Elşad Həsənov: "Prezident İlham Əliyevin təşəbbüsü ilə təhlükəsizlik forumunun daimi katibliyinin yaradılması çox müsbət haldır"
Dövlət Təhlükəsizliyi Xidmətinin (DTX) təşkilatçılığı ilə 50-yə yaxın ölkənin xüsusi xidmət orqanlarının nümayəndələrinin iştirak etdiyi "Qlobal nəqliyyat şəbəkələrinin təhlükəsizliyinə yönələn müasir çağırışlar" mövzusunda II Bakı Təhlükəsizlik Forumu keçirilib. Bu barədə mətbuata DTX-dən məlumat verilib.
Bildirilib ki, tədbirdə Prezident İlham Əliyevin forumun iştirakçılarına müraciəti səsləndirilib, konfransın mövzusunu əhatə edən videomaterial təqdim olunub. Tədbirdə çıxış edən DTX-nin rəisi general-polkovnik Əli Nağıyev ötən ilin may ayında keçirilmiş və bu il yenidən təşkil olunan Bakı Təhlükəsizlik Forumunun tərəfdaş qurumlar arasında məlumat mübadiləsinin və qarşılıqlı əlaqənin digər sahələrinin genişləndirilməsi baxımından mühüm əhəmiyyət daşıdığını bildirib.
Xidmət rəisi, həmçinin, beynəlxalq terrorçuluqla və bütövlükdə təhlükəsizlik sisteminə təhdid hesab olunan hallarla mübarizədə xüsusi xidmət orqanlarının fəaliyyətinin koordinasiyalı şəkildə təmin edilməsinin vacibliyini qeyd etməklə, tədbirin ümumi maraq kəsb edən məsələlər ətrafında ölkələrin təhlükəsizlik strukturlarının müzakirə aparmaları üçün önəmli platforma olduğunu nəzərə çatdırıb.
Xidmət rəisi builki forumun COP29 ərəfəsində keçirilməsinin təsadüfi olmadığına diqqət çəkərək, enerji resurslarının daşınmasında istifadə olunan nəqliyyat xətlərini hədəf alan terror-təxribat aktlarının qlobal xarakterli iqtisadi və ekoloji fəlakətlərə səbəb ola biləcəyindən və bu xüsusda birgə səylərin daha da gücləndirilməsinin və ümumi fəaliyyətin səmərəliliyinin artırılmasının zəruriliyindən danışıb.
Ə.Nağıyev Prezident İlham Əliyevin beynəlxalq aləmdə aktual olan məsələlərə dair tədbirlərin respublikamızda təşkil olunmasına davamlı siyasi dəstək verdiyini vurğulayaraq, bu konfransın qlobal nəqliyyat dəhlizlərinin təhlükəsizliyinin üzləşdiyi risqlərlə mübarizədə ortaq yanaşmaların formalaşdırılmasına və fəaliyyət strategiyasının təkmilləşdirilməsinə öz töhfəsini verəcəyinə əminliyini ifadə edib. Eyni zamanda, Prezident İlham Əliyevin təşəbbüsü ilə Bakı Təhlükəsizlik Forumunun Bakıda daimi əsasda fəaliyyət göstərəcək Katibliyinin yaradılması iştirakçı ölkələr tərəfindən yekdilliklə dəstəklənib.
Əliyevin təşəbbüsü ilə Bakı təhlükəsizlik forumunun daimi katibliyi yaradıldı. Bunu necə qiymətləndirmək olar? Bu forumun daimi katibliyinin yaradılmasının faydası nədir?
"Daimi katibliyin Bakıda yaradılmasının üstünlüyü ondan ibarətdir ki..."
Siyasi ekspert Elşad Həsənov "Bakı-Xəbər"ə şərhində bildirdi ki, müasir dövrdə dünyanın yenidən bölünməsi zamanı təhlükəsizliyin təmin edilməsi ön plana çıxır. "Çünki hər şey hər bir ölkənin təhlükəsizliyinin necə qurulmasından asılıdır. Bu da son dövrlər Azərbaycanda çox yüksək səviyyədə qurulub və ölkəmiz təhlükəsiz bir məkana çevrilib. Bunun üçün də bizim hüquq-mühafizə orqanları, xüsusilə də təhlükəsizlik orqanları gecə-gündüz var qüvvələri ilə çalışırlar. Bu günlərdə Qlobal nəqliyyat şəbəkələrinin təhlükəsizliyinə yönələn müasir çağırışlar" mövzusunda II Bakı Təhlükəsizlik Forumu keçirilib. Düzdür, mətbuatda bu barədə çox az məlumat verilib, ancaq orda Təhlükəsizlik Xidmətinin rəisi, general-polkovnik Əli Nağıyevin çıxışından müəyyən məsələlər verilib və burada qlobal nəqliyyat dəhlizlərinin təhlükəsizliyinin üzləşdiyi risqlərlə mübarizədə ortaq yanaşmaların formalaşdırılmasının və fəaliyyət strategiyasının təkmilləşdirilməsinin vacib olduğu nəzərə çatdırılıb.
