Abutalıb Səmədov: "Belə təsəvvür var ki, Ermənistan ciddi təhdidlər qarşısındadır..."
"ABŞ Ermənistanın özünün seçdiyi münasibətləri davam etdirməklə bağlı suveren hüququna hörmət edir".
Bu barədə ABŞ Dövlət Departamentindən AZƏRTAC-ın ABŞ müxbirinin regionda Ermənistanın hərbiləşdirilməsi siyasətinin, keçmiş ATƏT-in Minsk qrupu ölkələrinin Ermənistanı dəstəkləməyə davam etməsinin və ABŞ və Avropa İttifaqının artan hərbi dəstəyinin Azərbaycanla Ermənistan arasında davam edən sülh sazişi danışıqlarına təsiri, o cümlədən Ermənistanla Rusiya arasında artan ticarət və hərbi əlaqələrin daha geniş regionda stabilliyə təhdid təşkil etməsi ilə bağlı sorğusuna cavabında deyilib. ABŞ-ın Ermənistana yardımlarını artırmasına gəldikdə, bildirilib ki, ABŞ-ın bu ölkəyə yardımı onun demokratik və iqtisadi inkişafını artırmaq, regional iqtisadiyyata inteqrasiyanı gücləndirmək, ticarəti şaxələndirmək və mənfi təsirlər qarşısında dayanıqlılığını gücləndirməyə xidmət edir.
Qeyd olunub ki, Birləşmiş Ştatlar Azərbaycanın və Ermənistanın regionda təhlükəsizliyi və tərəqqini təmin edəcəyinə inanır, davamlı və layiqli sülh sazişinə nail olmaq səylərini dəstəkləyir: "Tərəflər razılaşmanın yekunlaşdırılması istiqamətində əhəmiyyətli irəliləyiş əldə ediblər və ABŞ bu prosesi istənilən şəkildə dəstəkləməyə sadiqdir".
ABŞ bəyan edib ki, bunu Ermənistanın mənfi təsirlər qarşısında dayanıqlığını artırmaq məqsədilə edir.
"Ermənistanı gücləndirməkdə, ona hərbi cəhətdən ciddi dəstək verməkdə əsas məqsəd onu Azərbaycana qarşı qoymaqdır"
ABŞ-ın bu addımına şərh verən "Alyans" Strateji Araşdırmalar Mərkəzinin sədri, siyasi ekspert Abutalıb Səmədov "Bakı-Xəbər"ə bildirdi ki, son günlər həm ABŞ və onun müttəfiqləri, həm də, nə qədər təəccüblü görünsə də, İran Ermənistan üçün mövcud təhlükələrdən danışır və onu bu təhlükələrdən qorumağın yollarını müzakirə edir. A.Səmədovun sözlərinə görə, xüsusilə İranın mövqeyi hamını təəccübləndirir. "Ermənistanın ABŞ-a və Avropa İttifaqına yaxınlaşmasına İran haqq qazandırır və bunun günahının Rusiyada olduğunu deyir. İran bildirir ki, Rusiya Ermənistanın təhlükəsizliyini təmin edə bilmədi və Ermənistan məcbur olub ABŞ-a və Avropa İttifaqına yaxınlaşdı, onların nümayəndələrini Ermənistana gətirdi, onlarla hərbi təlimlər keçirdi. Nikol Paşinyan bir gün əvvəl (18 sentyabr) "KTMT Ermənistanın təhülkəsizliyinə dəstək vermək əvəzinə Ermənistan üçün təhlükəyə çevrilib" bəyanatını verdi. Yenə də İran Rusiyanı müharibə ilə hədələdi. Təbiidir ki, təkcə Rusiyanı yox, həm də Azərbaycanı və Türkiyəni. Əgər "Zəngəzur Dəhlizi"nin zor gücünə açılmasına cəhd göstərilsə İran buna qarşı siyasi və hərbi vasitələrlə müqavimət göstərəcək dedi. Yəni belə təsəvvür var ki, Ermənistan ciddi təhdidlər qarşısındadır, burada həm ABŞ, həm də İran Ermənistanın yanında olduğunu bəyan edir. Rusiya Ukrayna müharibəsini bu il yekunlaşdırmağa çalışır. Müəyyən qədər belə bir şans da yaranıb. ABŞ-da keçirilən seçkilərdə Tramp qalib gələrsə ilin sonuna qədər müharibəni bitirəcəyini deyir. Baxmayaraq ki, son günlər onun şansı xeyli azalıb. Almaniya kansleri də sülh təklifi ilə çıxış edir. Ümumiyyətlə, dünyada belə bir rəy mövcuddur ki, hərbi vasitələrlə Rusiyanı məğlub etmək mümkün olmayacaq və Ukrayna, ərazi itirmək hesabına olsa da, Rusiya ilə sülhə getməlidir. Təbii ki, Ukrayna ilə sülhə, yaxud atəşkəsə nail olunsa gündəliyə Ermənistan çıxacaq"-deyə A.Səmədov bildirdi.
