Qasım Hacıyev: "Zaxarova da etiraf etməli idi ki, Njde kimi Hitler qullarının abidəsinin Azərbaycan topağında olması elə həqiqi Sovet İttifaqı Qəhrəmanlarının ruhuna təhqir idi"
Ermənistan tərəfi uzun müddətdir ki, Qarabağda guya İkinci Dünya müharibəsi iştirakçılarına aid abidələrin dağıdılması barədə iddialar irəli sürür.
Maraqlıdır ki, uzun illərdir faşist ideologiyasının quluna çevrilən ermənilər və Ermənistan indi İkinci Dünya müharibəsi iştirakçılarının və bu münasibətlə qoyulan abidələrin təəssübkeşi kimi özünü qələmə verir. Halbuki, Ermənistanın özündə bu tip abidələrə qarşı kəskin nifrət hissi var, onlar kütləvi şəkildə götürülür, əvəzində daşnaklara abidələr qoyulur. Özü bu yolu tutan dövlət ölkəmizi İkinci Dünya müharibəsinə aid abidələri dağıtmaqda ittiham edir.
Ermənilər artıq bu uydurma məsələyə Rusiya rəsmilərinin də diqqətini cəlb etməyə çalışırlar.
Avqustun 28-də Rusiya Xarici İşlər Nazirliyinin rəsmi nümayəndəsi Mariya Zaxarovaya erməni jurnalist "Qarabağda erməni əsilli sovet ittifaqı qəhrəmanlarının abidələrinin azərbaycanlılar tərəfindən dağıdılması" ilə bağlı təxribatçı sual ünvanlayıb. Erməni mediasına görə, Zaxarova da öz növbəsində Qarabağda "erməni əsilli sovet ittifaqı qəhrəmanlarının abidələrinin dağıdılması məsələsini" şərh edib.
"Biz zəng etdik və təsdiq etdik ki, Böyük Vətən müharibəsinin mədəni-tarixi irsinin qorunub saxlanması mövzusunun Ermənistan-Azərbaycan münasibətlərinin normallaşması ilə bağlı danışıqların gündəliyinə daxil edilməsi üçün hər iki tərəflə bu işi davam etdirəcəyik"-deyə Zaxarova bildirib.
O vurğulayıb ki, həm Bakı, həm də İrəvanla işgüzar əlaqələrində bu mövzu müntəzəm olaraq müzakirə olunur. "Biz hər yerdə və hər dəfə bu mövzuya toxunduqda sovet əsgərlərinin abidələrinin dağıdılmasının yolverilməzliyi ilə bağlı prinsipial mövqeyimizi bildirdik. Bakıda Böyük Vətən müharibəsinin tarixi yaddaşını qorumağın ölkələrimizin müqəddəs borcu olduğunu anlayır və bölüşürlər"-deyə Zaxarova əlavə edib.
Əvvəla, Azərbaycanda heç bir Böyük Vətən müharibəsi abidəsi dağıdılmır, dağıdılmayıb da. Digər tərəfdən də, ermənilər bizim torpaqlarımızı işğalda saxladıqları dövrdə orada Qaregin Njde kimilərinə abidə qoymuşdular, özü də lap Xankəndinin mərkəzində. Faşist əlaltısının abidəsi Azərbaycan torpağında niyə olmalıdır ki? Xankəndidə faşist Njdenin abidəsi sökülüb və bunu Rusiya tərəfi də çox yaxşı bilir. İndi ermənilər istəyirlər ki, belə təxribatçı iddialarla Zaxarovanı da Njdenin və onun kimi nasistlərin, daşnakların müdafiəsinə yönəltsinlər.
"Halbuki, ermənilərin özləri İkinci Dünya müharibəsinə aid abidələrə qənim kəsiliblər, bunu Rusiya da bilir"
AMEA-nın Qafqazşünaslıq institutunun Qafqaz Tarixi şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, 200 ilə yaxındır ermənilər saxtakarlıqla məşğuldur. Q.Hacıyev bildirdi ki, Ermənistanın bu məsələni ortaya atması təsadüfi deyil, çünki Azərbaycan və Rusiya arasındakı münasibətlər bu ölkəni çox narahat edir: " Rusiya və Azərbaycan arasında münasibətlərin hazırkı vəziyyəti erməniləri əndişəyə salıb. Onlar bu cür təxribatçı fikirləri ortaya atmaqla bu münasibətləri zədələməyə çalışırlar. Rusiyalı rəsmilər erməni uydurmalarına rəvac verməməli, onların Azərbaycanı qaralamasına şərait yaratmamalıdır"-deyə Q.Hacıyev bildirdi.