Forumda, eyni zamanda, enerji resurslarının daşınmasında istifadə olunan nəqliyyat xətlərini hədəfə alan terror-təxribat aktları qlobal xarakterli iqtisadi, ekoloji fəlakətlərə səbəb ola biləcəyindən, bu sahədə birgə səylərin artırılmasının daha da vacib olduğu vurğulanıb.
Onu da xatırladım ki, bu forumda 50-yə yaxın ölkənin təhlükəsizlik orqanlarının rəhbərləri iştirak edib. Bu Forumun da Bakıda keçirilməsi və Prezident İlham Əliyevin təşəbbüsü ilə təhlükəsizlik forumunu daimi katibliyinin yaradılması çox müsbət haldır. Çünki bilirik ki, Azərbaycan Şimal-Cənub, Şərq-Qərb, "Orta Dəhliz" kimi böyük beynəlxalq nəqliyyat dəhlizlərinin kəsişdiyi bir ölkədir. Buna görə də Bakının strateji mövqeyi aydındır, Azərbaycansız bunların təhlükəsizliyinin təmin olunması çətindir. Ona görə də, daimi katibliyin Bakıda yaradılmasının üstünlüyü ondan ibarətdir ki, tərəfdaş ölkələr təhlükəsizliklə bağlı əldə etdikləri məlumatları katibliyə ötürəcəklər, katiblik də bu işləri müvafiq yerlərə göndərəcək. İnformasiyalar operativ olaraq vaxtında çatdırılacaq. Bir məsələni də deyim ki, təhlükəsizlik orqanlarının işinin effektivliyini artıran əsas şərtlərdən biri də hadisə baş verməmiş informasiya əldə edib hazırlanan terror-təxribat hadisəsinin qarşısını almaqdır. Biri var, terror-təxribat hadisəsi törədilir, sonra onu törədənlər tapılır tutulur cəzalandırılır, bu da dövlətə həm böyük iqtisadi, həm də siyasi zərər verir. Çünki həmin hadisənin törənməsi, terror-təxribat hadisəsinin baş verməsi məhz elə təhlükəsizlik və hüquq-mühafizə orqanlarının da imicinə zərbə vurur. Ona görə də burda əsas qayə həmin törədiləcək hadisələrin vaxtında qarşısının alınmasıdır. Bu gün kommunikasiyalarsız heç bir yer təsəvvür etmək olmaz"-deyə E.Həsənov bildirdi.
Siyasi ekspert hesab edir ki, yaxın zamanlarda Ermənistan da "Zəngəzur dəhlizini" açacaq. E.Həsənovun sözlərinə görə, bu Forumda Türkiyənin Milli Kəşfiyyat Təşkilatının rəhbəri İbrahim Kalın da çıxışında bildirib ki, Azərbaycan- Ermənistan-Naxçıvan-Türkiyə-Avropa, Ermənistan-Naxçıvan-İran, Ermənistan-Azərbaycan-Rusiya, Ermənistan-Türkiyə-Avropa, İran-Naxçıvan, Ermənistan-Gürcüstan marşurutları, yəni bu nəqliyyat dəhlizləri üzrə kommunikasiyalar açılacaq. "Regionda ərazi bütövlüyünün və suverenliyin qorunması şərtilə kommunikasiyalar açılacaq və təhlükəsizlik qarşılıqlı olaraq təmin ediləcək. Bu, Türkiyənin Milli Kəşfiyyat Təşkilatının rəhbəri İbrahim Kalının fikirləridir. Bir daha onu qeyd edim ki, katibliyin burada açılması çox müsbət haldır".
E.Həsənovun fikrincə, bu da Azərbaycandan keçən və Azərbaycana gələn kommunikasiyaların təhlükəsizliyinin qorunması baxımından ölkələrlə qarşılıqlı olaraq informasiya mübadiləsinin həyata keçirilməsi (məxvi informasiyaların əldə olunması-E.H), onların vaxtında çatdırılması və terror-təxribat hadisələrinin qarşısının alıması üçün çox vacib məsələdir. "Hesab edirəm ki, bu bir daha ölkəmizin necə bir təhlükəsizlik adası olmasını göstərən amillərdən biri olacaq"-deyə E.Həsənov qeyd etd.
İradə SARIYEVA
