Belarus prezidenti Aleksandr Lukaşenko Rusiya ilə Ukrayna arasında davam edən müharibəyə diqqət çəkərək, deyib ki, Belarusa hücum III Dünya Müharibəsinin başlanmasına səbəb ola bilər.
Çoxqütblülük və müxtəliflik ideyasını dəstəklədiklərini bildirən Lukaşenko deyib ki, kimin çoxqütblülüyün əleyhinə olduğunu hər kəs bilir: "Ancaq bunun qarşısı artıq alına bilməz. Bu çoxqütblülük təkcə qapını döymür, artıq qarşımızdadır. Qlobal təhlükəsizlik böhranından mütləq çıxış yolu tapacağıq. Çünki ən yaxın müttəfiqlərimiz və bir çox ölkə bizimlə birlikdədir".
Müharibə istəmədiklərini vurğulayan Lukaşenko, qonşu dövlətlərdə sülhün hökm sürəcəyinə inandıqlarını, xalqların harmoniya və dostluq içində yaşayacağı bir günün gələcəyinə inandıqlarını bildirib. Dinc yanaşmaların zəiflik əlaməti olmadığına diqqət çəkən Lukaşenko xarici təcavüzə hər zamankından daha güclü cavab verə biləcəklərini də dilə gətirib.
ABŞ-ın sentyabrın ortalarından noyabrın əvvəlinə kimi həm Moskva, həm də Kiyev tərəfindən cəbhədə hərbi gərginliyin artmasını gözlədiyinə dair kəşfiyyat məlumatlarına malik olduğunu bildirən Lukaşenko, müharibənin davam etməsini istəyən Qərbin kəşfiyyat orqanlarının Belarusu da bu vəziyyəti gərginləşdirmək üçün münasib yer kimi gördüklərini bildirib.
Başqalarının çəkmələri torpağımıza basmasa, biz bunu (Belarus ordusunun münaqişəyə girməsi) etməyəcəyik", - deyə Lukaşenko bildirib.
ABŞ-ın fürsət yarandıqda Kiyevə Belarusun cənub sərhədindəki infrastrukturuna hücum əmri verdiyini iddia edən Lukaşenko bunun səbəbinin Rusiya pilotsuz uçuş aparatlarının (PUA) Belarus ərazisi yaxınlığında uçması olduğunu deyib.
Ukraynalılarla müxtəlif kanal vasitəsilə həm Rusiya, həm də Ukrayna PUA-larının əraziləri üzərində uçması faktını mediada işıqlandırmamaq barədə razılaşdıqlarını bildirən Lukaşenko, həm Rusiya, həm də Ukrayna tərəfinin PUA-lardan sui-istifadə etdiyini və hər iki tərəfdən də PUA-ların Belarus ərazisinə düşdüyünü deyib.
Vaşinqtondakı "kukla ustalarının" Ukraynanı Belarusla münaqişəyə sövq etdiyini iddia edən Lukaşenko, "amerikalılardan bunu soruşmaq istəyirəm: Siz sülh, dinc danışıqlar, yoxsa vəziyyətin gərginləşməsini istəyirsiniz? Bunu əbəs yerə soruşmuram. Ona görə soruşuram ki, son vaxtlar danışıqlarla bağlı bizə eyhamlar, hətta şərtlər də irəli sürdülər. Biz də razılaşdıq. İndi bunu necə başa düşək?" deyib.
Belarus lideri, ölkəsinin yerləşdiyi coğrafi mövqeyə görə genişmiqyaslı münaqişələrin içində yer aldığını xatırladıb və deyib ki, tarix təkrarlanır: "Ancaq bunu başa düşməyənlərə, rəqiblərimizə və düşmənlərimizə xəbərdarlıq etmək istəyirəm. Bunu etməyə ehtiyac yoxdur. Bunun Avropaya və bütün dünyaya faydası olmayacaq. Belarusa edilən hücum III Dünya Müharibəsinə səbəb ola bilər. Bunu unutmayın".
TAHİR
