Ermənistanda apostol kilsəsinin radikal müxalifətlə birləşib ölkə iqtidarı əleyhinə başlatdığı etiraz aksiyası cari ilin sentyabrından yenə davam edəcək. Kilsə ilə yanaşı, yeni aksiyalara radikal müxalifət də ciddi hazırlıq görür.
Ölkənin əsas müxalifəti adına iddia edən "Hayastan" fraksiyası bildirib ki, təşkilat arxiyepiskop Baqrat Qalstanyanın antihökumət hərəkatına sadiq qalır.
"Hayastan" fraksiyasının deputatı Kristine Vartanyan qeyd edir ki, keçmiş prezident Robert Köçəryanın "Hayastan" fraksiyası Qalstanyanın planlaşdırdığı etiraz aksiyalarını dəstəkləyəcək. Vartanyan və "Hayastan" fraksiyasının başqa nümayəndələri ötən həftə İrəvan yaxınlığındakı kurortda görüşərək növbəti addımlarını müzakirə ediblər. Köçəryanın iki gün davam edən bu tədbirdə iştirak etdiyi bildirilir. Amma Vartanyan bunu da deyib ki, son iki ildə çox nadir hallarda bəyanatlar verən keçmiş prezident bu xüsusda heç bir tapşırıq verməyib və tərəfdarları ilə yalnız fikir mübadiləsi aparıb: "Bizim konsensusa əsaslanan yanaşmamız hazırda əlimizdə olan vasitələrdən mümkün qədər fəal istifadə etməkdir". Vartanyanın sözlərinə görə, belə vasitələrdən biri də keşiş Qalstanyanın yeni aksiyalarına dəstək verilməsidir. Qalstanyan yeni nümayişlərə məhz sentaybr ayında başlayacağını bəyan etmişdi. Xatırladaq ki, bu ilin aprelində baş nazir Nikol Paşinyanın sərhəd ərazisindəki dörd kəndi Azərbaycanın nəzarətinə qaytarmaq qərarından alovlanmış etirazlar çox tezliklə genişlənmiş və Qalstanyan tərəfdarları ilə birlikdə İrəvana yürüş keçirmişdi. Qalstanyan əvvəlcə mitinqlərdə Ermənistanın qərarını tənqid etsə də, nəhayət may ayından Nikol Paşinyanın istefasını tələb etməyə başlamışdı. Etiraz hərəkatına başçılıq edən Qalstanyanın yaxın çevrəsinə ən azı iki "Hayastan" deputatı daxildir. Keşiş son həftələrdə Ermənistanın bir sıra regionlarına səfərlər edərək Pşinyanın devrilməsi üçün təbliğat kampaniyası aparıb. Vartanyan israr edir ki, hazırda Ermənistanda hakimiyyət dəyişikliyinə çox böyük ictimai dəstək var: "Mən əminliklə deyə bilərəm ki, ictimai əhval-ruhiyyə 2020, 2021 və 2022-ci illərdə olduğundan köklü şəkildə fərqlidir". Bu günlərdə Şirak mərzinə səfəri zamanı "Azatutyun"a müsahibə verən Qalstanyan deyib ki, Paşinyanı istefaya məcbur edəcək kampaniya sentyabrın əvvəllərində başlanacaq. Arxiyepiskop heç bir spesifik aksiyadan danışmayıb, lakin deyib ki, kampaniyanın ikinci mərhələsi küçə etirazları ilə deyil, tərəfdarların müzakirələri ilə başlanacaq. Keşiş Paşinyanı nəzərdə tutaraq deyib ki, "antixrist" hakimiyyətdən "xoşluqla" getməlidir.
Qalstanyan bildirib ki, mübarizə metodları dəyişdiriləcək, çünki onlar hökumətin sərt hərəkətlərindən nəticə çıxarıblar. Keşiş onun antihökumət hərəkatının zəiflədiyinə dair iddiaları bir daha rədd edib. O iddia edib ki, hərəkata "daxildən və xaricdən" dəstək artıb. Onu da xatırladaq ki, bu yaxınlarda ölkə regionlarına səfər edən baş nazir Nikol Paşinyan sakinlərdən, o cümlədən sərhədyanı ərazilərin sakinlərindən böyük dəstək alıb. Baş nazir Qalstanyanın dediklərini şərh etməyib. Paşinyanın siyasi tərəfdarları keşiş Qalstanyanın başçılıq etdiyi hərəkatın zəiflədiyini iddia edirlər. Baş nazirin "Vətəndaş müqaviləsi" partiyasından millət vəkili Arpi Davoyan deyib ki, Qalstanyanın etirazlar barədə yeni bəyanatları hakimiyyəti narahat etmir: "Mən uğur qazana bilməyən bir keşişin Ermənistan rayonlarını gəzməsindən, saxta və yalan məlumatlar yaymasından niyə narahat olmalıyam?". Ekspertlər bildirir ki, Ermənistanda baş verən proseslərdə kənar təsir amili mütləq nəzərə alınmalıdır. Elə indi də bir çox siyasi ekspertlər ölkədə yaşananlarda Rusiya izinin olduğunu bildirir. Çünki ölkənin Ermənistanda bir çox dayaqları var. Mediadan tutmuş, iqtisadiyyatın müxtəlif sahələrinədək rus təsiri qalmaqdadır. Ancaq Moskvanın bu və ya digər təsirə malik dayaq instrumentləri heç də işlək vəziyyətdə deyil. Çünki Ermənistan cəmiyyətində və geniş ictimai rəyində ölkənin sabiq iqtidarının timsalında ekslərə və bütövlükdə Rusiya ilə bağlı hər şeyə münasibətdə ciddi antipatiya hökm sürür. Bununla belə, payız aylarına hakim partiyada ciddi hazırlıq gedir. Paşinyan və yaxın çevrəsi qarşılarına qoyduqları məqsədə çatmaq üçün bütün üsullara əl atacaqlar. Bura müxaliflərin zorla susdurulması da daxildir. Eyni zamanda Qarabağdan köçən ermənilərin yaratdığı təhdidin aradan qaldırılmasına da ciddi hazırlıq gedir. Bu günlərdə Ermənistan Daxili İşlər Nazirliyi Qarabağdan getmiş ermənilərə silahların təhvil verilməsi ilə bağlı müraciət edib. Müraciətdə, ov tüfəngləri də daxil olmaqla, bütün odlu silahların təhvil verilməsi tələb olunur. Qarabağdan Ermənistana getmiş ermənilər müxalifətin etiraz aksiyalarında fəal iştirak edir. Hökumət qorxur ki, qarşıdakı seçkilər zamanı bu aktivlik daha da arta bilər. Etirazlar zamanı əlində silah olan ermənilər ondan istifadə haqda düşünə, hökumətin devrilməsi üçün silahlı üsyan başlaya bilər. Buna görə də silahların toplanması prosesi başlayır. Hər halda, erməni cəmiyyətində radikal kəsimin bu addıma gedə biləcəyi istisna olunmur.
Tahir TAĞIYEV
