Cahandar Bayoğlu: "Əli Kərimli ilə bərabər Asim Mollazadəyə bağlı olan trol ordusu mənə qarşı hərəkətə keçib"
22 saylı Nəsimi-Yasamal seçki dairəsindən deputatlığa namizəd Cahandar Bayoğlu ilə alternativi Asim Mollazadə arasında gərgin mübarizə gedir. Belə məlumat yayılıb ki, Cahandar Bayoğlu alternativinə xitabən "Əli Kərimlini mən söymüşəm, siz söyməmisiniz", - ifadəsini işlədib.
Cahandar Bayoğlu ilə Asim Mollazadə hər ikisi keçmiş cəbhəçidir. Maraqlıdır, Cahandar Bayoğlu belə söz deyibmi? Əgər deyibsə, məgər mandat bu kriteriyalara görə qazanılır?
Deputatlığa namizəd Cahandar Bayoğlu "Bakı-Xəbər"ə açıqlamasında bildirdi ki, onun dediklərini tamamilə təhrif ediblər: "Mən sadəcə Əli Kərimli ilə Asim Mollazadənin işbirliyindən danışıram və qeyd edirəm ki, bugünə kimi Asim Mollazadə heç vaxt Əli Kərimliyə münasibət bildirməyib. Bu, 90-cı illərdə olan işbirliyinin davamı kimi dəyərləndirilir. Mən bu gün də onların Amerikada ortaq şirkətlərinin olduğunu demişəm. Ancaq nə üçün tənqid etmədiyini yox, nə üçün açıqlma vermədiyini bildirmişəm. Digər tərəfdən, bunlar xüsusi bir planın tərkib hissəsidir. Mən Asim Mollazadənin qaranlıq işlərindən danışmışam və Əli Kərimlinin adamları olduqca narahat olublar. Əli Kərimli ilə bərabər Asim Mollazadəyə bağlı olan trol ordusu mənə qarşı hərəkətə keçib. Bir daha nümayiş etdirdilər ki, onlar həqiqətən birlikdədirlər. Bu çox təəssüf doğurur. İlk olaraq, mənim işlətmədiyim bir ifadəni fərqli bir formada yazmaq, onu paylaşmaq əxlaq dəyərlərini aşmaqdan başqa bir şey deyil. Digər tərəfdən də bir daha sübut olunur ki, Asim Mollazadə ilə Əli Kərimlinin gizli əlaqələri davam edir. Asim Mollazadə ilə Əli Kərimlinin Amerikada ortaq şirkətlərinin olması faktı da özünü subut etdi. Bu işbirlikləri ortadadı və mən də bunu dilə gətirmişəm. Mən heç zaman deməmişəm ki, Əli Kərimlini tənqid edən, təhqir edən deputat olmalıdır. Eyni zamanda Əli Kərimliyə məxsus yayın quruluşları, "Azərbaycan saatı"nı işlədənlər davamlı deputat seçiləcək adamların siyahısına Asim Mollazadənin adını yazırlar. Bu həm də Azərbaycan dövlətinin demokratik imicinə vurulan zərbədir. Eyni zamanda xalqda belə bir fikir yaratmağa çalışırlar ki, dövlət Asim Mollazadənin lehinədir, onun seçilməsi uğrunda mübarizə aparır. Bu mesaj da bilərək edilir ki, seçicilər onsuz da Asim Mollazadənin seçiləcəyini düşünüb seçkiyə gəlməsinlər. Onların bu fəaliyyəti davamlı tənqid olunmalı və xüsusi xidmət orqanları tərəfindən araşdırılmalıdır. Bu işbirliyində mən gizli niyyət görürəm. Bu, Amerika gizli servisinin Azərbaycanda qurduğu kəşfiyyat dəstəsidir. Türkiyədə olan FETÖ kimi təşkilatlanma Azərbaycanda da özünü büruzə verə bilər. Ona görə də onların işbirliyi mütləq araşdırılmalıdır".
Təəssüflər olsun ki, bu məsələ ilə bağlı nə qədər cəhd etsək də, Asim Mollazadənin fikirini öyrənə bilmədik.
Məhəmmədəli QƏRİBLİ
