Akif Nağı: "Bu ölkənin Azərbaycanla bağlı dedikləri tamamilə qərəzlidir, qisas xarakteri daşıyır"
Niderland Krallığı (Hollandiya) tərəfindən sentyabrın 13-də dərc olunmuş hökumət proqramının "Beynəlxalq təhlükəsizlik" bölməsində Azərbaycana qarşı iddialar yer alıb. Burada Azərbaycanın öz torpaqlarını işğaldan azad etməsi "Dağlıq Qarabağın ələ keçirilməsi" kimi qeyd edilib.
Hollandiya hökumətinin bu iddiasına Azərbaycanın Xarici İşlər Nazirliyi kəskin cavab verib, mövqe bildirib. Hollandiyanın "Azərbaycan Dağlıq Qarabağı işğal edib" fikrini işlətməsi bu ölkənin qərəzinin, qisasçılığının göstəricisi deyilmi? Çünki bu yaxınlarda Hollandiyanın müstəmləkəsindən Bonayre adasının azad olunması məsələsi Bakı Təşəbbüs Qrupunun təşkilatçılığı ilə Bakıda keçirilən tədbirdə qaldırılılıb, onlara azadlıq tələb edilib.
Bu hesabat Hollandiya dövlətinin, hökumətinin qisasçılığı kimi qiymətləndirilə bilərmi?
"Niderland Bonayre adasının müstəqilliyinə, müstəmləkədən azad olmasına dəstək verdiyinə görə Azərbaycandan..."
Azad Vətən Partiyasının sədri Akif Nağı "Bakı-Xəbər"ə bildirdi ki, Niderland da bəzi digər Avropa ölkələri kimi Azərbaycana qarşı qərəzli mövqe tutur, Fransanın yolu ilə getməyə cəhd edib ölkəmizə təzyiq göstərmək istəyirlər. "Amma özləri hər yerdə istifadə etdikləri şüarların prinsiplərini pozurlar. Özlərini guya demokrat, insan haqlarının müdafiəçisi kimi göstərirlər, amma bunların heç birinə reallıqda əməl etmirlər. Niderland rəhbərliyi həmişə Azərbaycana qarşı qərəzli və pozucu mövqedə olub. Onlar Azərbaycana təzyiq göstərməyə cəhd etməklə, ola bilsin, ölkəmizin mövqeyində hansısa dəyişikliklərə nail olmaq istəyirlər. Azərbaycanın bütün məsələlərlə bağlı ədalətli və barışmaz mövqeyi çoxlarının xoşuna gəlmir. Bəzi Avropa dövlətləri, Avropanın regional qurumları, ATƏT, Avropa Şurası, Avropa İttifaqı Azərbaycana qarşı qərəzli mövqedən çıxış edir. Hesab edirəm ki, bunun kökündə Azərbaycanın müstəqil siyasət yeritməsi dayanır. Azərbaycan heç kəsin diqtəsinə boyun əymir, həmişə də haqlı olduğunu sübut edir, göstərir. İstər ərazi bütövlüyünün bərpası, istər insan haqlarının, demokratik prinsiplərin qorunması və sair bütün məsələlərə bağlı Azərbaycanın öz dəst-xətti, yol xəritəsi, əsas rəhbər tutduğu tezislər var. Bu da onların xoşuna gəlmir. İstəyirlər ki, Azərbaycan da digər ölkələr kimi onların dediyi ilə hərəkət etsin, onlar bir bəyanat versinlər, bir komissiya göndərsinlər, guya filan məsələlər Azərbaycanda yanlışdır, biz də onu dərhal nəzərə alaq və sair. Yəni Azərbaycanı bu cür təzyiqlərlə, təhdidlərlə idarə etsinlər. Məqsədləri budur. Azərbaycan isə bununla razılaşmır və imkan vermir ki, onlar hansısa bir hərəkət etsin. Niderland da həmin dövlətlərdən biridir. Birincisi, faktları saxtalaşdırırlar. Azərbaycan özünün ərazi bütövlüyünü bərpa edib, Azərbaycan heç kəsin ərazisini işğal etməyib, onların iddia etdiyi kimi, heç bir ərazini də ələ keçirməyib. Qarabağ Azərbaycan ərazisidir, bu faktdır. Bunu bilərəkdən görmürlərsə, deməli reallığı, həqiqəti ortaya qoymaq istəmirlər. Azərbaycan o mövqeni, o münasibəti ortaya qoyur ki, məsələnin mahiyyəti bundan ibarətdir, istəyirsiz açın tarixə, beynəlxalq qurumların sənədlərinə baxın, hər yerdə "Dağlıq Qarabağ" dedikləri ərazinin Azərbaycan ərazisi olduğunu görəcəksiniz. Tarixi bilmək, tarixi oxumaq istəmirlərsə BMT Təhlükəsizlik Şurasının, BMT Baş Assambleyasının sənədlərinə baxsınlar. Hər birində bu ərazi Azərbaycan ərazisi kimi göstərilib. Azərbaycan öz ərazi bütövlüyünü bərpa edib"-deyə A.Nağı qeyd etdi.
