Rəşad Bayramov: "Paşinyanın Azərbaycanın dəvətinə hansı formada cavab verəcəyi özündən asılı deyil"
Bakının İrəvana göndərdiyi COP29 dəvətinə Baş nazir Nikol Paşinyanın məzuniyyətdən sonra keçirəcəyi ilk mətbuat konfransında münasibət bildiriləcək. Bu barədə Ermənistan hakimiyyətində adı açıqlanmayan mənbə erməni mediasına bildirib.
Nəşr yazır ki, Bakıda keçiriləcək sammitdə iştirak üçün Ermənistanın xarici işlər naziri Ararat Mirzoyanın adına rəsmi dəvət göndərilib. Lakin İrəvan hökuməti hələ də susur.
Hakimiyyətdəki mənbə Ermənistan rəhbərliyinin məsələ ilə bağlı qərar verdiyini, sadəcə ictimaiyyətin kəskin reaksiyasından ehtiyat etdiyini açıqlayıb.
Digər bir iddiaya görə isə, Qərb COP29-dan əvvəl Bakı ilə sülh müqaviləsi imzalanması üçün İrəvana təzyiqləri gücləndirib. Ermənistana sazişin imzalanması üçün noyabrda keçiriləcək sammit fürsətindən istifadə etməsi tövsiyə olunub.
Paşinyanın 15 avqustdan sonra Bakının dəvətinə cavab verəcəyi haqda bundan öncə də məlumat yayılmışdı.
Ermənilərin əllərinə düşən hər bir fürsətdən istifadə etməsi nəyin əlaməti sayıla bilər və Paşinyan niyə bu məsələ ilə bağlı konkret qərar vermək istəmir?
Politoloq Rəşad Bayramov "Bakı-Xəbər"ə açıqlamasında bildirdi ki, Ermənistan tərəfinin Azərbaycanın COP29 - a dəvətini qəbul edib-etməməsi bizim üçün elə də əhəmiyyət kəsb etmir: "Amma ev sahibi olaraq biz bütün ölkələrə bu istiqamətdə müvafiq dəvətlərimizi göndərmişik. İndi isə top Ermənistan tərəfdədir. Ermənistan tərəfi ya dəvəti qəbul edib Azərbaycanla münasibətlərin normallaşması istiqamətində addım atmağa səylər göstərməklə səmimi olduğunu ortaya qoyacaq və yaxud da dəvəti qəbul etməyərək, növbəti dəfə Ermənistanda tək-tək ictimai rəydə deyil, hakim komandanın özündə də hansısa revanşist hisslərin qaldığını ortaya qoyacaq. Təbii ki, Qərb üçün bu gün Paşinyanın Azərbaycanın dəvətini qəbul etməsi ilə bağlı yekdil bir fikri yoxdu. Hələ də Qərbdə ayrı-ayrı dairələr Azərbaycanla Ermənistanın münasibətlərinin gərgin qalmasında maraqlıdırlar. Bu gərginlik fonunda öz maraqlarını təmin etməyə cəhd göstərirlər. Bir qisim güclər isə belə hesab edir ki, bu münasibətlərin normallaşması, sülh sazişinin imzalanması nə qədər tez baş verərsə, nəticə etibarı ilə sonrakı addımların atılması, Rusiyanın Ermənistandan, Canubi Qafqazdan sıxışdırılıb çıxarılması üçün real addımlar atmaq daha asan olar. Bu baxımdan düşünürəm ki, Paşinyan havadarlarının yekdil fikirdə olmamasına görə konkret nəsə demək gücündə deyil. Vaxt qazanmaqla məsləhətləşmələrini davam etdirir. Əgər ümumi qərar Ermənistanın Bakıda keçiriləcək COP29-a qatılması ilə bağlı olacaqsa, Paşinyan da müvafiq olaraq mətbuat konfransında bu məsələyə münasibət bildiricək. Əgər COP 29-a dəvət havadarları tərəfindən müsbət qarşılanmayacaqsa, o da başqa bəhanələr gətirməklə bundan yayınacaq. Paşinyan müstəqil qərar vermək qabiliyyətində olmadığına görə, Azərbaycanın dəvətinə hansı formada cavab verəcəyi də özündən asılı deyil".
Azərbaycan energetika nazirinin müavini, bu ilin noyabr ayında Bakıda keçiriləcək BMT-nin İqlim Dəyişmələri üzrə Çərçivə Konvensiyasının (UNFCCC) Tərəflər Konfransının 29-cu sessiyasının (COP29) baş icraçı direktoru Elnur Soltanov deyib ki, Azərbaycan COP29-da bütün dünyaya atəşkəslə bağlı çağırış edəcək.
E.Sultanov xatırladıb ki, Ermənistan da COP29-a dəvət edilib:
"Təxminən 80 min qonağımız olacaq. Dünyanın bütün prezidentlərinə dəvət göndərilib. 50-dən çox dövlətdən nazirlər gələcək. Bu rəqəmin artacağı da gözlənilir. COP29 Azərbaycanın indiyə kimi ev sahibliyi etdiyi digər bütün tədbirlərlə müqayisə edilməyəcək tədbir olacaq. İqlim müzakirələrinə liderlik edəcəyik. Azərbaycanın qonaqpərvərliyini ortaya qoyacağıq. COP-un uğursuz olma ehtimalı yoxdur".
Məhəmmədəli QƏRİBLİ
