Əli Mustafa: “Prosesin real nəticə verəcəyini güman edirəm”
Türkiyədə fəaliyyəti qadağan edilmiş və terrorçu təşkilat kimi tanınan PKK aprel ayının sonuna qədər özünü buraxmaq barədə qərar qəbul edəcək. Bu barədə “Hürriyet” qəzeti məlumat yayıb.
Hakim AKP-nin rəsmi nümayəndəsi Ömər Çelik aprelin 21-də jurnalistlərə bildirib ki, cari ay ərzində uzunmüddətli kürd probleminin həllində əhəmiyyətli irəliləyişlər ola bilər. Kürdpərəst DEM (Xalqların Bərabərlik və Demokratiya Partiyası) partiyasının nümayəndələri isə aprelin 22-də terrorçuluq fəaliyyətinə görə ömürlük həbs cəzası çəkən PKK lideri Abdullah Öcalanla görüşüblər.
“Məlumatlara görə, Türkiyə Prezidenti Rəcəb Tayyib Ərdoğan PKK-nın aprel ayının sonuna qədər silahlı qarşıdurmanı dayandırmaq və özünü buraxmaq barədə qərar qəbul edəcəyi barədə məlumatlandırılıb”, - məqalədə bildirilib.
Maraqlıdır, PKK-nın özünü buraxması nə dərəcədə realdır?
“Mümkündür ki, PKK-da bəzi dövlətlərə bağlı qruplar müqavimət göstərsin, amma bu, ümumilikdə nəyisə dəyişə bilməyəcək”
Sözügedən məsələyə aydınlıq gətirən siyasi şərhçi Əli Mustafa “Bakı-Xəbər”ə açıqlamasında gözləntilərin böyük olduğunu bildirdi: “Bəli, PKK-nın özünü buraxması ilə bağlı müzakirələr xeyli vaxtdır Türkiyədə gedir. İlk əvvəl MHP lideri Dövlət Baxçalı tərəfindən bununla bağlı təklif gündəmə gətirildi. Sonradan dövlət də bunu dəstəkləyib. Nəhayət DEM Partiyası prosesə aktiv şəkildə qoşulub. Artıq neçənci dəfədir ki, DEM Partiyası təmsilçiləri Öcalanla görüşlər keçirir. Məqsəd də o olub ki, Öcalan PKK-ya silahı buraxmaqla bağlı müraciət etsin. Artıq bu istiqamətdə xeyli işlər görülüb. Bildiyim qədər, Türkiyə cəmiyyəti bunu normal qarşılayır. Öncə onu qeyd edim ki, Türkiyə demokratik bir dövlətdir. Orada milli kimlik heç bir problem yaratmır. Bu gün Türkiyə parlamentində türklərlə yanaşı, kürdlər də təmsil olunur. O cümlədən, dövlət strukturlarında kürdlər kifayət qədər yüksək səviyyədə təmsil olunurlar. Deməyim odur ki, orada milli ayrıcalıq yoxdur. Hansısa bir diskriminasiya, problem yoxdur. Yəni Türkiyənin demokratiyası, orada olan azadlıq, bərabərlik o qədər yüksək səviyyədədir ki, burada kiminsə giley-güzar etməsinə ehtiyac yoxdur. O üzdən, onlar PKK-nın fəaliyyətini dəstəkləmirlər. Ona görə də, PKK bir terror qruplaşması olaraq artıq kürd xalqını təmsil etmir. PKK getdikcə marginallaşmağa doğru gedir. Bunu onlar da anlayırlar. Digər tərəfdən də bu qarşıdurma əslində heç nə vermir. Çünki Türkiyə orada yaşayan bütün xalqların dövlətidir. Deməyim odur ki, PKK-nın qarşısına qoyduğu hədəflər kürd xalqının özünə də fayda vermir. Əslində zərər vurur. Bu, cəmiyyətin zəhərlənməsinə, gənclərin itirilməsinə səbəb olur. Bir sözlə, onların inkişafını önləyir. Gözlənilir ki, PKK-nın silahı buraxması ilə Öcalan həbsdən azad edilsin. Ona görə də prosesin real nəticə verəcəyini güman edirəm. Düzdür, mümkündür ki, PKK-da bəzi dövlətlərə bağlı qruplar müqavimət göstərsin, amma bu, ümumilikdə nəyisə dəyişə bilməyəcək. Çünki kürdlər sülh, sabitlik və inkişaf istəyir”.
Vidadi ORDAHALLI
