Tural İsmayılov: “Türkiyəni saxta soyqırımda ittiham etmək və Azərbaycanı Qarabağ erməniləri üzərindən bu tip yalançı məlumatlarla təhdid etmək onlara baş ucalığı gətirmir”
Rusiya Dövlət Dumasının MDB işləri üzrə komitəsi sədrinin birinci müavini Konstantin Zatulin Teleqram kanalında həqiqəti əks etdirməyən fikir səsləndirib. O qeyd edib ki, erməni əhalisinin Dağlıq Qarabağdan kütləvi şəkildə köçürülməsi 1915-ci il erməni soyqırımının davamı idi.
Zatulinin məlum fikri ictimaiyyət arasında narazılığa səbəb olub. Danılmaz faktdır ki, Qarabağ erməniləri bölgəni könüllü şəkildə tərk ediblər. Bu haqda yerli və xarici mediada yetərincə məlumat mövcuddir. Qarabağdan ermənilərin getməsi hadisəsini soyqırım kimi təqdim etmək düzgün deyil.
“Rusiyada erməni diasporunun əlində oyuncağa çevrilmiş bu adamın təhqir dolu açıqlamaları onun idbar və yalançı mahiyyətinin növbəti göstəricilərindən biridir”
Siyasi şərhçi Tural İsmayılov “Bakı-Xəbər”ə şərhində bildirdi ki, Zatulin nifrətin, ədalətsizliyin, qeyri-obyektivliyin vücud bulmuş halıdır: “Təəssüfedici haldır ki, Zatulin adi bir deputat deyil, o, faktiki olaraq Rusiya Dövlət Dumasında vəzifə daşıyır, MDB işləri üzrə səlahiyyətli şəxsdir: “Bu gün Rusiya Dumasında səlahiyyətli şəxsin Azərbaycanı nələrdəsə ittiham etməsi, ölkəmiz əleyhinə bu tip açıqlamalar verməsi Azərbaycan-Rusiya münasibətləri baxımından da doğru deyil. Rusiyada erməni diasporunun əlində oyuncağa çevrilmiş bu adamın təhqir dolu açıqlamaları onun idbar və yalançı mahiyyətinin növbəti göstəricilərindən biridir. Təəssüf ki, Zatulin və bu kimi insanlar Azərbaycanla Ermənistan arasında yarana biləcək sülh imkanlarını əngəlləyir. Türkiyəni saxta soyqırımda ittiham etmək və Azərbaycanı Qarabağ erməniləri üzərindən bu tip yalançı məlumatlarla təhdid etmək onlara baş ucalığı gətirmir. Hesab edirəm ki, Azərbaycanla Ermənistan arasında sülhü daha çox təşviq etmək lazımdır, nəinki bu tip yalançı açıqlamalar vermək”.
Günel CƏLİLOVA
