Azər Həsrət: "Qarşı tərəfin qərəzli olduğunu deməyə yetərincə əsasımız var"
Məlum olduğu kimi, Prezident İlham Əliyev Azərbaycan-Türkiyə parlamentlərarası dostluq qrupunun rəhbəri Şamil Ayrımın başçılıq etdiyi Türkiyə Böyük Millət Məclisinin üzvlərindən ibarət nümayəndə heyətini qəbul edib. Görüşdə dövlət başçısı bir sıra məsələlərə toxunub.
Prezident Əliyev nümayəndə heyətini qəbul edərkən regional vəziyyətə toxunub. Bir sıra Qərb təsisatlarında anti-Azərbaycan qüvvələrin ölkəmizə qarşı haqsız və ədalətsiz münasibətinə toxunan dövlət başçısı vurğulayıb ki, Avropa Şurası Parlament Assambleyasında bizim əleyhimizə olan mövqe bilavasitə öz ərazi bütövlüyümüzü və suverenliyimizi təmin etməyimizlə əlaqədardır.
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, AŞPA-dakı o davranış təbii əlavə suallar doğurmaya bilməz: "O sualları da biz Azərbaycan tərəfi olaraq bütün görüşlərdə, müzakirələrdə dilə gətiririk. Əksər beynəlxalq platformalarda bu məsələ ölkəmiz tərəfindən gündəmə gətirilir. Ancaq reallıq odur ki, Avropada Azərbaycanın öz suverenliyini və ərazi bütövlüyünü təmin etməsini həzm edə bilməyən dairələr var. Onlar işğalın uzanmasında maraqlı idilər. Azərbaycan öz gücü ilə bu status-kvonu darmadağın etdiyi üçün çox məyusdurlar. O üzdən, ölkəmizə qarşı aqressiv mövqe sərgiləyirlər. Təbii ki, Azərbaycan olaraq qüsurlarımız var və heç də hər şey mükəmməl deyil. Ancaq Avropada bir qrup fransızsevər parlamentarinin qalxıb üzərimizə belə səlib yürüşü təşkil etməsi də sual doğurmaya bilməz. Deməyim odur ki, problemlərimiz varsa, onları elə məhz AŞPA-da müzakirə edə bilərik və nəticələr də hasil ola bilər. Ancaq bunlar nə edirlər? Bunlar səfərbər olunaraq Azərbaycanı o platformadan məhrum ediblər. Ona görə də qarşı tərəfin qərəzli olduğunu deməyə yetərincə əsasımız var. Ona görə də Azərbaycan Prezidenti belə görüşlərdə bu məsələni dilə gətirir. O cümlədən, qardaş Türkiyə də bizimlə bərabər bu məsələlərin üzərinə gedir. Yəni cənab Prezident o baxımdan növbəti dəfə bu məsələyə qayıtmağı lüzum görüb. Ümumiyyətlə isə, düşünürəm ki, bizə cəbhə açanlara qarşı duruş gətirə biləcək şəkildə özümüz səfərbər olunmalıyıq. Bizim AŞPA-da təmsil olunan nümayəndə heyətimiz daha aktiv ola bilərdi. Onlar daha verimli işlər görə bilərdilər. Ancaq təəssüflər olsun ki, bunu bacarmayıblar. Başqa bir tərəfdən müxtəlif kateqoriyalardan olan insanlarımız da beynəlxalq platformalarda daha aktiv ola bilərdilər. Ancaq yetərincə aktiv olmayıblar. Deməyim odur ki, bizə qarşı olanlar varsa, onlara cavab verəcək adamlarımız da fəal olmalıdırlar. Bax avropalıları, qərbliləri tənqid edərkən bu amili də unutmamalıyıq. Onlar təbii ki, bizə qarşı gələcəklər. Bundan sonra da gələcəklər. Ona görə də onlara cavab verəcək adamlar olmalıdır".
Vidadi ORDAHALLI
