Azər Həsrət: "Belə olan şəraitdə Azərbaycan Avropa Şurası ilə bağlı daha fərqli addımlar ata bilər"
Avropa Şurası Parlament Assambleyasının payız sessiyasının gündəliyinə Azərbaycanda insan hüquqlarının vəziyyəti məsələsinin salındığı bildirilir. Sessiyanın ilk günü, sentyabrın 30-dakı gündəliyə "Azərbaycanda insan hüquqları, qanunun aliliyi və demokratiya ilə bağlı vəziyyətin pisləşməsi" təcili prosedur debatı daxil edilib.
Əgər gündəlik təsdiqlənsə, oktyabrın 3-də mövzu üzrə müzakirələr başlayacaq: "Müzakirələrin yekunlarına görə Avropa Şurası Nazirlər Komitəsinin təşkilat qarşısında öhdəliklərini yerinə yetirməməsinə görə Azərbaycana qarşı görüləcək tədbirlər haqqında tövsiyələri qəbul ediləcək".
Göründüyü kimi, AŞPA bu ilin yanvarında Azərbaycanın nümayəndə heyətinin səlahiyyətlərinin dayandırılması aybını düzəltmək əvəzinə, yeni təxribatlara rəvac verir. Bütün bunlarla təbii ki, Azərbaycan barışmayacaq. Bu gedişlə Azərbaycan Avropa Şurasını tərk etməli olacaq. Ona görə ki, ard-arda ədalətsiz qərarlar başqa çıxış yolu qoymur.
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, Azərbaycanın iştirakı olmadan belə müzakirənin aparılması doğru və ədalətli deyil: "Çünki orada kimlərsə çıxış edəcək, Azərbaycanla bağlı tənqidi fikirlər səsləndirəcək. Nəticədə o fikirlərə cavab verəcək kimsə olmayacaq. Yəni konkret olaraq Azərbaycanı təmsil edərək o tədbirdə qaldırılan suallara cavab verəcək kimsə olmayacaq. Ola bilsin ki, qardaş Türkiyənin və başqa ölkələrin nümayəndələri bununla bağlı fikirlərini səsləndirsinlər. Ancaq məsələ ondadır ki, burada konkret tərəf Azərbaycandır. Həmçinin müzakirə Azərbaycan üzərində qurulur. Belə olan təqdirdə isə, Azərbaycanın cavab haqqı mütləq tanınmalıdır. Yəni ölkəmizin orada iştirak edib sözünü deməsinə şərait yaradılmalıdır. Bu da Azərbaycan nümayəndə heyətinin AŞPA-da mandatının təmin edilməsi ilə mümkündür. Məsələ ondadır ki, AŞPA bu ilin yanvarında Azərbaycanın mandatını təsdiq etməyib. Yəni bir növ bizi oyundan çıxarıb sonra barəmizdə müzakirələr açırlar. Bu, tamamilə ədalətsizlikdir. Əlbəttə ki, belə olan şəraitdə Azərbaycan Avropa Şurası ilə bağlı daha fərqli addımlar ata bilər. Ən azından bu barədə düşünə bilər. Üstəlik, düşünməyə də haqqı çatacaq. Hətta qurumu tərk etməklə bağlı addım atıla bilər. Ona görə də AŞPA-dakı ağıllılar bir qədər düşünməlidirlər. Ya ölkəmizlə bağlı müzakirəni ümumiyyətlə gündəlikdən çıxarmalıdırlar, ya da buna qədər nümayəndə heyətimizin mandatını təsdiqləməlidirlər. Ona görə ki, bizim nümayəndələr ora gedib qaldırılan məsələlərə cavab verə bilsinər. Yəni bunun başqa yolu yoxdur. Yoxsa təktərəfli oynamaq, bir qapıya oyun qurmaq bütün bunlar Avropa Şurasına yaraşan hərəkətlər deyil. Biz ora üzv olanda böyük ümidlərlə Avropa ailəsinə qoşulmuşduq. Yəni insan haqları, demokratiya, ədalət, inkişaf və s. məsələlər haqqında düşünürdük. Ancaq bizə qarşı daim ədalətsizliyin şahidi olduq. Sonuncu ədalətsizlik də bu müzakirənin özüdür".
Vidadi ORDAHALLI
