Prezident İlham Əliyev "Azərbaycan Respublikasının işğaldan azad edilmiş əraziləri üzrə şəhər günlərinin təsis edilməsi haqqında" sərəncamda dəyişiklik edilməsi barədə sərəncam imzalayıb. Sərəncama əsasən, 20 sentyabr – Xankəndi, Xocalı, Xocavənd və Ağdərə şəhərləri günü təsis olunub.
Beləliklə, işğaldan azad edilən bölgələrin təsis günləri olacaq. Ancaq Xocalı deyəndə yada qanlı 26 fevral düşür. Xocalının müstəqillik tarixində 2" fevral kimi tarixi faciə günü də var. Məlumdur ki, 1992-ci il fevralın 25-26-na keçən gecə Xocalı öz qanlı tarixini yaşadı. Həmin gün ermənilər Xocalıda 106 qadın, 63 uşaq və 70 yaşlı insan olmaqla 613 nəfər qətlə yetirildi, 1275 sakin girov götürüldü, 100-dən çox nəfərin taleyi isə bu günədək naməlum qalıb. Artıq azad Xocalının təsis günü də olacaq. 20 sentyabr Xankəndi, Xocalı, Xocavənd və Ağdərə şəhərləri günü kimi qeyd ediləcək.
Tural İsmayılov: "Separatçılığın kökünün qazıldığı şəhərlərin öz günlərinin olması tarixi əhəmiyyətə malikdir"
Siyasi şərhçi Tural İsmayılov "Bakı-Xəbər"ə açıqlamasında bildirdi ki, işğaldan azad edilən şəhərlərin hər birinin bizim üçün tarixi, mənəvi əhəmiyyəti var. İşğaldan azad olunan ərazilərlə bağlı şəhər günlərinin təsis olunması bu bölgələrin tarixi dəyərini yenidən özünü qaytarır: "20 sentyabr tarixi daha əlamətdar olacaq. Çünki 20 sentyabr həm Dövlət Suverenliyi, həm də Xankəndi, Xocalı, Xocavənd və Ağdərə şəhərlərinin təsis günü kimi qeyd ediləcək. Azad edilən ərazilərlə bağlı şəhər günlərinin təsis olunması dosta-düşmənə verilən mesajdır. Məlumdur ki, Xocalı şəhəri işğal olunarkən həmin ərazidə böyük tarixi faciə yaşandı. Xocalı faciəsi ilə bağlı beynəlxalq təşkilatlar, haqq-ədalətdən danışan ölkələr hüquqi qiymət verməyiblər. 20 sentyabrın Xocalı günü kimi qeyd edilməsi 26 fevral Xocalı soyqırımına göz yuman ölkələrə mesajdır. Separatçılığın kökünün qazıldığı şəhərlərin öz günlərinin olması tarixi əhəmiyyətə malikdir".
Faiq Ələkbərli: "Yeni nəsil tək faciəvi günləri deyil, eyni zamanda, torpaqların yenidən həyata qayıtdığı günləri də bilməlidir"
AMEA-nın əməkdaşı, türkoloq-alim Faiq Ələkbərli "Bakı-Xəbər"ə şərhində bildirdi ki, işğaldan azad edilən ərazilərdə şəhər gününün təsis olunması sevindiricidir: "Məlumdur ki, əvvəllər həmin bölgələrin işğal gününü acı ilə xatırlayırdıq. Xüsusilə 26 fevral tarixdə faciəvi gün kimi qeyd edilib. Tarixi yaddaş üçün işğal günləri əhəmiyyət kəsb edir. Bununla yanaşı, azad edilən torpaqlarımızın şəhər günlərinin qeyd edilməsi vacibdir. Yeni nəsil üçün tək faciəvi günlər deyil, eyni zamanda, torpaqların yenidən həyata qayıtdığı günləri də bilməlidir. Gənc nəsil əldə etdiyimiz uğurları, zəfərləri də bilməlidir".
Günel CƏLİLOVA
