Ermənistan hərbi cinayətkarların təhvil verilməsini istəyir
Ermənistan hakimiyyəti Azərbaycanı Bakıda bu ilin noyabrında keçriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29 tədbiri ilə şantaj etmək kampaniyasını intensivləşdirməkdədir.
Belə ki, Ermənistan Milli Assambleyasının "Mülki Müqavilə" hakim fraksiyasından olan deputat İrəvanla Bakı arasında sülh müqaviləsinin imzalanmasının dəqiq vaxtına dair suala mücərrəd bir cavab verib. "Mülki Müqavilə" fraksiyasının katibi Artur Ovannisyan parlamentdə keçirdiyi brifinqdə Fransanın Avropa və Xarici İşlər naziri Stefan Sejournetin COP29-dan əvvəl Azərbaycanın sülhü səmimiyyətlə istədiyini nümayiş etdirməli olduğu barədə bəyanatını şərh edərkən deyib ki, fransalı nazir çıxışında yuxarıda qeyd olunan iqlim sammitindən əvvəl sülh sazişinin imzalanacağına ümid etdiyini bildirib.
Ovannisyan jurnalistin bu müddətin nə dərəcədə real olduğu, bu istiqamətdə kifayət qədər beynəlxalq təzyiqin olub-olmaması, o cümlədən Azərbaycanda saxlanılan erməni əsir və girovların qaytarılması məsələsi ilə bağlı sualını cavablandırarkən deyib ki, hələ bu suala dəqiq cavabı yoxdur, bu barədə hər hansı bir yenilik olsa, ictimaiyyətə bu barədə məlumat veriləcək.
Məlum olduğu kimi, erməni mediasında bu sual heçdən yaranmır. Bundan əvvəl də Ermənistanın hakim dairələrindən erməni mediasına məlumat sızdırılırdı ki, Paşinyan iqtidarı Bakıda keçiriləcək COP-29 beynəlxalq tədbirində o şərtlə iştirak edə bilər ki, həmin tarixədək Azərbaycanla Ermənistan arasında sülh müqaviləsi imzalanmış olsun. Lakin hadisələrin inkişafı - sülh müqaviləsinin qarşılıqlı tələblər aspektindən detalları aydınlaşanda bəlli oldu ki, bu müqaviləni tezliklə bağlamaq mümkün deyil. Çünki Ermənistan hakimiyyəti ən azı başa düşür ki, Azərbaycan tərəfi problemin hansısa detalını gələcək nəsillərə buraxmaq istəmir, onu birdəfəlik həll etmək istəyir. Bu baxımdan Ermənistanın konstitusiyasına dəyişiklik tələbi yerinə yetirilməyənədək Azərbaycanın sülh müqaviləsinə imza atmayacağına rəsmi İrəvan əmindir. Bu proses isə COP29-a qədər baş tuta bilməyəcək. Ona gorə də Ermənistan hakimiyyəti bu tədbirdə iştirak etmək üçün öz tələblərinə müəyyən korrektələr edib, tələbləri guya bir qədər yumşaldıb. Belə ki, Ermənistan hakimiyyəti və fransız nazir "Azərbaycan sülh istəyinə səmimiyyətini nümayiş etdirməlidir" dedikdə, Qarabağda mövcud olmuş separatçı rejimin həbsdə olan vəzifəliləri və Azərbaycan xalqına qarşi hərbi cinayətlər törətmiş şəxslərin Ermənistana təhvil verilməsini nəzərdə tutur. Lakin Ermənistan, Fransa və bütün dünya açıq şəkildə anlamalıdır ki, bu məxluqlar dinc və mülki Azərbaycan əhalisinə (uşaq, qadın, qoca) divan tutub, insanlıq tarixinin ən qəddar işgəncələrini verib. Bu cinayətlər canlı şahidlər, foto və videolarla, rəsmi mediada etiraf çıxısları ilə, rəsmi qərarlarla və sair rengarəng sübutlarla təsdiqini tapib. Hələ bu qəbildən olan Ermənistan vətəndaşlarının əksəriyyəti azadlıqdadır. "Beynəlxalq ədalət" deyilən bir şey mövcuddursa, məsələn, Seyran Ohanyan və digərləri parlamentdə və başqa rəhbər vəzifələrdə deyil, ən azı barmaqlıqlar arxasında oturmalıdır. Azərbaycan hökuməti öz vətəndaşlarının mənafeini nəinki COP29-a, heç bir beynəlxalq tədbirə və ya beynəlxalq qurumun mənafeyinə qurban verməyəcək. Ona görə də yuxarıda qeyd edilən cinayətkarlar mütləq Azərbaycanda mühakimə edilməli və burada da cəzalarını çəkməlidirlər.
Azərbaycan hökuməti müharibədən sonra birtərəfli qaydada bütün əsirləri təhvil verib. Baxmayaraq ki, Ermənistan birinci Qarabağ müharibəsində əsir düşmüş 3 minə yaxın azərbaycanlının taleyi barədə məlumat verməkdən imtina edir, işğaldan azad edilmiş ərazilərin dürüst xəritəsini Azərbaycana təqdim etmir.
Akif NƏSİRLİ
