Bəhruz Quliyev: "Brüsselin buna göz yumması qurumun siyasi, iqtisadi və hərbi maraqlarından irəli gəlir"
"İran 20 ildən çox Ermənistandan sanksiya altında olan malların qaçaqmalçılığı, gizli silah tədarükü və çirkli pulların yuyulması üçün istifadə edib". Bu barədə Avropanın məşhur "EU Reporter" saytı məlumat yayıb.
Bildirilir ki, Avropa Komissiyası Ermənistanlı viza rejiminin liberallaşdırılmasına dair dialoqun başlandığını elan edib: "Bu yaxınlarda Avropa Komissiyası (AK) Ermənistanla viza rejiminin liberallaşdırılmasına dair dialoqun başlandığını elan edib. Kimsə deyə bilərmi ki, bu çox gözəl xəbərdir? Heç də yox. İran 20 ildən çox Ermənistandan sanksiya altında olan malların qaçaqmalçılığı, gizli silah tədarükü və çirkli pulların yuyulması üçün istifadə edib. Naməlum səbəblərdən Aİ bürokratiyası İran proksilərindən biri ilə əlaqələrin inkişafı təhlükəsini görməzdən gəlir".
Görünən odur ki, İrəvanla vizanı sadələşdirən Avropa İttifaqı İranın Ermənistanda etdiklərinə göz yumur.
"Qərblə İranın Cənubi Qafqaz siyasətində üst-üstə düşən məqamlar çoxdur, yəni çəkici bir zindana vururlar"
Sözügedən məsələni "Bakı-Xəbər"ə şərh edən "SƏS" Media Qrupunun rəhbəri, politoloq Bəhruz Quliyev hesab edir ki, Avropa üçbaşlı oyun oynayır: "Əgər İran ikibaşlı oyun oynayırsa, Avropa İttifaqı üçbaşlı oyununun tətbiqinə çoxdan başlayıb. Yəni kimsə deyə bilməz ki, Ermənistanla geniş əlaqələr qurmağa can atan və bu ölkəni əzəli rəqibi Rusiyanın qucağından qoparmağa çalışan qoca Avropa İrəvan-Tehran münasibətlərindən xəbərsizdir. Sadəcə, Brüsselin buna göz yumması qurumun siyasi, iqtisadi və hərbi maraqlarından irəli gəlir. ABŞ və Aİ-nin tətbiq etdiyi sanksiyalar səbəbindən İranın Qərb ölkələrinə, Qərb texnologiyalarına çıxışı məhdudlaşdırılıb. İlk baxışdan belə görünür. Bəs, İrana qarşı sanksiyaların üçüncü ölkələr tərəfindən təsirsiz hala gətirilməsi Avropanı və ABŞ-ı niyə narahat etmir? Bəli, məsələnin kökünü də burada axtarmaq lazımdır. Çünki İran işğalçı siyasəti ucbatından blokada şəraitində yaşayan Ermənistana nəfəslik verməklə, bu ölkəni ölməkdən xilas etməklə dolayısı ilə Qərbin maraqlarını təmin edib".
Politoloq B.Quliyev onu da qeyd etdi ki, Qərbin bəzi addımları anlaşılan deyil, çünki prinsiplərin ziddinədir: "Avroittifaqın bir ölkə ilə qurduğu əlaqələrdən üçüncü ölkənin, yaxud onun vətəndaşlarının yararlana bilmədiyi xəbəri yeni deyil. Belə olan halda, Aİ-nin Ermənistanla viza rejiminin liberallaşdırılmasına dair dialoqun başlamasını necə dəyərləndirmək olar? İran Ermənistanla bütün sahələrdə əlaqələrini heç bir ölkə ilə olmayacaq səviyyədə genişləndirib. İrandan Ermənistana və geriyə həm yüklərin daşınması, həm də insanların sərhəddən keçidi asanlaşdırılıb. Belə görünür ki, Avropadan Ermənistana daşınacaq müxtəlif təyinatlı yüklər çox asan şəkildə İran ərazisinə keçirilə və orada realizə edilə bilər. Bəs Qərbin İrana tətbiq etdiyi sanksiyalar nə olacaq? Maraqlıdır, Ermənistanın izahatı hansı şəkildə olacaq? Amma nəzərə almaq lazımdır ki, Qərblə İranın Cənubi Qafqaz siyasətində üst-üstə düşən məqamlar çoxdur, yəni çəkici bir zindana vururlar. "Siyasətdə əbədi dostlar və əbədi düşmənlər olmur", ifadəsindən çıxış etsək, İranla Qərbin Ermənistanda uzlaşmasını başa düşmək olar. İran Ermənistanda öz maraqlarını güdür, qaçaqmalçılıq yolu ilə ticari əlaqələrini genişləndirir, Qərb isə zəifləməkdə olan İranın bölgədə təsirini artırmaqla digər aktorların, regionda marağı olan digər güclərin imkanlarını neytrallaşdırmaq istəyir".
Vidadi ORDAHALLI
