Azər Həsrət: "Seçki kampaniyası başlayanda çağırış etmək istəyirdim ki, deputatlığa namizədlər şəhid ailələrini narahat etməsinlər"
1 sentyabr növbədənkənar parlament seçkilərində iştirak edən namizədlərin bir neçə gündür ki, təbliğat-təşviqat kampaniyasına şahidlik edirik. Tez-tez sosial şəbəkələrdə, internet resurslarında onların seçicilərlə görüşünü əks etdirən fotolara, videoçarxlara baxırıq. Yenə də qarşımıza ənənəvi səhnələr çıxır.
Söhbət o ənənəvi səhnələrdən gedir ki, bir qrup deputatlığa namizəd olan şəxslər şəhid ailələrinə, qazilərə baş çəkir, onlarla görüşür, seçki təbliğatlarına bu qəbildən olan ailələri cəlb edirlər. Onlar bu sahədə sanki yarışa çıxıblar. Əvvəlki parlament seçkiləri zamanı da analoji halların şahidi olmuşuq, hansısa deputatlığa namizəd olan şəxs bu üsuldan istifadə edib, deputat seçildikdən sonra isə şəhid ailələrini, qaziləri unudublar.
Bir sözlə, bəzi deputatlığa namizədlər şəhid ailələrini, Milli Qəhrəman ailələrini, qaziləri əldən salıblar, onları da öz kampaniyalarına cəlb edirlər, onların ailələrinə gedib özlərini reklam edirlər. Yəni şəhid ailələrindən sui-istifadəçilik hallarına yol verilir.
"Bu bir ay ərzində şəhid ailələri yadınıza düşür?"
Məsələyə şərh verən siyasi şərhçi Azər Həsrət "Bakı-Xəbər"ə "Əslinə qalsa, seçki kampaniyası başlayanda bir çağırış etmək istəyirdim ki, deputatlığa namizədlər şəhid ailələrini narahat etməsinlər. Şəxsən özüm də bu seçkidə deputatlığa namizədliyimi irəli sürməyi düşünürdüm, planım vardı. Namizəd olacağım təqdirdə nəzərdə tutmuşdum ki, nə şəhid məzarlarını ziyarət edim, nə də ki, şəhid ailələrini narahat edim. Yəni seçki kampaniyasında onların heç bir iştirakını nəzərdə tutmurdum. Niyə? Çünki yəni bu bir ay ərzində şəhid ailələri yadınıza düşür? Onların qapılarına gedənsinizsə, dərdlərinə həmdəm olmaq istəyirsiznizə, onu deputatlığa namizəd olmazdan əvvəl də, deputat olduqdan sonra da etməlisiniz. Yəni onları bu mərhələdə niyə narahat edəsiniz? Bu bir az sui-istifadə məsələsidir. 2020-ci ilin fevralında keçirilmiş parlament seçkilərində buna bənzər bir hal yaşanmışdı. Xatırlayırsınızsa, deputatlığa namizədlər çox yaşlı nənələr tapıb gedib onların əllərini öpürdülər, bununla da özlərini reklam edirdilər"-deyə bildirdi.
A.Həsrətin sözlərinə görə, əlbəttə, belə şeylər uyğun deyil, şəhid ailələrini narahat etmək, kampaniyaya alət etmək olmaz. "Şəxsən mən bunu özümə sığışdırmazdım, bundan nəinki sui-istifadə edərdim, ümumiyyətlə istifadə etməzdim. Hətta şəhid ailələri gəlib mənə desəydilər ki, biz sənin kampaniyanda yardımçı olmaq istəyirik, mən onlara nəzakətli bir şəkildə deyərdim ki, siz bizə edəcəyinizi zatən artıqlaması ilə etmisiniz, indi evinizdə rahat-rahat oturun, bizim sizə xidmət etmə zamanımızdır. Yəni bu mənim düşüncəmdi. Yenə də deyirəm, şəhid ailələrindən bu cür siyasi kampaniyalarda sui-istifadə doğru bir şey deyil"-deyə A.Həsrət qeyd etdi.
İradə SARIYEVA
