Yadigar Məmmədli: "Öz aləmlərində hesab edirlər ki, bununla Azərbaycanı zəif tərəfindən vuracaqlar"
Xaricdə ermənilərin aktiv tərəfdarlarından biri olan, diasporanın pulu ilə bəslənən Beynəlxalq Haaqa Məhkəməsinin keçmiş prokuroru Luis Moreno Okampo yenə Azərbaycanı hədəfə alıb. Bu dəfə o, təkcə hüquqi müstəvidə deyil, elə hər mənada erməniləri Azərbaycana qarşı savaşmağa təşviq edib.
O bir qrup erməni ilə görüşdə deyib ki, COP29 ərəfəsində Qarabağdan könüllü köçmüş ermənilərin geri qayıtması məsələsini qaldırmaq üçün əlverişli imkan yaranıb. Həmçinin ermənilərə tövsiyə verib ki, bu tədbir ərəfəsində Bakıda həbsdə olan separatçıların azad edilməsi məsələsini xüsusi qabartmaq lazımdır. O sərsəmləyib ki, Azərbaycan hər nə qədər iddia etsə də, Qarabağ, guya ermənilərin torpağıdır: "Azərbaycan nə qədər bunun əksini iddia etsə də, Qarabağ erməniləri torpağın sahibidir".
O daha sonra deyib ki, hər şey ermənilər və onların xaricdəki havadarlarının döyüşə nə qədər hazır olmaqlarından asılıdır. "Qarabağ erməniləri hüquqlarını qorumaq üçün bütün imkanlardan istifadə etməlidirlər. Bunun üçün fəal olmalıdırlar".
Belə bəlli olur ki, Ermənistana bu ideyanı verən Okampodur. Təsadüfi deyil ki, son vaxtlar ermənilər bu məsələni bir-iki dəfə gündəmə gətiriblər. Hətta bununla bağlı ayrıca bəyanat da yayıblar, müxtəlif dövlətlərə müraciətlər ediblər. Belə görsənir ki, ermənilərə bu məsələdə istiqamət verən Okampodur. Bu həmin Okampodur ki, adı beynəlxalq rüşvət qalmaqallarında hallanır. 2017-ci ildə "Mediapart"-dan olan Fransanın siyasi araşdırmaçı jurnalistləri Okamponun ofşor şirkətlərini müəyyən etdilər. Okampo BCM-nin baş prokuroru olduğu dövrdə dünyanın ən məşhur vergi cənnətlərində adı hallanan şirkətləri idarə edirdi. Ofşor zonadakı maliyyə fəaliyyəti ilə bağlı suala cavab olaraq, keçmiş yüksək çinli prokuror BCM-dəki maaşının "kafi olmadığını" söyləyib. BCM-dən ayrıldıqdan sonra Okampo anlaşılmaz dərəcədə böyük aktivlərə sahib idi: Onun Haaqadakı daşınmaz əmlakı (1,2 milyon avro), Argentinada beş mülkü (2,2 milyon dollar) və bankda ən azı 1 milyon dolları üzə çıxdı.
Azərbaycan 23 aprel 2023-cü ildə Laçın yolunun girişində Sərhəd-Nəzarət Məntəqəsi qurandan sonra Okampo, guya Qarabağ erməniləri üçün genosid mühitinin yarandığı ilə bağlı "hesabat" hazırladı. Ancaq çox keçmədən sübut olundu ki, həmin hesabat boş şeydir. Çünki buraxılış məntəqəsi yaradılandan sonra ermənilərin təminatı, gediş-gəlişi dayanmadı. Azərbaycan Okamponun arqumentlərini darmadağın etmək üçün tutarlı faktlarla beynəlxalq səviyyəli hüquqşünasların iştirakı ilə əks arqumentlər ortaya qoydu. Bir sözlə, məlum olur ki, COP29 tədbiri ərəfəsində separatçıların həbsdən azad edilməsi məsələsinin gündəmə gətirilməsi ideyasını ermənilərə verən Okampodur.
"Okamponun "hüquqi yardım" cəhdləri bu dəfə də səmərə verməyəcək"
Sözügedən məsələni "Bakı-Xəbər"ə şərh edən media eksperti Yadigar Məmmədli hesab edir ki, Okamponun bu cəhdi də fiaskoya uğrayacaq: "Əvvəla, Qarabağda antiterror əməliyyatlarının ildönümü yaxınlaşdıqca, ermənilərin belə fəaliyyətə girişəcəkləri gözlənilən idi. Çünki erməni separatizminin belini elə qırdıq ki, bir daha onlar ərazilərimizi işğal edə bilməzlər. Erməni lobbisindən bəslənən və adı rüşvətxorluqda hallanan, mənfi reputasiyaya malik olan Okamponun bu planı da uğursuzluğa düçar olacaq. Bu həmin Okampodur ki, Qarabağ ermənilərinin soyqırıma məruz qəlmasından dəm vururdu. Ancaq bütün bu qaralama kampaniyası ifşa olundu. Çünki bununla bağlı bir fakt belə yox idi. Azərbaycan mülki obyektləri hədəf almırdı. Okampo başda olmaqla, ermənilər antiterror əməliyyatlarını soyqırım kimi təqdim etmək üçün dəridən-qabıqdan çıxdılar. Buna hüquqi don geyindirmək üçün çox çalışdılar. Hətta məsələni BMT Təhlükəsizlik Şurası müstəvisinə çıxarmağa cəhd etdilər. Lakin bunun üçün gərəkən dəstəyi ala bilmədilər. İndi də görürlər ki, COP29 tədbiri yaxınlaşır, bununla həbsdə olan separatçıların məsələsini gündəməyə gətirməyə çalışırlar. Öz aləmlərində hesab edirlər ki, bununla Azərbaycanı zəif tərəfindən vuracaqlar. Ancaq bunun da bir səmərəsi olmayacaq. Ən azından ona görə ki, bunun üçün hüquqi dayanaq yoxdur. Bakı həbsxanalarında olan separatçılar konkret ittihamlarla təqsirli bilinirlər. O üzdən, Okamponun "hüquqi yardım" cəhdləri bu dəfə də səmərə verməyəcək".
Vidadi ORDAHALLI
