Ramil Hüseynov: "Mandatın bərpası ilə bağlı verilən sözün tutulmaması siyasi riyakarlıqdır"
Məlum olduğu kimi, Avropada müəyyən siyasilər ənənəvi olaraq qərəzli mövqedən çıxış edərək Azərbaycanı hədəf alırlar. Avropa İttifaqının (Aİ) xarici siyasət və təhlükəsizlik məsələləri üzrə mətbuat katibi Peter Stano və Almaniya Parlamentinin üzvü Frank Şvabe bu məsələdə daha çox canfəşanlıq edirlər. Azərbaycanda keçiriləcək parlament seçkilərinə Avropa Şurası Parlament Assambleyasının müşahidəçilərinin dəvət ediməməsinə görə ölkəmizi ittiham edirlər.
Azərbaycan Xarici İşlər Nazirliyinin açıqlamasından bəlli olur ki, bunun səbəbi AŞPA-da Azərbaycan nümayəndə heyətinin mandatının bərpa edilməməsi ilə əlaqədardır. Məsələ ondadır ki, ölkəmizə siyasi səviyyədə verilən vədlərə baxmayaraq, Azərbaycan nümayəndə heyətinin mandatı hələ də bərpa edilməyib. Halbuki, bununla bağlı bir sıra vədlər verilib, amma yerinə yetirilməyib. Üstəlik, Almaniya siyasi rəhbərliyi də bununla bağlı söz verib, amma sözlərini tutmayıblar. Məhz buna görə Azərbaycan keçiriləcək parlament seçkilərini izləmək üçün AŞPA müşahidəçilərini dəvət etməyib. Söhbət bəzi Avropa dövlətlərinin və o cümlədən, Almaniya siyasi rəhbərliyinin Azərbaycanın qurumda mandatının bərpasına söz verib icra etməməsindən gedir.
"AŞPA Azərbaycan nümayəndə heyətinin mandatını qərəzli şəkildə dondurubsa, o zaman biz..."
Sözügedən məsələni "Bakı-Xəbər"ə şərh edən "Yeni Xətt" Siyasi Tədqiqatlar Mərkəzinin rəhbəri Ramil Hüseynovun fikrincə, bütün bunlar onların riyakarlığından xəbər verir: "Azərbaycan əraziləri uzun illər Ermənistanın işğalı altında oldu. Həmin o deputatlar bir dəfə buna kəskin etiraz etmədilər. Hər dəfə erməni vandalizmini görməzdən gəldilər. İnsan haqlarından, ali dəyərlərdən dəm vuran Avropa təsisatları qaçqın və məcburi köçkünlərin üzləşdiyi istirabları görməzdən gəldilər. Fransada miqrantların, ölkə vətəndaşlarının hüquqları kobud şəkildə pozulur. Ancaq hansısa səviyyədə bu, AŞPA-da müzakirə predmetinə çevrilmir. AŞPA bu məsələdə lal və kor olur. Ancaq Azərbaycana gəldikdə isə, bütün qərəzli mövqedən çıxış edən qüvvələr bizə qarşı birləşir. AŞPA Azərbaycan nümayəndə heyətinin mandatını qərəzli şəkildə dondurubsa, o zaman biz oradan müşahidəçiləri seçkiləri izləmək üçün necə dəvət edə bilərik? Bunu nəinki Azərbaycan, özünə hörmət edən heç bir ölkə etməz. Çünki aydın məsələdir ki, AŞPA-dan gələn müşahidəçilər qərəzli mövqedən çıxış edərlər. Seçkidə gördüklərini təhrif edəcəklər və buna qərəzli siyasi don geyindirəcəklər. Zatən bu, illərdir bizə məlum olan məsələdir. O cümlədən, mandatın bərpası ilə bağlı verilən sözün tutulmaması siyasi riyakarlıqdır. Bu cür qüvvələrə etibar etmək olmaz".
Vidadi ORDAHALLI
