Bu günlərdə ABŞ insan haqlarının pozulmasında iştirak etdiyi iddia edilən dörd Gürcüstan vətəndaşına qarşı sanksiyalar tətbiq edib. Dövlət Departamentinin yaydığı məlumatdan məlum olur ki, sanksiya siyahısına Gürcüstan Daxili İşlər Nazirliyinin xüsusi tapşırıqlar üzrə departamentinin rəhbəri Zviad Xarazişvili, onun müavinlərindən biri və "ciddi insan hüquqları pozuntularında iştirak etdiyi iddia edilən iki məmur" daxildir.
Bundan əlavə, bəyanatda qeyd olunduğu kimi, Birləşmiş Ştatlar yüksək vəzifəli məmurlar, sahibkarlar, hüquq-mühafizə orqanlarının əməkdaşları və qanunvericilər daxil olmaqla, 60-dan çox Gürcüstan vətəndaşı və onların ailə üzvləri üçün viza məhdudiyyətləri tətbiq edir. Sanksiya siyahısına daxil edilmək ABŞ-dəki aktivlərin dondurulması və ABŞ vətəndaşları və şirkətlərinin bu işdə iştirak edənlərlə iş aparmasının qadağan edilməsi deməkdir. Gürcüstan parlamentinin sədri Şalva Papuaşvili ABŞ-ın Gürcüstan rəsmilərinə qarşı tətbiq etdiyi sanksiyaları şərh edərkən deyib ki, Amerika Gürcüstanda dəyərsiz müxalifətin olduğunu görür və müxtəlif yollarla onları hərəkətə gətirməyə çalışır: "Birləşmiş Ştatlar bununla Gürcüstanda demokratiyanı zəiflətmək istəyir". O bildirib ki, ABŞ-ın bu qərarı ölkədə qarşıdan gələn parlament seçkilərinə müdaxilə etmək və müxalifətə dəstək vermək istəyi ilə bağlıdır: "Bu qərarı elan etmək, şübhəsiz ki, onun seçkilərlə bağlı olduğu qənaətini yaradır, çünki onlar bizim tamamilə dəyərsiz müxalifətimiz olduğunu görürlər". Parlamentin spikeri vurğulayıb ki, "hakim qüvvəyə qarşı səsləndirilən saxta ittihamlar" ictimaiyyətə heç bir təsir göstərməyəcək. Hakim "Gürcü Arzusu-Demokratik Gürcüstan" Partiyasının baş katibi Kaxa Kaladze isə bildirib ki, Gürcüstan hakimiyyəti böyük dövlətlərin Gürcüstandan, Ukraynada olduğu kimi, öz maraqları üçün istifadə etməsinə imkan verməyəcək: "Biz ölkəmizin suverenliyini müdafiə edəcəyik. Böyük dövlətlərin öz maraqları naminə uzun tarixə malik kiçik ölkəmizi Ukrayna kimi istifadə edib çətin vəziyyətə salmasına imkan verməyəcəyik". Baş nazir İrakli Kobaxidze ABŞ-ın bu ölkədəki səfiri Robin Dunniqanla görüşü zamanı qeyd edib ki, ABŞ Gürcüstan vətəndaşlarına sanksiyalar tətbiq etməklə, kritik həddə daha da yaxınlaşıb. O əlavə edib ki, ABŞ seçkilər öncəsi müxalifətin şanslarını artırmaq istəyir, lakin bu addımlar əks effekt verir, çünki sanksiyalar hakim partiyanı qorxutmayacaq. Bu arada o da bəlli olub ki, Tiflisin cəzalandırılması üçün Avropa İttifaqı (Aİ) Gürcüstanla vizasız rejimin dayandırılması məsələsini faktiki olaraq razılaşdırıb.
Məlumata görə, Aİ-yə üzv ölkələrin xarici işlər nazirlikləri ilə məsləhətləşmələr və razılaşmalar mərhələsi artıq başa çatıb, lakin yekun qərar Gürcüstanda keçiriləcək parlament seçkilərinin nəticələrindən asılı olacaq. Ölkədə demokratik prinsiplər, o cümlədən azad seçkilər prinsipi sahəsində vəziyyət pisləşərsə, Aİ müvafiq qərar qəbul edə bilər. Qeyd olunub ki, vizanın liberallaşdırılmasının dayandırılması Aİ-yə üzv dövlətlər arasında tam konsensus tələb etməyən qərardır. Buna da münasibət bildirən İrakli Kobaxidze vurğulayır ki, Qərbin bizə etdiyi sadəcə ucuz şantajdır: "Onlar insanlara mesaj vermək istəyirlər ki, "Vahid Milli Hərəkat" adlı qanlı rejim hakimiyyətə qayıdacaq. Bu, sadəcə ucuz şantajın bir göstəricisidir. "Gürcü Arzusu" partiyası bu şantaja 26 oktyabrda keçiriləcək seçkilərdə cavab verəcək". Ancaq belə gğrünür ki, Gürcüstandan gələn xəbərdarlıqlara baxmayaraq, Qərb bu ölkə ilə təzyiq dilində danışmaqda israrlıdır. ABŞ-ın Gürcüstandakı səfiri bu fonda qeyd edir ki, "Gürcü arzusu" hökuməti Gürcüstanı təcrid edir: "Gürcüstan hakimiyyətinin hərəkətləri, son antidemokratik hərəkətlər, ABŞ və Qərb haqqında dezinformasiyalar və baş nazirin bəyanatları - bunların heç biri nə Gürcüstana, nə də gürcü xalqına kömək edir. Gürcüstanı Qərbdən, Avropadan və ABŞ-dan daha da təcrid edən hərəkətlər və bəyanatlar gürcü xalqının maraqlarına uyğun deyil". O vurğulayıb ki, gürcü xalqının böyük əksəriyyəti gələcəklərinin Avropa və Qərblə olduğunu bəyan edib və Gürcüstanı təcrid edən hərəkət və bəyanatlar bu məqsədə xidmət etmir: "Bir daha demək istəyirəm ki, gürcü xalqının Avroatlantik inteqrasiyasının dünyada ABŞ-dan güclü tərəfdarı yoxdur. Biz gürcü xalqını dəstəkləməyə davam edəcəyik və Gürcüstanın Aİ-nin üzvü olaraq daha güclü, iqtisadi cəhətdən daha çiçəklənən ölkə olmasına kömək etməyə davam edəcəyik. Gürcüstanı ABŞ-dan təcrid etməyə çalışan bəyanatların heç kimə faydası yoxdur". Bunlar fonunda "Kavkazskiy uzel" nəşri yazır ki, Qərb təzyiqlərini artırsa, Rusiya və Gürcüstanın yaxınlaşmasını gözləmək olar: "Gürcüstanın Türkiyə və Azərbaycanla da yaxşı münasibətləri var. Çinlə strateji əməkdaşlıq formalaşıb. Deməli, ölkəni hansısa yazıq birisi kimi təqdim etməyə ehtiyac yoxdur. Münasibətlərin nəzərdən keçirilməsi o deməkdir ki, ABŞ-ın səhvsizliyi kultuna etiraz edilir. Gürcülər özlərini aldatmır ki, Amerika hər şeyə qadir və həmişə haqlıdır. Gürcüstan Qərblə dostluq etmək istəyir və olacaq, amma zəngin ağalar qarşısında kasıb qohum kimi deyil. Ən azından, "Gürcü arzusu" öz seçicilərinə məhz bunu çatdırmaq istəyir".
Nahid SALAYEV
