Payız-qış mövsümü ilə bağlı Azərbaycanda qrip əleyhinə vaksinasiyaya başlanılıb. Bu barədə TƏBİB-dən məlumat verilib. Qeyd olunub ki, sentyabrın 10-dan etibarən TƏBİB-in tabeliyindəki tibb müəssisələrində vaksinasiya məntəqələrinin işi qaydalara uyğun olaraq və "soyuq zəncir" sisteminin tələbləri nəzərə alınmaqla təşkil olunub.
Qeyd edək ki, peyvənd böyüklərə və 6 aydan yuxarı olan uşaqlara təyin etmək üçün nəzərdə tutulub.
Onu da bildirək ki, vaksinasiya prosesində Səhiyyə Nazirliyi tərəfindən ölkəyə yeni gətirilən "Abbott" şirkətinin istehsalı olan tam təhlükəsiz və yüksək keyfiyyətli vaksin preparatlarından istifadə olunur. Məlumat üçün bildirək ki, qrip əleyhinə peyvənd olunmaq istəyən vətəndaşlar regionlar üzrə TƏBİB-in tabeliyindəki rayon mərkəzi xəstəxanalarının, eləcə də Bakı şəhəri üzrə ambulator-poliklinik xidmət göstərən ilkin səhiyyə müəssisələrində ödənişsiz olaraq yararlana bilər.Qeyd etdiyimiz kimi, artıq xəstəxanalarda qrip əleyhinə vaksinasiya prosesinə start verilib. Vaksinasiyanın necə aparıldığını, insanların aktivliyini öyrınmək məqsədilə bir neçə poliklinika ilə əlaqə saxladıq.
Yasamal rayonu 3 nömrəli Şəhər Poliklinikası: "Qrip əleyhinə peyvənd üçün müraciət edənlər az deyil"
Yasamal rayonunda olan 3 nömrəli Şəhər Poliklinikasından "Bakı-Xəbər"ə bildirildi ki, qrip əleyhinə peyvənd üçün müraciət edənlər az deyil: "18 sentyabrdan etibarən vaksinasiya üçün gələnlərin sayı daha da artıb. Insanlar bu mövsümdə qrip olmamaq üçün qabaqlayıcı tədbir olaraq peyvənd olunurlar".
Xətai rayonu 6 nömrəli Şəhər Poliklinikası: "İnsanlar qrip əleyhinə peyvənd olunmaq üçün xəstəxanaya gəlirlər"
Xətai rayonunda olan 6 nömrəli Şəhər Poliklinikasından "Bakı-Xəbər"ə bildirildi ki, vaksiyanasiyaya maraq var: "İnsanlar qrip əleyhinə peyvənd olunmaq üçün xəstəxanaya gəlirlər".
Pərvanə Mustafayeva: "Məktəb və bağça yaşlı övladı olan valideynlər övladını peyvənd etdirməlidir"
Həkim ekspert Pərvanə Mustafayeva "Bakı-Xəbər"ə şərhində bildirdi ki, risq qrupunda olanlara, xroniki xəstəliklərdən əziyyət çəkənlərə qripə qarşı peyvənd vurdurmaq məsləhət görülür: "Məktəb və bağça yaşlı övladı olan valideynlər də övladını peyvənd etdirməlidir. Məlumdur ki, kütləvi qapalı yerlərdə uşaqlar yaxın məsafədə ünsiyyətdə olurlar və hava-damcı yolu ilə kəskin respirator infeksiyalara yoluxma sürətlə gedir. Yoluxma riski yüksək olduğundan vaxtında peyvənd olunmaq lazımdır. Nəzərə almaq lazımdır ki, qrip ən ağır keçirilən xəstəliklərdəndir. Xəstənin qripi yüngül keçirməsi üçün vaksinasiya mütləqdir".
Günel CƏLİLOVA
