Tofiq Abbasov: "Bu məqamlar aradan qalxmasa, onlar tək Azərbaycan və Türkiyəyə qarşı yox, bütün dünya birliyinə qarşı olacaqlar"
Ermənistanda konstitusiya referendumunun 2027-ci ildə keçirilməsi planlaşdırılır. Bu barədə jurnalistlərə Ermənistanın ədliyyə naziri Qriqor Minasyan bildirib. Müddətlər ilkin olaraq konstitusiya islahatı komissiyasının işçi müzakirələri zamanı müəyyən edilib.
Nazir qeyd edib ki, kompleks sənəd üzərində ətraflı iş görülməlidir və ictimai müzakirələr aparılacaq. Onun sözlərinə görə, əvvəlcə mövcud konstitusiyaya dəyişikliklərin edilməsi, yoxsa yeni əsas qanunun qəbul edilməsi ilə bağlı mübahisələr olub və sonda ikinci varianta gəliblər.
"Müzakirə etdik və konsensusa gəldik - bizə konstitusiya dəyişiklikləri yox, yeni konstitusiya lazımdır",- deyə Minasyan qeyd edib. Nazir əlavə edib ki, komissiyanın işçi iclaslarında konstitusiyanın ilk üç maddəsinin dəyişdirilməsi məsələsi müzakirə olunmayıb, İstiqlal Bəyannaməsinə istinadın çıxarılması məsələsinə də baxılmayıb. Hazırda əsas diqqət sabit parlament çoxluğu mövzusuna yönəlib və konstitusiya islahatlarının təşəbbüskarları bu normanı gələcək Konstitusiyada təsbit etmək istəyirlər.
Qeyd edək ki, Azərbaycan sülh müqaviləsi imzalanmadan əvvəl Ermənistanın konstitusiyasında dəyişikliklər edilməsini tələb edir. Çünki hazırkı konstitusiyada 1990-cı il avqustun 23-də qəbul edilmiş İstiqlal Bəyannaməsinə istinad edilir. Bəyannamədə "Ermənistan Respublikası və Dağlıq Qarabağın birləşdirilməsi" haqqında bənd var.
Ermənilər qonşular üçün 3 təhlükəli maddəni yeni konstitusiyada da saxlamaq istəyirlərsə bunun harası islahat oldu?
Politoloq Tofiq Abbasov "Bakı-Xəbər"ə açıqlamasında bildirdi ki, Ermənistanın siyasi rəhbərinin müxalifətlə, cəmiyyətlə təmaslarda daim maneələr etməyə, bir növ çaşqın vəziyyət yaratmağa çalışıdığı aydın görünür: "Birmənalı bildirmir ki, əgər konstitusiya dəyişəcəksə, orada nələr dəyişilməlidir. Azərbaycanın, Türkiyənin bu məsələyə münasibətləri bəllidir. Bilirik ki, Ermənistan konstitusiyası da, müstəqillik haqqında bəyannaməsi də mürtəce ruhda tərtib olunmuş sənədlərdir. Onlar elə qala bilməz. Əgər qalacaqlarsa, heç vaxt Ermənistan qonşuluq siyasətinə, sağlam münasibətə yanaşa bilməyəcək. Ona görə də bildirmək istəyirəm ki, bu məsələlərin hamısı vacibdir. Nikol Paşinyanın ehtiyatlı bir gedişi var. O heç vaxt bu və ya digər dəyişiklik haqqında fikir bildirmir. O sadəcə cəmiyyətə təkliflərini açıqlayır. Bu təkliflər qıcıq doğursa da, Paşinyan bildirir ki, bunların ətrafında geniş diskussiyalar aparmaq lazımdır. O ki qaldı, Ermənistanla "Dağlıq Qarabağ"ın birləşməsinə, bu yalnız xəyaldır, heç vaxt baş tutmayacaq. Onlar özləri də bilir ki, artıq qatar gedib. Bunun da günahkarı özləridir. Azərbaycan əvvəl gündən onlara təklif edirdi ki, gəlin ağıllı-başlı müzakirə edək. İlk gündən onlar özlərini ağıllı hesab etdilər və sözlərimizi qəribçiliyə saldılar. Ermənilər hər hansı bir məsələdə, əsasən də Qarabağ məsələsində peşmandılarsa, öz günahlarıdır. Bizim onlara xoşluqla etdiyimiz təklifləri başa düşmədilər. İndi isə bu onların artıq daxili məsələləridir. Mən belə başa düşürəm ki, 2027 - ci ilə qədər Ermənistan cəmiyyətində də transformasiyalar baş verəcək. Yəni onlar bilməlidirlər ki, bizim təşəbbüslərə yox desələr, özlərinə pis edirlər. Ermənistan hazırda Azərbaycana "göz dağı" verəcək vəziyyətdə deyil. Biz öz torpaqlarımızı azad etdik, ən əlçatmaz hər şeyə çatdıq. Ona görə də, Ermənistanda sağlam qüvvələrin hələ də var olduğunu düşünürəm və inanıram ki, onlar ciddi cəhdlə çalışıb camiyyəti agah edəcəklər. Bu məqamlar aradan qalxmasa, onlar tək Azərbaycan və Türkiyəyə qarşı yox, bütün dünya birliyinə qarşı olacaqlar".
Məhəmmədəli QƏRİBLİ
