Aydın Mirzəzadə: "Hindistan Ermənistana maliyyə və hərbi kömək etsə də, hindistanlılar o ölkəyə axın etmir"
Bu ilin yanvar-iyul aylarında Azərbaycana 182 ölkədən 1 milyon 502,7 min və yaxud ötən ilin eyni dövrü ilə müqayisədə 31,4 faiz çox əcnəbi və vətəndaşlığı olmayan şəxs gəlib.
Dövlət Statistika Komitəsindən verilən məlumata görə, gələnlərin 29,2 faizi Rusiya, 16,5 faizi Türkiyə, 9,3 faizi Hindistan, 8,3 faizi İran, 4,2 faizi Səudiyyə Ərəbistanı, 4 faizi Gürcüstan, 3,2 faizi Qazaxıstan, 2,7 faizi Pakistan, hər birindən 1,7 faiz olmaqla Özbəkistan və Birləşmiş Ərəb Əmirlikləri (BƏƏ), 1,5 faizi Çin, hər birindən 1,3 faiz olmaqla Ukrayna və Küveyt, 1,2 faizi Türkmənistan, hər birindən 1,1 faiz olmaqla İsrail və Oman, 1,faizi Belarus, 10,7 faizi digər ölkələrin vətəndaşları olub. Gələnlərin 67,1 faizni kişilər, 32,9 faizini qadınlar təşkil edib.
Açıqlanan statistik rəqəmlərdən də bəlli olur ki, ölkəyə gələn turistlər arasında hindistanlılar üstünlük təşkil edir.
Onu da qeyd edək ki, Hindistan Ermənistanı silahlandırır. Hindistan dövləti, elitası Ermənistanı silahla təmin edir, ancaq sadə vətəndaşları səhayət, istirahət üçün ölkəmizi seçir.
"Sadə hindistanlıların Azərbaycana səfərləri, Azərbaycanı daxildən tanıması ölkəmiz haqqında düşüncələri dəyişir"
Millət vəkili Aydın Mirzəzadə "Bakı-Xəbər"ə şərhində bildirdi ki, Hindistan Pakistanın Azərbaycanla yaxın dostluğuna görə Ermənistana daim dəstək olur. Hindistan Ermənistanı silahlandırır, hətta kreditlə belə silah satır: "Beynəlxalq təşkilatlar, bir qayda olaraq, Azərbaycanın ərazi bütövlüyü əleyhinə çıxışlar edir. Ancaq bütün bunlara rəğmən, Hindistan cəmiyyəti Azərbaycana böyük maraq göstərir. Cari ilin 5 ayı ərzində Hindistandan ölkəmizə 100 mindən çox turist gəlib. Bu, bir gündə 700 nəfər Hindistan vətəndaşının Azərbaycana səyahət etməsi deməkdir: "Onlar turist kimi Azərbaycana səhayət edir, hindistanlı iş adamları da ölkəmizə maraq göstərir. Həmçinin, humanitar əlaqələrə görə də ölkəmizə təşrif edən hindistanlılar az deyil. Hindistan Ermənistana maliyyə və hərbi kömək etsə də, hindistanlılar o ölkəyə axın etmir. Ermənistan nə iqtisadi, nə də turist cəlbediciliyi baxımından Hindistanda o qədər məşhur deyil. Prinsip etibarı ilə Ermənistan dünya üçün də önəmli ölkə deyil. Ermənistanın dünya siyasəti, iqtisadiyyatı, mədəniyyətində elə bir böyük çəkisi yoxdur".
Siyasi şərhçi hesab edir ki, sadə hindistanlıların Azərbaycana səfəri, Azərbaycanı daxildən tanıması ölkəmiz haqqında düşüncələri dəyişir. Beləliklə, ölkəmizə səyahət edən hind turistlər Azərbaycan haqqında obyektiv fikirlər formalaşdırır. Hindistan hökuməti nə vaxtsa Azərbaycanın ədalətli mövqeyini qəbul edəcək.
Günel CƏLİLOVA
