Məhərrəm Zülfüqarlı: “Diplomatik korpusa belə bir tapşırıq verməsi onu göstərir ki, Paşinyan xarici təsirlərdən və diasporun təzyiqlərindən xilas olmaq və Türkiyə ilə münasibətləri normallaşdırmaq fikrindədir”
Qondarma erməni “soyqırımı” məsələsində Ermənistan hakimiyyəti ilə erməni siyasilərin, eləcə də diasporun mövqeyi, yanaşması üst-üstə düşmür. Ermənistanın baş naziri Nikol Paşinyan bir müddət əvvəl bəyan etdi ki, “erməni soyqırımı” hazırda ölkəsinin xarici siyasətinin prioritetləri arasında deyil.
Paşinyan, həmçinin, ermənilərin Osmanlı İmperiyasındakı guya "soyqırım" edilməsi məsələsinin yenidən araşdırılmasının zəruriliyini dəfələrlə deyib. Onu da bildirib ki, “soyqırım qurbanlarının” sayı çox şişirdilib. Bir sözlə, Paşinyan ermənilərin və havadarlarının uzun illərdir əlində bayraq etdiyi bu mifik iddiaya soyuq yanaşır. Erməni diasporunun “genosid” şousu ərəfəsində
türkoloq Varujan Geqamyan erməni mətbuatına açıqlamasında bildirib ki, rəsmi İrəvan xaricdəki səfirliklərə, konsulluqlara “erməni soyqırımına” həsr olunan tədbirlərdə Türkiyənin adını çəkməməyi tapşırıb. O qeyd edib ki, xaricdəki diplomatik korpusa belə tədbirlərdə Türkiyənin adının diasporda hallanmamasını təmin etməyə çağırıb.
Siyasi ekspert, professor Məhərrəm Zülfüqarlı “Bakı-Xəbər”ə bildirdi ki, bu uzun illərdir müzakirə edilən və dəqiq cavabı verilən, bilinən bir məsələdir. “Buna baxmayaraq, erməni xəstəliyi, erməni saxtakarlığı yenə də davam edir. Mənə elə gəlir ki, indiyə qədər Paşinyan hakimiyyəti qədər ikinci bir hakimiyyət olmayıb ki, “soyqırım” nağılından, bu xəstə siyasətdən əl çəkmək istəsin. Çünki Paşinyan dəfələrlə bildirib ki, “Böyük Ermənistan” xülyasına, saxta tarixə son qoymaq, reallıqla barışıb qonşularla münasibət qurmaq lazımdır. Ancaq çox təəssüf ki, qondarma “genosid” nağılından hələ də əl çəkmək istəməyənlər var. Fikrimcə, qondarma “soyqırım” məsələsi Ermənistanda yaşayan ermənilərdən çox xaricdə yaşayan ermənilərə, diaspora, yaxud Ermənistandan bir alət kimi istifadə edən mərkəzlərə, dövlətlərə lazımdır. Yəni onlar imkan vermir ki, bu saxta tarixə nöqtə qoyulsun. Türkiyə tərəfi dəfələrlə bildirib ki, bunu tarixçilərin ixtiyarına buraxmaq lazımdır və Türkiyə öz arxivlərini açmağa hazırdır. Amma ermənilər bununla razılaşmayıb. Çünki “soyqırım” saxtakarlığı, bu saxta əfsanələr boş bir şeydir. Burda söhbət Birinci Dünya müharibəsində, 1915-ci ildə rus-türk cəbhəsində gedən döyüşlər zamanı ermənilərin öz vətənlərinə xəyanət edib qiyam qaldırması və bu qiyamın yatırılmasından gedir. Bunlar isə utanmadan, çəkinmədən öz xəyanətlərini bu cür qələmə verirlər. Bilirsiz ki, bu yalanların da yayılmasına əsas səbəb bu yalanlardan istifadə edən dövlətlərdir, xüsusən Qərb ölkələridir. Qardaş Türkiyə və Azərbaycan ziyalıları daim bu məsələdə öz sözlərini deyiblər və bundan sonra da deyəcəklər”.
M.Zülfüqarlı hesab edir ki, Paşinyan hökuməti reallığı dərk edir və bu kimi uydurmaların Ermənistanın gələcəyi üçün ziyanlı olduğunu düşünür. “Xarici təsirlər olmasa, Paşinyan hakimiyyəti xəstə təxəyüldən əl çəkib Türkiyə və Azərbaycanla münasibətlərin normallaşmasına çalışacaq. İndi bunu nə dərəcədə bacaracağını demək olmaz. Diplomatik korpusa belə bir tapşırıq verməsi onu göstərir ki, Paşinyan xarici təsirlərdən və diasporun təzyiqlərindən xilas olmaq və Türkiyə ilə münasibətləri normalaşdırmaq fikrindədir. Hər halda görsənən budur.
Ermənistan xalqı gələcəkdə normal yaşamaq, qonşularla normal münasibət qurmaq istəyirsə bu cür saxta tarixdən əl çəkməlidir”-deyə M.Zülfüqarlı qeyd etdi.
İradə SARIYEVA
