə şərhində bildirdi ki, son dövrlər Azərbaycanla Çin arasında iqtisadi və siyasi yaxınlaşma müşahidə olunur: “Bu ildən Çin hökumətinin qərarı ilə Azərbaycan vətəndaşları üçün də vizasız gediş imkanları yaradılacaq. Bu, iki ölkə arasında turist axınının artmasına ciddi töhfə verəcək. Məlumat üçün deyim ki, ötən ilin birinci rübü ilə müqayisədə Çindən Azərbaycana gələn turistlərin sayında 1,8 faiz artım qeydə alınıb və bu göstəricinin gələcəkdə daha da yüksələcəyi gözlənilir. Vizasız səyahət imkanlarının yaradılması iki ölkə arasında qarşılıqlı etimadın və əməkdaşlığın dərinləşməsinə, eləcə də turizm, iqtisadi və mədəni əlaqələrin genişlənməsinə mühüm töhfə vermək məqsədi daşıyır. Bu təşəbbüs ölkəmizə gələcək Çin turistlərinin sayını daha da artıracaq. Məlumdur ki, Çin dünyada ən çox turist göndərən ölkələrdən biridir. Bu ölkəmiz üçün olduqca faydalıdır. Azərbaycan turistləri Çin iqtisadiyyatına valyuta axınını təmin edəcək, müxtəlif sahələrdə alış-veriş edərək yerli bazarı canlandıracaq, şəxsi vəsaitlərini sərf etməklə daxili istehlakı artıracaq və eyni zamanda Çin xalqının zəngin mədəniyyəti və tarixi irsi ilə yaxından tanış olma imkanı əldə edəcəklər. Bu, təkcə diplomatik münasibətlərin deyil, xalqlar arasında dostluğun və mədəni yaxınlığın da inkişafına güclü impuls verəcək, əməkdaşlığın yeni mərhələyə keçməsinə zəmin yaradacaq. Bu müsbət tendensiya Azərbaycanın dünya turizm xəritəsində artan cazibədarlığını bir daha təsdiq edir, ölkənin beynəlxalq turizm sahəsindəki mövqeyini gücləndirir”.
Günel CƏLİLOVA
