Təbriz Musayev: "Qərbin yeni "5-ci kolon" yaratmaq cəhdləri fiaskoya məhkumdur"
Artıq sirr deyil ki, Azərbaycanı, həyata keçirdiyi müstəqil xarici siyasəti üzündən "cəzalandırmaq" səyləri Qərbdə müəyyən dairələr tərəfindən davam etdirilir. Səbəb də odur ki, bu gün Azərbaycan Cənubi Qafqazda belə siyasət aparan və onu ardıcıl olaraq müdafiə edən yeganə dövlətdir. Məhz bu səbəbdən Avropa Şurası Parlament Assambleyasından (AŞPA) ölkəmizə qarşı bir təzyiq aləti kimi istifadə edilir.
O da məlumdur ki, Qərbin Azərbaycanda "5-ci kolon"u sıradan çıxıb və onlar yeni simalar axtarışındadır. Bəllidir ki, postsovet məkanında "məxməri inqilabları" məhz Qərbin "5-ci kolon"u həyata keçirirdi. Son dəfə Ermənistanda buna nail oldular. Azərbaycanda Qərbin "5-ci kolon"u sıradan çıxıb. O səbəbdən də yeni dayaqlar axtarılır. Qərbin "5-ci kolon"u o dərəcədə möhkəm deyil. Çünki son illərdə Avropa dəyərlərində, xüsusən liberal dəyərlərdə ciddi böhran yaşanmaqdadır. Qərb liberallarının uzaqmənzilli hədəfləri öz cəmiyyətlərinə xas həyat tərzlərini, qeyri-ənənəvi hərəkatları üçüncü ölkələrə də ixrac etməkdir. Məsələn, feminizm hərəkatı, heyvanların haqları uğrunda aksiyalar, azad gənclik adı ilə ölkələrin köklü mental dəyərlərini silkələmək, ailə institutlarını böhran vəziyyətinə salmaq, həmcinslərin evliliyinə normal yanaşmaq və sair Avropa və ABŞ liberallarının "5-ci kolonu" tərəfindən reallaşdırılan layihələrdir. Bunun üçün müxtəlif fondlar, dairələr uzun illər qrantlar ayırır, təbliğat aparılır. Lakin ölkəmizdə bunların qarşısı uğurla alınır. Elə o səbəbdən Qərb dairələri yenə müxtəlif vasitələrlə ölkəmizdə ara qarışdırmaq üçün fürsətlər axtarırlar.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayev hesab edir ki, Qərbin Azərbaycanda yeni "5-ci kolon" yaratmaq cəhdləri fiaskoya məhkumdur: "Ən azından ona görə ki, ötən dövdə onların iç üzü tam ortaya çıxıb. Bəli, 90-cı illərdə Avropa qurumlarından gözləntilər böyük idi. Hesab edirdik ki, Qərb təsisatları 1 milyon qaçqın və məcburi köçkünlərimizin pozulan hüquqlarını, ərazilərimizin işğaldan azad edilməsini gündəmə gətirəcək. Bununla bağlı bizə kömək edəcək. Ancaq zamanla biz bunun tam əksini gördük. Nəinki sadalanan məsələləri gündəmə gətirdilər, bunun tam əksinə olaraq Azərbaycanı işğalla barışmağa məcbur etməyə çalışdılar. Bununla bağlı müxtəlif layihələri həyata keçirməyə cəhd göstərdilər. Təsadüfi deyil ki, müxtəlif QHT-lərin timsalında Qərbin maliyyə dəstəyi ilə həyata keçirilən layihələrdə işğal amili yaxın belə buraxılmırdı. Qarabağın adını belə çəkməyə qoymurdular. Hesab edirdilər ki, zamanla Azərbaycan bununla barışacaq. 2014-cü ildən Azərbaycan Qərb təsisatlarının QHT-ləri maliyyələşdirməsini qadağan etdi. Üstəlik, Azərbaycan xalqının həmrəyliyi, dövlətimizin sayıqlığı sayəsində ölkəmizdə rəngli inqilab layihələri fiaskoya uğradı. Halbuki, bunun bəzi postsovet ölkələrində hansı fəsadlar törətdiyini yaxşı bilirik. Daha sonra Azərbaycan öz gücü hesabına işğala son qoydu. Bunu Qərb gözləmirdi. Ona görə də neçə müddətdir Azərbaycana qarşı qaralama kampaniyası aparılır. Bir sıra QHT və partiyaların timsalında "5-ci kolon"un planları uğursuzluğa düçar olunduğu üçün indi yenisi yaradılır. Məqsəd köhnə panları həyata keçirməkdir, amma alınmayacaq".
Vidadi ORDAHALLI
