Azər Həsrət: "Durovun ələ keçirilməsi nəticəsində məlumatların sızdırılma təhlükəsi daha da artmış ola bilər"
"Telegram"ın yaradıcısı Pavel Durov Fransada saxlanıldıqdan sonra bir sıra rusiyalı məmurlara sözügedən messencerdə rəsmi yazışmaların silinməsi tapşırılıb.
Qeyd olunur ki, əmr Rusiya hüquq-mühafizə orqanları, hökumət və prezident administrasiyasının əməkdaşlarına gəlib. Mənbələr qeyd edir ki, belə göstərişlər Rusiya Müdafiə Nazirliyinin yüksək rütbəlilərinə və bəzi iri biznesmenlərə də verilib.
Eyni zamanda, jurnalistlərin şərh almaq üçün əlaqə saxladıqları bir çox digər məmurlar belə bir göstəriş almadıqlarını bildirsələr də, keçirilən iclaslarda yuxarıların bunu tövsiyə edə biləcəyini etiraf edirlər. Mütəxəssislər bildirir ki, Fransa xüsusi xidmət orqanları Durovdan "Telegram"da kriminal cəmiyyətlə, eləcə də sanksiyaya məruz qalmış şirkətlər və şəxslərlə əlaqəli yazışmalara çıxış əldə etməyə çalışacaq.
Qeyd edək ki, "Telegram"-ın təsisçisi Pavel Durov Azərbaycandan Fransaya gedərkən Le Burje hava limanında saxlanılıb. Jandarma Durovu narkotik ticarəti, uşaqlara qarşı cinayətlər və "Telegram"-da kifayət qədər moderasiya olmaması, hüquq-mühafizə orqanları ilə əməkdaşlıqdan imtina, həmçinin messencer funksiyaları, məsələn, istifadəçilərə kriptovalyuta göndərməyə icazə verməsi səbəbindən fırıldaqçılıqda ortaq hesab edir.
Məlumdur ki, hazırda Durovun həbsdə saxlanıldığı Fransa ilə Azərbaycan arasında münasibətlər sərindir. Bu da faktdır ki, Azərbaycanda "Teleqram"ın çoxlu sayda istifadəçisi var. Bu vəziyyət ölkəmizdəki "Teleqram" istifadəçilərinin şəxsi məlumatlarının Fransa hüquq-mühafizə orqanlarının əlinə keçməsi və bizə hansısa formada ziyan vurulması ilə nəticələnə bilərmi?
Media məsələləri üzrə ekspert, Əməkdar jurnalist Azər Həsrət "Bakı-Xəbər"ə açıqlamasında bildirdi ki, Durovun Azərbaycana səfərindən dərhal sonra həbs edilməsi də diqqəti çəkir: "O, Fransa vətəndaşıdır, Azərbaycana gəlib, byradan qayıdandan sonra da Fransada həbs edilib. Məlumat da var ki, onun barəsində həbs qərarı təyyarəsi Fransaya çatmağa bir neçə dəqiqə qalmış verilib. Bu qədər tələsərək, operativ şəkildə onun həbsinə qərar veriblər. "Teleqram" dünyanın hər yerində yetərincə populyardır. Bəzi sosial media paylaşım platformalarından fərqli olaraq, senzura tətbiq etmir. Təbii ki, burada senzuranın olmaması özlüyündə onun azad paylaşım platforması olmasından xəbər verir. Fransa dövlətinin isə Durovu Azərbaycandan qayıdandan dərhal sonra həbs etməsi, düşünürəm ki, birbaşa Azərbaycanla bağlıdır. Fransa Azərbaycana bu və ya digər şəkildə göz dağı vermək üçün bəhanələr axtarırdı və dolayısı ilə buna nail olmaq üçün Durovu həbs etdi. Azərbaycanla bağlı bilgilərin Fransanın əlinə keçməsi təhlükəsi varmı? Bu təhlükə hər zaman var. Ona görə də biz hər zaman sosial media istifadəçilərinə çağırışlar edirik. Əsasən də dövlət qurumlarımız, Daxili İşlər Nazirliyi vətəndaşlara çağırışlar edir ki, şəxsi məlumatlarınızı mümkün qədər gizli tutmağa çalışın, kart məlumatlarınızı da eyni zamanda nəzarətdə saxlayın. Yəni bu təhlükə hər zaman var. Amma Durovun ələ keçirilməsi nəticəsində məlumatların sızdırılma təhlükəsi daha da artmış ola bilər. Durova işgəncə verib nəsə edəcəklərini düşünmürəm. Amma hansısa bazarlaşma da ola bilər. Bütövlükdə bu həbsin özü ifadə azadlığına, əsasən də yeni texnologiyalar azadlığına, maddi qarşılıqsız verilən xidmətlərə qarşı Fransa dövlətinin dözümsüzlüyüdür. Nəticəsi nə olacaq? Nəticə o olmalıdır ki, beynəlxalq qurumlar, media azadlığı, insan və söz azadlığı ilə məşğul olan qurumlar məsələyə sərt reaksiya versin. Təəssüf ki, biz o reaksiyanı hələ görmürük. Mənim özüm də iki gün qabaq bununla bağlı bir paylaşım etdim. Beynəlxalq qurumlara çağırışım oldu ki, reaksiya versinlər. Amma hələ ki, onlardan xəbər yoxdur. Gözləyək görək nə olur. Hər halda, biz azərbaycanlılar olaraq Durovun bu həbsi barədə yetərincə yüksək səviyyədə səsimizi qaıdıracağıq".
Məhəmmədəli QƏRİBLİ
