Rəsul Cahangirli: "Rusiyanın bu ölkəyə iqtisadi təzyiq imkanları inanılmaz dərəcədə böyükdür"
Rusiya mağazalarında satılan erməni konyaklarının, demək olar ki, 90%-nin təhlükəli olduğu ortaya çıxıb, eyni zamanda məhsulların yarısında üzümdən hazırlanmayan spirtlər var.
TASS-ın yaydığı məlumata görə, bu barədə "Antikontrafakt" beynəlxalq assosiasiyası, Rusiya Federasiyasının Konyak, Spirtli içkilər və Alkoqollu Məhsullar İstehsalçıları İttifaqının birgə araşdırmasında deyilir. Tədqiqat üçün Ermənistanın 10 ən böyük istehsalçısından 20-dən çox brendin 200 konyak nümunəsi götürülüb. Nümunələr Rusiyanın əksər federal pərakəndə satış şəbəkələrinin mağazalarında alınıb və analiz olunmaq üçün Ümumrusiya Pivə, Alkoqolsuz və Şərabçılıq Sənayesi Elmi-Tədqiqat İnstitutunun müstəqil laboratoriyasına təqdim edilib. "Onlardan 177-də, yəni 89%-də 10 nümunədən 9-da pozuntular aşkar edilib. Demək olar ki, yarısında isə qeyri-üzüm mənşəli spirtlər aşkarlanıb. İçkini konyak edən isə məhz üzüm mənşəli spirtlərdir. Yalnız 23 nümunənin dövlət standartlarına və Rusiya Federasiyasının qanunvericiliyinə tam uyğun olduğu ortaya çıxdı", - deyə araşdırmada qeyd edilib.
Deyəsən, nəhayət Ermənistana qarşı Rusiya iqtisadi təsir rıçaqları işə düşür. Bu, həm də 2006-cı ildə Rusiyanın Saakaşvilinin rəhbərlik etdiyi Gürcüstana sanksiyalar tətbiq etməsinə çox bənzəyir. O zaman iki ölkə arasında gərgin münasibətlər səbəbindən Rusiya "Borjomi" sularına və gürcü konyakına qadağa qoydu. Əsas da bu idi ki, keyfiyyət tələblərinə cavab vermir. Ancaq Ermənistan məhsulları ilə bağlı bu kimi addımlar heç bir nəticə verməyə də bilər. Çünki əvvəllər də buna bənzər hallar olub, amma Rusiya son anda geri addım atıb. Yəni münasibətlər düzələn kimi, erməni konyakının keyfiyyəti "yaxşılaşar". Ümumilikdə, hazırkı şəraitdə konyak da daxil Rusiyanın əlində Ermənistana kifayət qədər iqtisadi təzyiq rıçaqları varmı? Bütün təzyiq rıçaqlarını işə salsa, bu, Ermənistana nə dərəcədə təsir göstərəcək?
"Ermənistanda istehsal olunan kənd təsərrüfatı məhsullarının 90 faizindən çoxu Rusiyaya satılır"
Sözügedən məsələni "Bakı-Xəbər"ə şərh edən ekspert Rəsul Cahangirlinin fikrincə, Rusiyanın Ermənistana çoxsaylı iqtisadi təzyiq rıçaqları imkanı var: "Ən başlıcası, Rusiya Ermənistan üçün böyük bazardır. Ermənistanda istehsal olunan kənd təsərrüfatı məhsullarının 90 faizindən çoxu Rusiyaya satılır. Nəinki konyak, meyvə, süd məhsulları, tərəvəz, heyvandarlıq və digər aqrar məhsullar Rusiyada realizə olunur. Rusiya bu məhsullardan imtina etsə, Ermənistanın kənd təsərrüfatı çökər. Çünki başqa alıcısı yoxdur. Tutaq ki, Türkiyə ilə sərhədlər açıldı. Ermənistan ora aqrar məhsul ixrac edə bilməz. Çünki Türkiyə ilə rəqabət apara bilməz. Ona görə ki, Ermənistanda istehsal olunan bütün məhsullar Türkiyədə istehsal olunur. Avropa İttifaqının isə Ermənistanın aqrar məhsullarına ehtiyacı yoxdur. Rəqabət nöqteyi-nəzərindən isə danışmağa dəyməz. Çünki Ermənistan o səviyyədə deyil. Digər tərəfdən, Rusiya uzun illərdir Ermənistana ucuz qaz ixrac edir. Rusiya xaric ikinci elə bir ölkə təsəvvür belə etmək mümkün deyil ki, Ermənistana ucuz qaz ixrac etsin. Hələ Ermənistanın Rusiyaya reeksport hesabına milyardlar qazandırdığını demirəm. Bir sözlə, Rusiyanın Ermənistana iqtisadi təzyiq imkanları inanılmaz dərəcədə böyükdür. Rusiyanın bundan hansı həddə qədər istifadə edəcəyini İrəvanın siyasi addımları göstərəcək. Ermənistan Avrasiya Birliyi və KTMT-dən çıxsa, bütün bunlar işə düşəcək".
Vidadi ORDAHALLI
