Elyar İslamoğlu: "Fransa-Azərbaycan Universitetinin ləğv edilməsi məsələsi ictimai çağırışdır…"
Azərbaycanda Rusiya-Azərbaycan universitetinin açılması ideyası müzakirə olunur. Bunu Prezident Vladimir Putin Azərbaycan Prezidenti İlham Əliyevlə mətbuata birgə bəyanatında bildirib. Rusiya tərəfdən layihədə Sankt-Peterburq Dövlət Universiteti iştirak edə bilər.
Bakıda Rusiyanın Lomonosov adına Moskva Dövlət Universitetinin, Birinci Tibb Universitetinin filialı var. Bu da yeni bir universitet olacaq.
Bilirik ki, ölkəmizdə həm də Fransa-Azərbaycan Universiteti fəaliyyət göstərir. Təkliflər var ki, Fransa-Azərbaycan Universitetini bağlayıb, yerində barəsində danışlan ali məktəbi açmaq olar.
Fransa-Azərbaycan Universitetini bağlayıb, onun yerində Rusiya-Azərbaycan Universitetini açmaq olarmı?
"Fransız universitetinin yerini Rusiya – Azərbaycan Universitetinin tutması daha uyğundur"
Filologiya üzrə fəlsəfə doktoru, elm və təhsil üzrə ekspert Elyar İslamoğlu "Bakı-Xəbər"ə bildirdi ki, Fransua Ollandın Fransa prezidenti olduğu dövrdə 2014-cü ildə Azərbaycana səfəri zamanı Azərbaycanın və Fransanın Təhsil Nazirlikləri arasında iki ölkənin elmi əlaqələrinin gücləndirilməsi məqsədilə universitetlər arasında memerandum imzalanıb. O qeyd etdi ki, Ollandın 2015-ci ildə Azərbaycana növbəti rəsmi səfəri zamanı isə iki ölkənin Təhsil Nazirlikləri arasında yeni bir razılaşma əldə olundu və həmin ilin 15 may tarixində Prezident İlham Əliyevin fərmanı ilə bu təsdiq olundu, 2016-cı ildə Fransız-Azərbaycan (Fransa-Azərbaycan) Universitetinin yaradılması barədə İlham Əliyev sərəncam verib. "Elə həmin vaxtdan da Fransa-Azərbaycan Universiteti Azərbaycanda fəaliyyət göstərir. Amma çox təəssüflər olsun ki, Ollandın dövründə olan Azərbaycan-Fransa əlaqələri hazırda başqa bir yöndədir. Fransanın indiki prezidenti Makron bu münasibətləri tamamilə korlayıb. Makron Azərbaycana qərəzli, qeyri-obyektiv münasibət bəsləyir, siyasəti bu yöndədir, o, bizim torpaqları 30 il işğalda saxlayan Erməninstanın tərəfini saxlayır, ermənipərəst mövqe sərgiləyir. Bunu biz Fransa hökumətinin Azərbaycan şairəsi, Qarabağın sonuncu hakimi Mehdiqulu xan Cavanşirin qızı, İbrahimxəlil xanın nəvəsi, bizim üçün böyük bir dəyər olan Xurşudbanu Natəvanın heykəlinə göstərdikləri vandalizm hərəkətlərində də yaxından müşahidə etdik. Fransa hazırda Ermənistanı silahlandırmaqla, onu yenidən Azərbaycan torpaqlarını işğal etməyə həvəsləndirməklə məşğuldur. Belə olduğu halda Fransız-Azərbaycan Universitetinin fəaliyyət göstərməsi məsələsinə yenidən baxılmalıdır. Bu universitetin məzunlarının gələcəkdə hansı ölkənin maraqlarına xidmət edəcəyi araşdırılmalıdır. Belə bir ölkənin Azərbaycanda universitetinin olması məsələsinə yenidən baxılmalıdır və hesab edirəm ki, o ali məktəb artıq öz fəaliyyətini dayandırmalıdır. Nə vaxt ki, Azərbaycan-Fransa əlaqələri əvvəlki axarına düşəcək, o zaman yenidən Azərbaycan-Fransa Universitinin fəaliyyət göstərməsinə baxmaq olar. Amma indiki halda bizim o universitetə ehtiyacımız yoxdur.
Qaldı ki, ölkəmizdə Azərbaycan-Rusiya Universitetinin açılmasına, bilirik ki, burada Rusiyanın bir neçə ali məktəbinin filialı var.
Fikrimcə, Fransız – Azərbaycan Universitetindənsə, burada Rusiya-Azərbaycan Universitetinin fəaliyyət göstərməsi daha uyğun olar. Fransa-Azərbaycan Universitetinin ləğv edilməsi məsələsi ictimai çağırışdır, ölkə ictimaiyyəti istəmir ki, bizə düşmən ölkənin ali məktəbi burada fəaliyyət göstərsin. Vəziyyətin bu şəklə düşməsinin günahkarı Makronun apardığı qərəzli siyasətdir. Ona görə də, onun yerini Rusiya-Azərbaycan Universiteti tutsun. Təklif edərdim ki, Rusiyada da Azərbaycan Universiteti olsun. Buna da böyük zərurət var. Çünki Rusiyada bizim 2 milyondan artıq soydaşımız yaşayır, onların övladları bu ali məktəbdə təhsil alsınlar".
E.İslamoğlu hesab edir ki, təhsil əlaqələri qarşılıqlı olmalıdır, Rusiyada da Azərbaycan dilində təhsilə yer ayrılmalıdır. "İndiyə qədər Rusiyada Azərbaycan dilində bir ali məktəbə, orta məktəbə rast gəlməmişəm. Bu məsələyə baxılması çox vacibdir. Eyni zamanda da, qeyd etdiyim kimi, fransız universitetinin yerini Rusiya – Azərbaycan Universitetinin tutması daha uyğundur"-deyə E.İslamoğlu qeyd etdi.
İradə SARIYEVA