A.Səmədov qeyd etdi ki, Ermənistanın antirusiya bəyanatları və antirusiya xarakterli davranışları Rusiyanı çox qıcıqlandırır, bu davranışlara görə Ermənistanı mütləq cəzalandırmağa cəhd göstərəcək. "İndiyə qədər daha çox Paşinyanı hakimiyyətdən uzaqlaşdırmaq istiqamətində cəhdlər göstərmişdi və iki gün əvvəl hətta Ermənistanda dövlət çevrilişinə cəhd göstərildiyi və bu işi görmək istəyənlərin də Rusiyada hazırlandıqları rəsmi dövlət strukturları tərəfindən bəyan edildi. ABŞ və Fransa Ermənistanı həm Rusiyanın, həm də, nə qədər qəribə görünsə də, Azərbaycanın yaratdığı təhlükələrdən qorumaq əzmindədir. Rusiya ilə bağlı onlarla razılaşmaq olar, Rusiya asanlıqla Ermənistanın əldən çıxmasına imkan verməyəcək və istifadə olunacaq yeganə vasitə hərbi vasitədir. Digər vasitələr hələ ki, elə bir ciddi təsir göstərməyib. Ancaq Rusiya hələlik iqtisadi amillərdən də istifadə etməyib və tamamilə mümkündür ki, iqtisadi və hərbi amillər eyni vaxtda gündəliyə gəlsin. Ermənistana qarşı Rusiya təhlükəsinin olması realdır, ancaq Ermənistan Amerikadan, yaxud Fransadan aldığı silahlarla Rusiya qarşısında onsuz da dayana bilməz. Əgər Rusiya hərbi müdaxilə yolunu seçsə, deməli, Ermənistanı gücləndirməkdə, ona hərbi cəhətdən ciddi dəstək verməkdə əsas məqsəd onu Azərbaycana qarşı qoymaqdır. Bunu guya Azərbaycandan gələn təhlükələrlə əlaqələndirmək istəyirlər. Halbiki, Azərbaycan rəhbərliyi dəfələrlə bəyan edib ki, Ermənistana qarşı zor tətbiq etmək fikri yoxdur, müharibə bitib, Azərbaycan sülh istəyir və bölgəni əməkdaşlıq və sülh bölgəsinə çevirmək istəyir. Bunun üçün də qısa müddətdə sülh sazişini imzalamaq istəyini ifadə edir. Buna mane olan da Ermənistandır. Konstitutsiyanı dəyişdirmək istəmir, müxtəlif bəhanələr gətirir. Bu səbəbdən ABŞ-ın və Fransanın Ermənistanı silahlandırmaq cəhdləri, təbiidir ki, anlaşılmazdır. Onlar onu da dərk etməlidirlər ki, bu cəhdlərin nəticə verməsi də mümkün deyil. Çünki Azərbaycanın hərbi büdcəsi Ermənistanla müqayisədə təqribən üç dəfə artıqdır. Azərbaycanın bu silah yarışmasını udmaq ehtimalı dəfələrlə çoxdur. Ancaq nə ABŞ, nə Fransa Ermənistana bu silah yardımından imtina etmirlər və belə görünür ki, bundan sonra da bu yardımları artırmaq fikrindədirlər. Görünür, məqsəd Ermənistana belə dəstək göstərməklə Rusiyadan daha cəsarətlə uzaqlaşmasını təmin etməkdir. Hərçənd ki, burda bu yardımlar Ermənistana Rusiya qarşısında nə üstünlük verə bilər, aydın deyil. Ancaq Ermənistanın başında bəzən reallıqları nəzərə almayan, avantüraya meylli və son dövrdə kifayət qədər avantürüst addımlar atan bir baş nazir var. Görünür, ABŞ onu bu istiqamətdə həvəsləndirmək istəyir. Nə olacaq, Ermənistanın bundan sonraklı taleyi necə olacaq, onu yəqin ki, yaxın bir-iki il göstərəcək. Ancaq son 3-4 ildə Ermənistan tarixinin ən böyük məğlubiyyətlərini yaşayıb və bunun əsas səbəblərindən biri də Nikol Paşinyanın yeritdiyi, reallıqları nəzərə almayan avantürüst siyasətdir"-deyə A.Səmədov qeyd etdi.
İradə SARIYEVA
