Faiq Ələkbərli: "Ermənilərin əsassız "Musa dağ" iddiası onu bir daha sübut edir ki..."
Qondarma hadisələr quraşdırıb onu "tarixdə baş vermiş" kimi qələmə verməkdə heç bir xalq haylarla (ermənilərlə) yarışa girə bilməz. Bu birmənalı olaraq onların milli xəstəliyinə çevrilən bir göstəricidir. Saxtalaşdırmaq, tarixi təhrif etmək, "tarixi hadisə" düzəltmək kimi xəstəlikdən əziyyət çəkən bu toplum hələ etdiklərinin fərqinə varmaq istəmir.
Son dövrlər "Musa dağ soyqırımı" mifi ilə gündəmi məşğul etməyə çalışan haylar demə ki, Ermənistanda "Musa Dağ Qəhrəmanlıq Döyüşü Memorialı" da tikibmişlər. Hətta bu günlərdə Ermənistanda rəsmi səfərdə olan Fransanın Avropa və Xarici İşlər naziri Stefan Sejourneti də bu "abidəni" ziyarətə aparıblar.
Guya 1915-ci ilin sentyabrında 53 günlük "qəhrəmancasına müqavimətdən" sonra 4092 nəfər "Musa dağ" ermənisi admiral Dartagenin başçılığı altında fransız dənizçiləri tərəfindən xilas edilərək "soyqırımdan" xilas edilib. Bu barədə yazan Stefan Sejournet "biz erməni və fransız qəhrəmanlarını xatırlayırıq"-ifadəsini işlədib.
"Musa dağ"la bağlı araşdırma apardıq. "Vikipediya" açıq ensiklopediyasından qarşımıza rus və müasir Türkiyə türkcəsində yerləşdirilən saxtakarlıqlarla, uydurmalarla "zəngin" olan məqalələr çıxdı. Sözsüz ki, bu məqalələr erməni vikipediyaçılar tərəfindən müxtəlif dillərdə yaradılıb.
Musa dağın Türkiyə ərazisində yerləşdiyi məlumdur.
Erməni vikipediyaçıların yayımladığı məlumatda qeyd edilir ki, guya bu dağ "tarixi Kilikiya Ermənistanının kənarında, Aralıq dənizinin sahilində, Antakya şəhərindən (qədim Antioxiya) 21 km şimalda yerləşən sahilboyu Nur silsiləsinə aiddir".
Guya bu dağın ərazisində (zirvəsinin cənubunda və cənub-qərbində) ayrıca etnik adanı təmsil edən altı erməni kəndindən ibarət bir qrup olub.
1915-ci ilin iyulunda guya "erməni soyqırımı" zamanı bu kəndlərin sakinlərinin bir qismi zorla Antakya şəhərində cəmləşib. Qalanları isə guya Osmanlı hakimiyyətinin "deportasiya" əmrinə tabe olmayıb, Osmanlı qoşunlarının onlara yaxınlaşdığını görüb hamısı Yaqubyan və Movses Ter-Qalustyanın başçılığı ilə Musa dağın lap zirvəsinə qalxıblar. Guya dağ yamaclarını möhkəmləndirən ermənilər 53 gün ərzində türklərin "hücumlarına qarşı qəhrəmancasına mübarizə aparıblar". "Nəhayət, 3-cü Fransız eskadronuna daxil olan "Guichen" döyüş gəmisi dənizə baxan sıldırım dağın yamacında asılmış bayrağı görüb, eyni zamanda daha üç fransız və ingilis gəmisi bu bayrağı görüb. 3-cü eskadronun komandiri admiral Lui Dartige du Furnetin əmri ilə sursat və ləvazimatları demək olar ki, tükənmiş, sağ qalmış 4048 erməni xilas edilib. Musa dağ erməniləri Misirin Port Səid şəhərinə təxliyə edilib.
1918-ci ildə indiki Hatay vilayəti Fransanın nəzarətinə keçdikdən sonra altı erməni kəndinin sağ qalan sakinləri öz evlərinə qayıtdılar. Lakin 1939-cu il iyunun 29-da Fransa ilə Türkiyə arasında razılaşma ilə vilayət yenidən Türkiyəyə verildi.
Bundan az sonra, demək olar ki, bütün müsəllilər ölkəni tərk etmək qərarına gəldilər və Vakıflı kəndinin sakinlərinin yalnız bir hissəsi (təxminən 140 nəfər) qaldı. Hazırda Vakıflı (Vakif) Türkiyədə yeganə erməni kəndidir. Doğma kəndlərini tərk edən ermənilər Ter-Qalustyanın əsasını qoyduğu Livanın dağlarında yerləşən Əncar şəhərində məskunlaşıblar.Və bu günə qədər, demək olar ki, yalnız ermənilərin məskunlaşdığı bu şəhər altı məhəlləyə bölünüb, hər birinin əsasını Musa dağın altı kəndindən birindən olan insanlar qoyub"-bu uydurma məlumatlar rus dilində yayılan "Vikipediya" məqaləsində verilib.
Təsəvvür edin ki, ciddi tarixçilərin heç zaman yazmadığı, barəsində danışmadığı "Musa dağ" "əhvalatını" yalnız saxtakarlıqla məşğul olan erməni tarixçiləri yazıb, daha doğrusu, özlərindən quraşdırıblar.
