Bəhruz Quliyev: "Qədim Azərbaycan torpaqlarından köç etmələri iki səbəbdən ola bilər"
2023-cü ilə olan məlumata görə, 2019-cu illə müqayisədə Sünik (Zəngəzur) əhalisi 15 faiz, Qeqarkunik əhalisi 6 faiz, Tavuşun əhalisi isə 4 faiz azalıb. Bu barədə "Ölkə üçün Həyat" partiyasının həmtəsisçisi Mesrop Arakelyan öz Facebook səhifəsində yazıb.
"Ümumilikdə 40 000-dən çox insan" - o əlavə edib.
Diqqəti çəkən məqam odur ki, Ermənistanın Zəngəzur bölgəsində əhalinin sayı digər regionlarla müqayisədə daha daha çox azalıb. O baxımdan bu, deməyə əsas verirmi ki, Ermənistanın, xüsusilə də Zəngəzur bölgəsini hərbiləşdirməsi, ora ABŞ-ın, Fransanın, Hindistanın verdiyi silahları yerləşdirməsi və s. yerli əhalinin də qəbul etmədiyi bir şeydir? Yəni bu səbəbdən yerli əhali oranı tərk edir, o bölgənin gələcəyini görmür. Necə deyərlər, müharibədən qorxduqları üçün oranı tərk edirlər.
"Ermənilər havada barıt qoxusunun artmasından narahat olduqları üçün köçməyi üstün tutublar"
Sözügedən məsələni "Bakı-Xəbər"ə şərh edən "SƏS" Media Qrupunun rəhbəri, politoloq Bəhruz Quliyevin fikrincə, ermənilərin Zəngəzur, Dərələyəz, Basarkeçər adlı qədim Azərbaycan torpaqlarından köç etmələri iki səbəbdən ola bilər: "Biri erməni lobbisinin sifarişi, digəri isə özlərinə aid olmayan torpaqların nə zamansa boşaldılma ehtimalı. Birinci səbəb çox təhlükəlidir, çünki bunun arxasında duran çirkin oyunlardan tam olaraq xəbərdar deyilik. Ermənistanın arxasında duran güclərin tərtib etdikləri plan regionda daha bir münaqişə və müharibəni alovlandıra bilər. Qarabağdan öz istəkləri ilə köçən ermənilərdən bu gün Ermənistan və erməni lobbisinin necə istifadə etdiyi göz qabağındadır. Sentyabrın 19-da ABŞ Konqresində Amerika Erməniləri Milli Assambleyasının sifarişi ilə konqresmenlərin toplantısı keçiriləcək. Müzakirələrdə Qarabağdan köçək ermənilərin geri dönüşü ilə bağlı planlardan danışılacaq. Diqqət edirsinizmi, əvvəlcə erməniləri Qarabağdan zorla, həm də mütəşəkkil qaydada çıxarırlar, sonra isə onların geridönüşü təşkil etmək istəyirlər. Deməli, məqsəd ermənilərin hüquqları qorumaq yox, bundan istifadə edib Cənubi Qafqazda mövqelənməkdir".
Politoloq ikinci səbəbdən danışarkən qeyd etdi ki, ermənilər özlərini inkişaf etmiş xalqlar sırasında görsələr də, hələ də qəbilə təfəkküründədirlər: "Ermənilər yaşadıqları ölkələrin bərəkətli, təbii zənginliyi olan ərazilərini özlərinə yurd seçiblər. Bunun üçün müxtəlif üsullardan istifadə ediblər. Kompakt yaşadıqları ərazilərdə yerli əhalini sıxışdırmağı da bacarıblar. Bu gün Ermənistanın ərazisi sayılan, əslində qədim Azərbaycan torpağı olan Zəngəzurdan, Dərələyəzdən, Basarkeçər və Göyçədən ermənilərin xarici ölkələrə köçünün arxasındakı məqsəd yeni bərəkətli yerlər ələ keçirməklə yanaşı, həm də regionda daha çirkin oyunların əsasını qoymaqdır. Tapşırığın "yuxarıdan" gəldiyi şəksizdir. Düzdür, bu ərazilər bütün dövrlərdə azərbaycanlıların olub, yüz minlərlə soydaşımız təkcə son 30 ildə öz doğma yurdlarını tərk edərək Azərbaycana pənah gətirib. Və bu gün öz evindən, torpağından qaçqın düşən soydaşlarımız geri dönməyi hədəfləyiblər. Bunun üçün beynəlxalq qurumlara müraciətlər də ediblər. Ermənilər məskunlaşdıqları azərbaycanlılara məxsus kəndlərdən, evlərdən məhz buna görə köçürlər. Həm də zaman onların xeyrinə işləmir. Digər bir vacib məqam Ermənistan hakimiyyətinin, guya önləyici tədbir görərək, xüsusən Zəngəzura qeyri-regional dövlətlərin ordularını yerləşdirməsidir. Ermənilər havada barıt qoxusunun artmasından narahat olduqları üçün köçməyi üstün tutublar. ABŞ-ın hərbi kontingentinin Zəngəzur bölgəsinə gəlişi kimsənin təkzib edə biləməyəcəyi bir faktdır. Rusiya sərhədçiləri isə bölgəni tərk etməyi düşünmür. İki əbədi düşmən – ABŞ və Rusiyanın hərbi birliklərinin mövcud olduğu bölgədə sabitlik, sülh proqnozlaşdırıla bilərmi? Əlbəttə, yox".
Vidadi ORDAHALLI
