Azərbaycana qarşı qərəzli mövqeyi ilə seçilən Avropa Parlamenti növbəti qalmaqallı hadisə ilə dünyanın gündəminə gəlib. Söhbət bu qurumda qohumluq əlaqələri əsasında yüksək vəzifələrə təyinatdan gedir. "Politico" nəşrinin yazdığına əsasən, Avropa Parlamentinin sədri Roberta Metsola yeznəsi Mettyu Taboneni özünün aparat rəhbəri təyin edib.
Mettyu Tabone 2013-cü ildən Avropa Parlamentində Metsolanın yanında işləyir. O, yeni vəzifədə Letisiya Suleta de Reals Ansaldonu əvəzləyəcək. Ansaldo parlamentdə başqa vəzifəyə keçir.
Qeyd edək ki, Malta parlamentinin sabiq sədr müavini Roberta Metsola 2022-ci ildə Avropa Parlamentinin sədri seçilib. Roberta Metsola 2013-cü ildən Avropa Parlamentinin üzvü, 2020-ci ildən isə Parlamentin vitse-prezidenti vəzifəsində çalışıb. Metsola Avropa Parlamentinin yeni çağırışının cari ilin iyulun 16-da başlayan ilk sessiyasında yenidən prezident seçilib. Strasburqda keçirilən səsvermədə 699 səsdən 562-ni toplayan Metsola növbəti iki il yarım ərzində Parlamentə sədrlik edəcək. O, fransalı Simone Veil və Nikol Fonteyndən sonra 705 üzvdən ibarət assambleyaya sədrlik edən üçüncü qadındır. Parlament tarixində iki dəfə seçilən yeganə qadın siyasətçi olan Roberta Metsola açılış nitqində birlik və inklüzivlik üzərində dayanaraq, hamı üçün əlçatan olan, hər kəsin özünü nəinki bir hissəsi hiss etdiyi, həm də ona sahib çıxdığı Avropa üçün çalışacağını deyib. Amma onun təyinatları qalmaqala səbəb olub. Avropa Parlamentinin Maltadan üzvü Aleks Aqius Saliba "Facebook"da Metsolanın addımını "azğın nepotizm" adlandırıb. Aqius Saliba Leyborist, Metsola onun əzəli rəqibi Milliyyətçi partiyasındandır. Bu fonda Aqius Saliba yazır: "Təsəvvür edin ki, mən, yaxud Leyborist Partiyasının başqa bir üzvü ailə üzvünü ofisində yüksək vəzifəyə təyin edir". Tabone illərlə Metsolanın yaxın köməkçisi olub, 2015-ci ildə onun bacısı ilə evlənib. Metsola daha sonra Avropa Parlamentinin sədri seçilib. "Politico" yazır ki, Metsola bundan öncə də qalmaqala səbəb olan təyinatlar edib. 2022-ci ilin payızında Alessandro Kyokketti onun aparat rəhbərliyindən parlamentin baş katibi postuna yüksəlib. Kyokkettinin Metsolanın köməkçisi olanda həmin rola keçmək üçün favoritizmdən faydalandığı bildirilir. O, həmçinin gizli sövdələşmələrdən yararlanmaqda ittiham olunub. Belə ki, parlamentdə Kyokkettiyə siyasi dəstəyin təmin olunması üçün bir neçə yeni post yaradılıb. Metsola və onun sağ-mərkəzçi Avropa Xalq Partiyası Kyokkettini dəstəkləyib, yalnız parlament proseduruna əməl etdiklərini deyiblər. Metsola 2022-ci ilin sentyabrında bu fonda qeyd edirdi: "Bu, qurumun tarixində ən açıq proses olub. Vakansiya bir neçə ay açıq qalıb, hər kəs müraciət edə bilərdi... İlk dəfə idi ki, bir posta bir nəfərdən çox namizəd müraciət edirdi".
Bütün bunlar silsilə korrupsiya qalmaqallarından özünə gəlməyən Avropa Parlamenti üçün yeni problemlər hesab olunur. Xatırladaq ki, bundan əvvəl uzaq Qətərdə keçirilən futbol üzrə dünya çempionatı zamanı Brüsseldə Avropa Parlamentinin vitse-prezidenti, yunan siyasətçi Eva Kaylinin və daha üç şəxsin, üstəlik, başqa bir avropalı deputatın köməkçisi olan italyan Françesko Giorginin, sabiq Avropa deputatı, italiyalı Pyer Antonio Panzerinin saxlanılması ilə bağlı sensasion xəbərlər yayılmışdı. Dünyanı şoka salan həbslər karbohidrogen ehtiyatları ilə çox zəngin Körfəz yarımadası dövlətinin Avropa Parlamentində nüfuzu "satın almaq" cəhdi ilə bağlı korrupsiya araşdırması çərçivəsində polis tərəfindən həyata keçirilib. Bundan sonra istintaqın keçmiş avropalı deputat Pyer Antonio Panzerinin həmyerlisi və Avropa Parlamentinin üzvü Françesko Giorgi vasitəsilə varlı şeyxlərin bu gəncin istəkli xanımı, Avropa Parlamentinin vitse-prezidenti ilə əlaqə qura biləcəyindən şübhələnmək üçün hər cür əsası olub. Polis Eva Kaylinin özünün ofisi ilə yanaşı, daha iki avropalı deputatın - belçikalı Mark Tarabella və Mariya Arenanın ofislərini də möhürləyib. Adı açıqlanmayan həmin "neft-qaz futbolu" ölkəsinin maraqlarını bu Avropa qurumunda təbliğ etmək üçün Avropa Parlamentində nüfuzlu vəzifə tutan siyasətçilərə rüşvət verildiyi barədə məlumatlar əldə edilib. Siyasi karyerasını belə şəkildə başa vuran Kayli son illərdə erməni lobbiçiləri, xüsusən də vaxtilə "Ədalət və Demokratiya uğrunda Avropa Erməni Federasiyası"nın təsisçisi Kaspar Karampetyanla sıx əməkdaşlıq edib. Afrikanın münaqişə bölgələrindən qaçaqmalçılıq yolu ilə Belçikaya müxtəlif rəngli brilyantlar daşımaqla böyük kapital qazanan Karampetyan, həm də qurduğu şübhəli federasiya vasitəsilə və Ermənistan xüsusi xidmət orqanlarının yaxından iştirakı ilə avropalı deputatları o vaxt işğal altında olan Qarabağa aparıb, fırıldaqçı və indi məhkəməsini gözləyən Bako Saakyanın Strasburqa səfərini təşkil edib, Avropa Parlamentinin dostluq qrupundan Ermənistanın xeyrinə bəyanatları satın alıb. Elə indi də erməni lobbisi Avropa Parlamentinə təsir göstərməyə can atır. Halbuki, Avropa Parlamentinin özü yeni qalmaqallarla çalxalanır.
Samirə SƏFƏROVA