Bəzi Avropa dövlətlərinin 30 il ərzində haqsız mövqedə olduğunu və bu gün də o cür yanaşdıqlarını deyən A.Nağının sözlərinə görə, onlar Azərbaycanın torpaqlarını zəbt etmiş Ermənistanı müdafiə ediblər. A.Nağının bildirdiyinə görə, Azərbaycan öz ərazi bütövlüyünü bərpa etdikdən sonra o dövlətlər Azərbaycana qarşı istifadə etmək üçün özlərindən bu cür ifadələr, ibarələr kəşf edirlər. A.Nağının fikrincə, onlar Azərbaycanın uğurlarını qəbul edə bilmirlər ki, Azərbaycan regionda özü öz gücünə, heç kəsdən kömək almadan, heç kəsin təzyiqinə əhəmiyyət vermədən öz ərazi bütövlüyünü bərpa etdi və müstəqil siyasət yürüdür, bu dövlətlər bunu Azərbaycana bağışlaya bilmirlər. "Başqa bir məsələ isə Bonayre adasının azadlığı ilə bağlı Bakı Təşəbbüs Qrupunun qaldırdığı təşəbbüslərdir. Azərbaycan dünyada yeganə dövlətdir ki, hələ də müstəmləkə altında olan xalqların və ərazilərin hüquqlarını müdafiə edir.
Bu, Asiya qitəsində də, Afrikada da elədir. Amerika qitəsindəki Bonayre adası da haqqı pozulan bir ərazidir, uzun illərdir ki, Niderlandın müstəmləkəsi altındadır. Bonayre adasının müstəqillik haqqı Niderland tərəfindən pozulur, o hələ də bu adanı öz müstəmləkəsi olaraq saxlayır. Onlar referendumlar keçirirlər, amma Niderland hökuməti o referndumun nəticələrini nəzərə almaq istəmir. Azərbaycan dünyanın bir neçə yerində müstəmləkəçiliyə qarşı mübarizə aparır, Bakı Təşəbbüs Qrupu yaradılıb. Eyni zamanda bu işlər Bonayre adası və orada yaşayan xalqlarla bağlı aparılır, bu istiqamətdə konfrans keçirildi, beynəlxalq hüquq normalarına uyğun olan sənəd qəbul olunub, onların müstəqillik haqqının Niderland hökuməti tərəfindən tanınması tələb edilib. Qoyun, onlar desinlər görək Azərbaycan nəyi düz demir? Eyni zamanda, keçən əsrin 60-70-ci illərində müstəmləkə ərazilərinin azad olunması prosesi getdi, müstəmləkəçi dövlətlər bunun qarşısını ala bilmədilər. Amma bəzi yerlərdə müstəmləkələri müxtəlif adlar altında saxladılar. O cümlədən, Fransanın və Niderlandın belə müstəmləkələri qalıb. Azərbaycan haqlı olaraq müstəmləkədə olan xalqların və ərazilərin haqqını müdafiə edir. Beynəlxalq aləm isə bunu görməzliyə vurur. Bu da dünyanın ədalətsiz mövqeyinin göstəricilərindən biridir. Niderland Bonayre adasının müstəqilliyinə, müstəmləkədən azad olmasına dəstək verdiyinə görə Azərbaycandan intiqam almaq istəyir. Bu ölkənin Azərbaycanla bağlı dedikləri tamamilə qərəzlidir, qisas xarakteri daşıyır. Amma Niderlandın hansı mövqedə olması onun öz işidir. O belə qərəzli bəyanatlarla Azərbaycanı öz yolundan döndərə bilməz. Azərbaycan yenə də o istiqamətdə haqq işini davam etdirəcək, müstəmləkə xalqlarının azadlıq mübarizəsinə dəstək verəcək.
Azərbaycan bütün dövlətlərlə, o cümlədən də Avropa dövlətləri ilə, Niderlandın özü ilə normal münasibətlər saxlamağa hazırdır. Siyasi, iqtisadi, mədəniyyət sahələrində əlaqələr yerində olmalıdır. Bunun tərəfdarıdır, heç bir dövlətə qarşı qərəzli mövqedən çıxış etmir. Azərbaycan öz mübarizəsini davam etdirəcək. Kimlərsə Azərbaycana qarşı bu prinsiplərdən kənar addım atacaqlarsa məqsədlərinə nail ola bilməyəcəklər. Çünki Azərbaycan həm haqlıdır, həm də dediklərini əsaslandırır, sübut edir. Ona görə də onların hansısa bir qərəzli sənəd qəbul etmələrinin, orada hansısa fikir işlətməklərinin heç bir təsiri yoxdur. COP29 tədbirlərinin vaxtı yaxınlaşdıqca erməni mərkəzlərinin, yaxud Azərbaycanı istəməyən digər mərkəzlərin pullu sifarişləri artacaq və Azərbaycanı qaralayan qüvvələr şər-böhtan atacaq, amma heç nəyə nail ola bilməyəcəklər"-deyə A.Nağı bildirdi.
İradə SARIYEVA
