Ceyhun Məmmədov: "Belə addımlar regionda sülhə yox, gərginliyə xidmət edir"
19 sentyabr 2024-cü ildə ABŞ Konqresinin Tom Lantos İnsan Hüquqları Komissiyasında "Dağlıq Qarabağın süqutundan sonra Azərbaycanda insan hüquqları" adlı dinləmə keçirilib və çıxış edənlər tərəfindən Azərbaycana qarşı çoxsaylı qərəzli, obyektivlikdən uzaq ittihamlar səsləndirilib.
Belə ki, cümə axşamı təşkil olunan dinləməyə sədrlik edən ABŞ Konqresmeni və Tom Lantos İnsan Haqları Komissiyasının həmsədri Kris Smit ABŞ hökumətinin Azərbaycan hökumətinin törətdiyi "dəhşətli davamlı insan hüquqları pozuntuları"nı azaltmaq üçün daha çox addım atmalı olduğunu deyib.
Bu dərəcədə separatizmə dəstək nə deməkdir? Nə süqut? Faktı qəbul etmək istəmirlər ki, bu, Azərbaycanın ərazi bütövlüyünün bərpasıdır. Azərbaycanın Qarabağda öz suverenliyini təmin etməsini, separatizmə son qoymasını həzm edə bilmirlər.
"Bu, Konqresin Azərbaycanın suverenliyinə kölgə salmaq cəhdidir"
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Ceyhun Məmmədov hesab edir ki, Konqresin belə sərsəm mövqedən çıxış etməsi birinci dəfə deyil baş verir: "Artıq neçənci dəfədir ki, bəzi Avropa ölkələri, Birləşmiş Ştatlar Azərbaycan əleyhinə təbliğat aparırlar və belə qərəzli təşəbbüslərlə çıxış edirlər. Təəssüf doğuran odur ki, belə hallar ilk dəfə deyil baş verir. Görünən odur ki, Qərbin müəyyən dairələri kobud şəkildə ölkəmizin daxili işinə müdaxilə edirlər. Hamıya məlum olduğu kimi, Azərbaycan 2020-ci ilin 44 günlük Vətən müharibəsi zamanı ərazilərini işğaldan azad etdi. O cümlədən, 2023-cü ilin 19-20 sentyabrında keçirilən antiterror əməliyyatları sayəsində Qarabağda suverenliyimizi tam təmin etdik. Erməni separatizminin mövcudluğuna son qoyuldu. Bunu dəstəkləmək əvəzinə, həyasızcasına bizi etnik erməniləri Qarabağdan çıxarmaqda ittiham edirlər. Azərbaycan erməni sakinləri Qarabağdan çıxarmayıb. Bu, Qərbin Ermənistanla birgə layihəsi idi ki, Qarabağ erməniləri oranı tərk etsin. Bunda məqsəd o idi ki, Azərbaycanı etnik təmizləmədə ittiham etsinlər. Halbuki, BMT missiyası Qarabağa gəldi, həmin ərazilərə baxış keçirdi. Daha sonra bəyan etdiər ki, hansısa etnik təmizləmə, soyqırım baş verməyib. Ona görə də ABŞ Konqresində belə müzakirələrin aparılması beynəlxalq hüquqa hörmətsizlikdir. Belə addımlar regionda sülhə yox, gərginliyə xidmət edir. Münasibətlərin daha da gərginləşməsinə rəvac verir. Erməni lobbisindən bəslənən bir qrup konqresmen regionda yenidən qarşıdurma ocağı yaratmaq istəyir. Bu, Konqresin Azərbaycanın suverenliyinə kölgə salmaq cəhdidir. Eyni zamanda, beynəlxalq hüququn pozulmasıdır. Ona görə də ABŞ belə pozucu addımların atılmasının qarşısını almalıdır. Otuz il ərzində ABŞ Konqresi harada idi? Niyə bir dəfə qaçqın və məcburi köçkünlərimizin çəkdiyi müsübətləri gündəmə gətirmədilər, dinləmələr keçirmədilər? Ona görə də belə riyakar dinləmələr, çağırışlar qəbuledilməzdir".
Vidadi ORDAHALLI