Ermənilərin uydurduqları saxta "Musa dağ mübarizəsi" adamda yalınız gülüş doğurur. Belə bir hadisə olsaydı onu ciddi tarixçilər yazardı. Amma ermənilərin əli dəyməyən mənbələrdə bu barədə heç bir məlumat yoxdur. Qondarma erməni soyqırımı kimi "Musa dağ mübarizəsi" də yalandan, Türkiyəyə qarşı ərazi iddiasından başqa bir şey deyil. Elə qələmə verirlər ki, guya tarixən Musa dağ ətrafında 6 "yerli" erməni kəndi olub. Ermənilərin tərtib etdikləri bu uydurma məqalədən bəzi hissələri yazdıqları kimi verdik ki, oxuyanlar onların necə düzənbaz olduqlarını bir daha görsünlər. Bilsinlər ki, ermənilər həmişə özləri özlərini ifşa edirlər.
"Hay-fransız cütlüyü bu cür qondarma məsələlərlə özləri özlərini ifşa edirlər"
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun "Türk xalqlarının fəlsəfi fikir tarixi və müasir fəlsəfəsi" şöbəsinə müdiri, fəlsəfə doktoru, dosent, Faiq Ələkbərli "Bakı-Xəbər"ə bildirdi ki, "Musa dağ" məsələsi növbəti erməni saxtakarlığıdır. Ermənilərin bu cür saxta tarix düzəltməklə özlərini ifşa etdiyini deyən F.Ələkbərli qeyd etdi ki, uzun illərdir araşdırmaçı, tədqiqatçı kimi fəaliyyət göstərir, amma heç bir mənbədə bu barədə heç bir məlumata rast gəlməyib. "Sözün açığı, bu barədə heç bir məlumata rast gəlməmişəm. Ermənilərin əsassız "Musa dağ" iddiası onu bir daha sübut edir ki, bunlar tarixi saxtalaşdırmadan, miflər düzəltməkdən əl çəkmək niyyətində deyillər. Onlar Türkiyə ərazisindəki Musa dağdan danışırlar. Musa dağın da bunlarla nə əlaqəsi ola bilər ki? Onların bu cür əsassız iddialarını ifşa etmək, faktlarla cavablarını vermək lazımdır.
Osmanlının çöküşündən sonra fransızlar o ərazilərdə ağalıq etməyə çalışırdılar. Osmanlıya ermənilərin xəyanət etdiyi faktdır. Görünür, ermənilər Osmanlıya xəyanətlərini "qəhrəmanlıq", "erməni xalqının mübarizəsi" kimi qələmə vermək istəyirlər. Ermənilər heç zaman Osmanlı qoşunu ilə üz-üzə gəlməyə cəsarət etməzdilər. Çünki bu, toplum olaraq onlarda çatışmayan xüsusiyyətdir. Görünür, öz xislətlərinə uyğun şəkildə Osmanlıya xəyanət edən ermənilərə o vaxt fransızlar havadarlıq edirmiş. Yəni bu elə bir uydurma məsələdir ki, kökü olmadığı üçün adam geniş danışa bilmir. Birinci Dünya müharibəsi dövründə də, ondan sonra da ermənilər heç bir soyqırıma məruz qalmayıblar. Ermənilər öz havadarlarının dəstəyi ilə türk-müsəlman əhaliyə qarşı soyqırım cinayətləri törədiblər".
F.Ələkbərli bildirdi ki, ona görə də, ermənilər bu cür yalan və uydurmalarla heç nəyə nail ola bilməyəcəklər, bu hansısa bir nəticə verməyəcək.
"Bu, Türkiyəni, türk dünyasını qaralama kampaniyasından başqa bir şey deyil. Hər dəfə müxtəlif uydurmalarla türk dünyasını, xüsusilə də Türkiyəni qaralamağa çalışırlar. "Demək istədiyimiz odur ki, onların uydurmaları bəlli bir məqsədə xidmət edir. Niyə bunlar ermənilərin xəyanətkar əməllərindən, Osmanlıda terrorla məşğul olduqlarından, dinc türk-müsəlman əhaliyə qarşı törətdikləri qətllərdən, vəhşiliklərdən danışmırlar? Fransızlar o zaman xilas etdikləri terrorçular ola bilərdi. Terrorçuluğa haqq qazandırıb Osmanlını "soyqırım"da ittiham etmək erməni maraqlarına xidmətdən başqa vbir şey deyil. Bu səbəb də belə uydurmalarla heç nəyə nail ola bilməyəcəklər".
F.Ələkbərli qeyd etdi ki, Ermənistanda "Musa dağ" kompleksinin yaradılması da, qondarma erməni soyqırımı muzeyi kimi saxta məqsədlərə xidmət edir. "Ermənilər hər yeri bu cür saxta abidələrlə doldururlar. Elə bilirlər ki, öz qondarma iddialarına dünyanı inandıra bilərlər. Xeyr. Belə deyil. Bütün dünya onların necə toplum olduğunu bilir. Bilirsiz ki, Fransa və onun kimi bəzi dövlətlərin dəstəyi ilə ermənilər bu cür uydurmalarla çıxış edirlər. Bu qondarma abidə həm Fransanın, həm də Ermənistanın iç üzünü ifşa edir. Erməni terrorçularına fransızların hər zaman arxa-dayaq durduğu məlumdur. Fransalı nazirin o qondarma kompleksi ziyarət etməsi və saxtakarlığı dəstəkləməsi Fransanın mahiyyətini ortaya qoyur. Hay və fransız cütlüyü bu cür qondarma məsələlərlə özləri özlərini ifşa edirlər"-deyə F.Ələkbərli əlavə etdi.
İradə SARIYEVA
