Sahil Kərimli: “Aİ-nin Mərkəzi Asiya ölkələrinə qarşı etdiyi təzyiq riyakarlığın və ikiüzlülüyün, eyni zamanda da türk birliyinə qarşı yönəlmiş düşmənçilik siyasətinin bariz nümunəsidir”
Türk Dövlətləri Təşkilatına (TDT) üzv olan Mərkəzi Asiyanın türk dövlətlərinin yunan Kiprində səfirlik açmasının pərdəarxası səbəbləri ortaya çıxıb. Qazaxıstan, Özbəkistan, Türkmənistan Avropa İttifaqının (Aİ) təzyiqi ilə bu addımı atıb.
Baki-xeber.com-un məlumatına görə, Avropa Birliyinin (AB) iqtisadi təzyiq kartından istifadə edərək Mərkəzi Asiyanın Türk Cümhuriyyətlərinə Cənubi Kiprdə diplomatik nümayəndəliklər açdırmasından sonra Türk Dövlətləri Təşkilatının (TDT) ilk üz-üzə təması Lefkoşada baş tutacaq.
Məlumata görə, təşkilatın Ağsaqqallar Şurasının 17-ci toplantısı mayın 1-2-də Şimali Kipr Türk Respublikasında (ŞKTC) keçiriləcək. İclasın ən əhəmiyyətli gündəmi Qazaxıstan, Özbəkistan və Türkmənistanın yunan Kiprində açdığı səfirliklər olacaq.
Bildirilib ki, ŞKTC-də keçirilən ilk üz-üzə görüşdə problemi sakit diplomatik yolla həll etmək məqsəd kimi qoyulub.
Baki-xeber.com Türkiyə mediasına istinadən yazır ki, Tacikistan Avropa Birliyinin iqtisadi təzyiqləri səbəbindən bəyannamənin müvafiq hissələrini dəstəkləmək məcburiyyətində qalıb. Avropa Birliyinin bu ölkələri yardım və investisiyaları kəsməklə hədələdiyi bildirilir.
AB Özbəkistanı isə Genişləndirilmiş Tərəfdaşlıq Danışıqlarını dayandırmaqla və investisiyaları kəsməklə hədələyib. Qazaxıstana da eyni formada təzyiq edildiyi bildirilir. Qeyd edilir ki, Türkiyə Türk dövlətlərinin yunan Kiprində səfirlik açmasına ilk etirazını, yunanların əlinə “kozır” verməmək üçün bağlı qapılar arxasında edib.
“Aİ burda bir çox iqtisadi rıçaqlardan istifadə edərək bu məkrli məsələyə nail oldu”
Politoloq Sahil Kərimli "Bakı-Xəbər"ə şərhində “Aİ-nin Mərkəzi Asiya ölkələrinə etdiyi təzyiq riyakarlığın və ikiüzlülüyün, eyni zamanda da türk birliyinə qarşı yönəlmiş düşmənçilik siyasətinin bariz nümunəsidir. Avropa dairələri daim türk birliyinə qarşı olublar və xüsusilə də Kipr məsələsində haqsız, ədalətsiz mövqe nümayiş etdiriblər” - deyə bildirdi.
S.Kərimlinin qeyd etdiyinə görə, burda uzun illər Türkiyəyə qarşı da aparılan aqressiv və qərəzli siyasətin şahidi olmuşuq. S.Kərimli bildirdi ki, Türkiyənin Aİ-yə qəbul olunmasının qarşısı alınır, eyni zamanda qardaş ölkəyə qarşı bütün platformalarda qərəz və düşmənçilik siyasəti həyata keçirilir. “Bu qərəzli və düşmənçilik siyasəti Avropa İttifaqının əsas hədəflərindən olub. Biz bu gün Kipr məsələsi ilə bağlı Avropa dairələrinin, Avropa İttifaqının Mərkəzi Asiyanın türk dövlətlərinə qarşı ədalətsiz davranması, həmin ölkələrə müəyyən təzyiqlər göstərməsi eyni mərkəzdən idarə olunan planın tərkib hissəsidir. Aİ-nin təzyiqinə və şantajına məruz qalan Mərkəzi Asiyanın türk dövlətləridir ki, onlar həm də DTD-nın üzvüdürlər. Aİ-nin bu məkrli davranışının əsas məqsədi türk birliyini sarsıtmaq, zəiflətmək, Kiprlə bağlı çirkin plana nail olmaq olub”.
S.Kərimlinin sözlərinə görə, biz burda Azərbaycanın xüsusi mövqeyini, qətiyyətli, sərt, birmənalı siyasətini də vurğulamalıyıq. O vurğuladı ki, çünki Azərbaycan dövləti bütün təzyiqlərə, təhdidlərə baxmayaraq öz mövqeyində qətiyyətli şəkildə dayanıb, Kipr məsələsində Azərbaycanın mövqeyi ortadadır. “Azərbaycan dövlətinin, xüsusən də Azərbaycan Prezidenti İlham Əliyevin son bəyanatlarında da Kipr Cumhuriyyətinə dəstəyin bariz nümunəsini gördük.
Sual yaranır ki, Avropa İttifaqı dairələri Mərkəzi Asiyanın türk dövlətlərini bu məsələdən çəkindirməyə necə nail oldular? Təbii ki, Aİ burda bir çox iqtisadi rıçaqlardan istifadə edərək bu məkrli məsələyə nail oldu. Yəni həmin ölkələrə iqtisadi basqılar edildi, həmin ölkələrlə enerji resurslarının mübadiləsi ilə bağlı qoyula biləcək embarqolar və bu istiqamətdə hədələr, təbiidir ki, Aİ-nin bu məkrli və riyakar siyasətini bir daha ortaya qoyur” - deyə S.Kərimli bildirdi.
S.Kərimli qeyd etdi ki, Aİ-nin bu çirkin planı heç zaman türk birliyini sarsıda bilməz.
İradə SARIYEVA
