Abutalıb Səmədov: "Bu cür sənədin gələcəkdə Pakistan və digər türk dövlətləri ilə imzalanma ehtimalı çox yüksəkdir"
Azərbaycan Türk Dövlətləri Təşkilatının beynəlxalq güc mərkəzinə çevrilməsi istiqamətində fəaliyyətini intensivləşdirib. Avqustun 22-23-də Azərbaycan Prezidenti İlham Əliyev Özbəkistana rəsmi səfər edib. Səfər çərçivəsində Prezident İlham Əliyev və həmkarı Şövkət Mirziyoyev arasında ikitərəfli görüş keçirilib. Görüşün sonunda Azərbaycan və Özbəkistan arasında müxtəlif sahələrə aid bir sıra müqavilələr imzalanıb.
İmzalanan sənədlər arasında məhz "Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə" xüsusi əhəmiyyət kəsb edir. Bu müqavilə ilə rəsmi olaraq Azərbaycan-Özbəkistan müttəfiqlik münasibətlərinin əsası qoyulub. Xatırladaq ki, bundan əvvəl, yəni 2021-ci ilin iyunun 15-də Şuşada Azərbaycan və Türkiyə prezidentləri İlham Əliyevlə Rəcəb Tayyib Ərdoğan arasında Azərbaycan-Türkiyə strateji müttəfiqliyin əsasını qoyan müqavilə də imzalanıb. O cümlədən, Rusiya ilə Azərbaycan arasında da belə müqavilə mövcuddur.
Artıq Azərbaycan Türkiyə və Rusiya ilə yanaşı Özbəkistanla da strateji müttəfiq olub. Maraqlıdır, Türkiyə və Özbəkistandan sonra Qazaxıstan, Qırğızıstan və Türkmənistan və Çinlə də belə bir müqavilə imzalana bilərmi? Çünki bu ölkələrin bəziləri ilə Azərbaycanın arasında strateji tətəfdaşlıq münasibətləri mövcuddur.
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, Azərbaycanın Özbəkistanla belə bir sənəd imzalaması, əslində mövcud olan münasibətlərimizin rəsmiləşdirilməsi kimi qəbul edilə bilər: "Çünki son illər Özbəkistan bütün platformalarda özünü Azərbaycanın strateji müttəfiqi kimi aparıb. Məhz Özbəkistanın dəstəyi nəticəsində Ermənistan KTMT-də Azərbaycanın əleyhinə heç bir qərar qəbul etdirə bilmədi. Təbiidir ki, burada Azərbaycanın KTMT-dəki digər dostlarının da rolu az olmayıb. Paşinyan çalışırdı ki, hərbi blok Azərbaycana münasibətdə öz mövqeyini ortaya qoysun. Ancaq KTMT üzvləri buna dəstək vermədi. Bu istiqamətdə bizə dəstək ifadə edənlərdən biri də, təbiidir ki, Özbəkistan idi. Hətta Ermənistanın ev sahibliyi etdiyi tədbirdə belə buna nail olunmadı. Ev yiyəsi öz tədbirini pozmalı oldu. Adətən ev sahibləri tədbirin uğurlu keçməsi üçün əllərindən gələni edir. Özbəkistan çox az dövlətlərdəndir ki, Azərbaycanın işğaldan azad edilən ərazilərindəki quruculuq işlərində yaxından iştirak edib. Çox təəssüf ki, belə nümunələr azdır. Ancaq dost, qardaş köməyi və belə bir nümunənin olması çox vacibdir. Müqavilənin imzalanması bundan sonrakı münasibıtlərimizi daha da inkişaf etdirəcək. Şübhə yoxdur ki, dövlətlərimiz bundan sonra daha da sıx əməkdaşlıq edəcək. Bundan əvvəl Azərbaycan Türkiyə və Rusiya ilə də belə sənəd imzalayıb. Bunların hər ikisi müttəfiqlik sənədi olsa da, eyniləşdirmək qeyri-mümkündür. Şuşa Bəyannaməsi Türkiyə ilə olan qardaşlığımızı rəsmiləşdirdi. Moskvada imzalanmış sənəd isə daha çox indiki mürəkkəb dövrdə bizim təhlükəsizliyimizi təmin etdi.
Ümid edə bilərik ki, bundan sonra strateji müttəfiqlərimizin sayı artacaq. Bu cür sənədin gələcəkdə Pakistan və digər türk dövlətləri ilə imzalanma ehtimalı çox yüksəkdir. Belə sənədlərin imzalanması Azərbaycanın gücünü daha da artıracaq".
Məhəmmədəli QƏRİBLİ
