Elyar İslamoğlu: "Fransa-Azərbaycan Universitetinin fəaliyyət göstərməsinin özü də qəbuledilməzdir, təmir üçün ora vəsaitin ayrılması da müsbət hal deyil"
Bir neçə gün əvvəl Fransa-Azərbaycan Universitetinə 1 milyon pul ayıraraq, 250 ədəd noutbuk alan Azərbaycan Dövlət Neft və Sənaye Universiteti (ADNSU) daha bir tenderini yekunlaşdırıb. Universitet rəhbərliyi təhsil ocağının əsas binasının pilləkən qəfəslərinin əsaslı təmirini həyata keçirəcək.
"SALMANOĞLU-İNŞAAT" MMC ilə bağlanılmış satınalma müqaviləsinin dəyəri isə 118.060,92 manat təşkil edir.
Bu barədə mətbuatda məlumat yayılıb.
Məsələ burasındadır ki, Fransa-Azərbaycan Universitetinin bağlanması gündəmdə olduğu halda, ADNSU rəhbərliyi bu ali məktəbə təmirlə əlaqədar pul ayırıb. Bu universitetin hələ bağlanmamağı bir yana, üstəlik izafi xərclərə də yol verir.
"Bu universitetin nəinki təmirinə, ümumiyyətlə ona heç 1 qəpik də olsun maliyyə ayrılmamalıdır"
Məsələyə şərh verən filologiya üzrə fəsləfə doktoru, elm və təhsil ekspert Elyar İslamoğlu "Bakı-Xəbər"ə bildirdi ki, Fransa – Azərbaycan universitetinin fəaliyyətini davam etdirməsi də, ona pilləkən qəfəsləri əsaslı təmir etməsi üçün vəsait ayrılması da təəssüf doğurur. "Olduqca aktual olan bir mövzunu gündəmə gətirmisiniz. Hazırda Azərbaycan-Fransa əlaqələri ən pis vəziyyətdədir. Fransa Azərbaycana qarşı çirkin kampaniya aparmaqda, oyunlar oynamaqda davam edir. Bu ölkənin prezidenti Makron Azərbaycana hər cür böhtan atmağa hazırdır. Davamlı şəkildə də Ermənistanı silahlandırır və Azərbaycana qarşı yeni təcavüzə həvəsləndirir, müharibənin yenidən alovlanması üçün əlindən gələn hər şeyi edir. Belə bir zamanda təbii ki, ölkəmizdə Fransa-Azərbaycan Universitetinin fəaliyyət göstərməsi özü də qəbuledilməzdir, təmir üçün ora vəsaitin ayrılması da müsbət hal deyil"deyə E.İslamoğıu bildirdi.
E.İslamoğlunun fikrincə, həmin universitetdə oxuyan tələbələrin gələcəyi ilə bağlı narahatlıqlar var və Fransanın onların hamısını olmasa da, əksəriyyətini öz tərəfinə çəkib onun xeyrinə casusluq etmələrini tələb etməsi ehtimalı bizi əndişələndirməyə bilmir. E.İslamoğlu hesab edir ki, Azərbaycan-Fransa əlaqələri tam normallaşana qədər bu universitetin fəaliyyəti dayandırılmalı idi, nəinki bu ali məktəbin pilləkən qəfəslərinin təmirinə 118.060,92 manat ayrılmalıydı. Bu böyük məbləğdə vəsaitdir, bu pulu başqa istiqamətə yönəltmək olardı. Başqa universitetlərdə o qədər problem var ki, bu vəsait o problemin həllinə xərclənə bilərdi.
Fransa-Azərbaycan Universitetinin hələ də fəaliyyət göstərməsindən narahatam, çünki Fransa Azərbaycan əlaqələri getdikcə daha da pisləşir. Düşünürəm ki, həmin universitet vasitəsilə azərbaycanlı tələbələri öz tərəfinə çəkəcəkdi və onlara istədiyi tapşırığı verəcəkdi.
Bu günlərdə şəhid məqalələrinin "Vikipediya"dan silinməsi də göstərdi ki, bəzi azərbaycanlı gəncləri xarici ölkələrin xüsusi xidmət orqanları ələ ala bilir, onlar xarici xidmət orqanlarının tapşırığını yerinə yetirirlər. Hesab edirəm ki, gələcəkdə də Fransa Azərbaycan Universitetinin xətti ilə belə hadisələr daha tez-tez törədilə bilər.
Prezident də Qarabağ Universitetinin açlışında vurğuladı ki, qeyri-hökumət təşkilatlarının xətti ilə müxtəlif seminarlar keçirilirdi, bizdən olan xarici dairələrə satılmışlar da gedib o treninqlərdə ermənilərlə cici-bacılıq edirdilər, sövdələşirdilər, birləşirdilər, birgə məclislər təşkil edirdilər.
Son olaraq onu deyim ki, Fransa-Azərbaycan Universitetinin fəaliyyəti Fransa Azərbaycan əlaqələrinin tam şəkildə düzəlməsinə qədər dayandırılmalıdır. Bu universitetin nəinki təmirinə, ümumiyyətlə ona heç 1 qəpik də olsun maliyyə ayrılmamalıdır"-deyə E.İslamoğlu bildirdi.
İradə SARIYEVA