Çar Rusiyanın imperiya maraqlarını təmin etməsi məqsədilə erməniləri gətirib Azərbaycan ərazilərində yerləşdirdiyini deyən Q.Hacıyevin sözlərinə görə, indi onlar Qafqazın baş bəlasına çevrilib. "Məsələ burasındadır ki, erməniləri Çar Rusiyası gətirib Qafqaza çıxarıb. Onlara bizim torpaqlarda dövlət qurublar. Ümumiyyətlə, Rusiya zaman-zaman imperiya siyasətini davam etdirmək üçün ermənilərdən istifadə edib. Təsəvvür edin ki, bu gün Ermənistan Rusiyanın əlindən çıxır deyə, bu ölkənin rəsmiləri müəyyən vaxtlarda erməniləri yenə də müdafiə edirlər. Bu, Zaxarovanın açıqlamasında da özünü göstərir. Bunu başa düşmək olmur. Zaxarova bilmirmi ki, ermənilərin iddiası yalandır və bu barədə danışmağa dəyməz? O bizimlə necə danışmağa çalışır? Azərbaycan öz torpaqlarını işğaldan azad edib. Biz öz torpağımızda nasist Njdenin abidəsini niyə saxlamalıyıq ki? Zaxarova da etiraf etməli idi ki, Njde kimi Hitler qullarının abidəsinin Azərbaycan torpağında olması elə həqiqi Sovet İttifaqı Qəhrəmanlarının ruhuna təhqir idi. Bunu Rusiya da yaxşı bilir. Bir Njdeyə, bir Şaumyana görə Azərbaycana qarşı uydurma iddia irəli sürmək heç Rusiyanın da maraqlarına uyğun olmamalıdır. Amma bəzi rus məmurları niyə köhnə imperiya siyasətindən əl çəkmək istəmirlər? Təsəvvür edin ki, ermənilərin bütün yalanlarına bəzi Rusiya rəsmiləri şərait yaradır. Niyə? Hesab edirəm ki, Zaxarova erməni jurnalistə bu cür cəfəng iddialar irəli sürməyə imkan verməməli idi. Çünki bu, əsassız bir məsələdir. Qarabağda erməni abidəsi yoxdur, orada onların mədəni-tarixi irsi olmayıb. Azərbaycanda İkinci Dünya müharibəsinə aid abidələrin hamısı qorunub saxlanılır. Görək Ermənistanda belə abidələr varmı? Təbii ki, o abidələri çoxdan söküb atıblar. Zaxarova gərək erməni jurnalistin sualına sualla cavab verəydi ki, Qərbi Azərbaycanda və Qarabağda Azərbaycan xalqının tarixi-mədəni irsini niyə dağıtdınız. Ermənistanda niyə bir Azərbaycan abidəsi qalmayıb? Ermənistanda azərbaycanlıların məzarlıqları dağıdılıb, bütün abidələrimiz məhv edilib, amma bir nəfər səsini qaldırmayıb. İndi durub uydurma suallara cavab axtarırlar. Bu ermənilər nə qədər yalan danışır? Gah deyirlər ermənilərin qəbirləri dağıdılıb, gah deyirlər kilsəyə ziyan vurulub, gah da başqa şeylər deyirlər. Deyək ki, Fransa, başqa Avropa dövlətləri, ABŞ bizdən uzaqdır, onlar bu yalanların toruna düşə bilirlər, amma Rusiya bizə yaxındır, bölgəyə bələddir, onlar nə üçün bu yalanlara göz yumurlar? Anlaya bilmirəm. Rusiya ilə indi yaxşı münasibətlərimiz var, əməkdaşlıq müqavilələri bağlanılıb. Bəzi Rusiya rəsmilərinin görəsən dövlət siyasətindən xəbərləri yoxdur ki, durub ermənilərə züy tuturlar, ya saymamazlıqdır? Ermənilər Azərbaycanın 7 rayonunun bütün tarixi abidələrini, sakinlərimizin ev-eşiklərini, var-dövlətlərini dağıdıb məhv etdilər. Onda niyə bəzi Rusiya rəsmiləri buna münasibət bildirmədilər? Zaxarova özünü elə aparır ki, guya ermənilərin bizim başımıza gətirdiyi bəlalardan xəbəri yoxdur, indi durub Qarabağda erməni Sovet qəhrəmanlarının abidəsinin dərdini çəkir. Bəs Azərbaycana aid abidələri ermənilər məhv edəndə niyə danışmadılar? Bir dəfə qeyd etdilərmi ki, ermənilər azərbaycanlılara bu qədər zülm edib?"
Q.Hacıyev əlavə etdi ki, ermənilərin hansısa abidələrinin məsələsinin danışıqlar prosesinə salınması yolverilməzdir və bu məsələnin müzakirəsi yersizdir. O qeyd etdi ki, çünki Azərbaycanda ermənilərə aid abidə yoxdur, olmayıb da. Q.Hacıyev bildirdi ki, ermənilər Rusiyanın diqqətini cəlb etmək üçün qəsdən İkinci Dünya müharibəsi abidələrindən yapışırlar: "Ermənilər bu qondarma abidə iddiasını qəsdən ortaya atırlar, çünki bilirlər ki, Rusiya belə məsələlərə həssas yanaşır. Halbuki, ermənilərin özləri İkinci Dünya müharibəsinə aid abidələrə qənim kəsiliblər, bunu Rusiya da bilir. Məsələ burasındadır ki, ermənilər özləri özlərini aldadırlar"-deyə Q.Hacıyev qeyd etdi.
Q.Hacıyev bildirdi ki, tarixi abidələrin qorunması məsələsinə gəlincə, ermənilər Azərbaycan abidələrini qorumayıb, onları məhv edib.
İradə SARIYEVA
