"Azərbaycan Ermənistanın işğal olunmuş ərazilərini tərk etmək fikrində deyil və sülh müqaviləsinin imzalanmasının təxirə salınması ilə bağlı yeni tələblər irəli sürür", - bunu ABŞ Senatının Xarici Əlaqələr Komitəsinin sədri Ben Kardin deyib.
"Azərbaycanın Ermənistan Konstitusiyasının dəyişdirilməsi tələbində israrlı olması Azərbaycanın sülh sazişini təxirə salmaq və ya ləğv etmək istəyindən xəbər verir"- deyən Senator Azərbaycanı erməni torpaqlarını işğalda saxlamaqda suçlayır və Azərbaycanın erməni Konstitusiyasını dəyişdirmək şərtini pisləyib ki, guya Azərbaycan bununla sülh prosesini gecikdirir.
Azərbaycana qarşı qərəzli mövqeyi ilə seçilən, erməni lobbisindən yemlənən qüvvələr sanki onlara verilən aylıq tapşırıq planlarını yerinə yetirir. Onlardan biri də anti-Azərbaycan mövqei ilə seçilən, Ermənistanla Azərbaycan arasında sülh sazişinin imzalanması, sərhədlərin delimitasiyası prosesinin getdiyi ərəfədə Azərbaycanofobiya və separatizmi dəstəkləyən bəyanatlarının sayını artıran Ben Kardindir. Bu sırada Qərbdə anti-Azərbaycan qüvvələrin güclü dəstək verdiyi qondarma qurumlar da var.
Ermənilərin, yoxsa Amerika xalqinin senatoru vəzifəsində çalışdığı bəlli olmayan Ben Kardin hər ay mütəmadi olaraq oxşar bəyanatlar verir. Demək olar ki, hər an Azərbaycanin ev sahibliyi edəcəyi COP29 tədbirini qaralamaqla məşğuldur. Rəsmən ABŞ Senatının Xarici Əlaqələr Komitəsinin sədri olan Ben Kardin əslində ABŞ dövlətinin sərgilədiyi rəsmi mövqeyin əksinə çıxır. Çünki ABŞ hökuməti öz ölkəsini sulh danışıqlarının platformasi kimi təklif edəndə təkrar bəyan etdi ki, Azərbaycanın ərazi bötövlüyünü tanıyır və Ermənistanla sərhədlərin delimitasiya-demarkasiya prosesi iki ölkənin müəyyənləşdirəcəyi məsələdir. Lakin Ben Kardin bu cür təhrikedici-təxribatçı bəyanatları ilə heç Ermənistan dövlətinin də deyil, ona müxalif olan separatçı-müxalif qüvvələrin yanında özünə yer alır.
İndiyə qədər Ermənistan hökuməti ərazisinin işğalı barədə fikir səsləndirmədiyi halda, Ben Kardin "Papadan daha artıq xristian olduğunu" nümayiş etdirməklə deyir ki, Azərbaycan Ermənistanın ərazisini işğal edib.
Qeyd edək ki, Azərbaycan və Ermənistan arasında sülh danışıqları gedir və bu iki ölkə arasında faktiki olaraq real şərhəd yoxdur. Burada qoşunların təmas xəttı şərti sərhəd hesab edilir. Bu şərti sərhədin dəqiqləşdirilməsindən sonra müəyyən edilə bilər ki, kim kimin ərazisini işğal edib. Lakin Ben Kardin bu cür bəyanatlar verməklə bu iki ölkə arasında yaranmış həssas atəşkəs rejimini və sülh danışıqlarını pozmağa xidmət edir. Əslində bu onun birbaşa xidməti deyil, erməni lobbisindən aldığı milyonların qarşılığinda yerinə yetirdiyi tapşırıqdır. Erməni lobbisinin bu bəyanatı sifariş etməkdə məqsədi heç də birbaşa Azərbaycanı qaralamaq deyil. Onların əsas məqsədi hazirki müxalifətin dirçəldilməsi, söz verdikləri kimi payızda Paşinyanla qəti və həlledici döyüşə hazırlamaqdir. Ben Kardinin dili ilə erməni lobbisi mübarizə üçün erməni müxalifətinə "əsaslar" yaradir - görürsünüzmü, hətta amerikalı senator deyir ki, Azərbaycan Ermənistanin ərazisini işğal edib. Amma Paşinyan bunu dilə gətirmir!
O ki qaldı Ben Kardinin səsləndirdiyi Ermənistan konstitusiyasına, bu sənəddə açıq-aşkar Azərbaycanın BMT tərəfindən tanınmış sərhədləri daxilində olan torpaqlara iddia var ki, Dağlıq Qarabağ Ermənistana birləşdirilməlidir. 90-ci illərin "Miatsum" (ermənicə "birləşmək" - red.) şüari yəqin ki, çoxlarınin yadındadir. Həmin hərəkat nəticəsində qəbul edilən müstəqillik bəyannaməsində məhz bu fikir özünə yer alır. Ermənistan konstitusiyasının preambulasında isə müstəqillik bəyannamasinə istinad edilir. Azərbaycan, konstitusiyasında onun torpaqlarına iddia yer alan dövlətlə - Ermənistanla necə sülh müqaviləsi bağlaya bilər?
Akif NƏSİRLİ
