Ramiyyə Məmmədova: "Paşinyan mümkün olmayan tələbi ortaya atıb ki, Zəngəzur dəhlizinin açılmasından yayınsın"
Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə Ermənistan XİN-in Sergey Lavrovun Bakıda "Ermənistan 10 noyabr üçtərəfli razılaşmasını sabotaj edir" açıqlamasına şərhinə münasibət bildirərkən deyib ki, bu, İrəvanın günahı başqalarının üzərinə atmasının daha bir nümunəsidir.
Onun sözlərinə görə, Ermənistan üçün əsas öz uğursuzluqlarına görə başqalarını günahkar çıxarmaqdır.
Zaxarova 10 noyabr 2020-ci il tarixli üçtərəfli bəyanatın 9-cu bəndini bir daha Ermənistan tərəfinə xatırladıb. Bildirib ki, kommunikasiyaların açılması üçün görülən böyük iş İrəvanın sərhəd nəzarəti məsələlərində qeyri-bərabərliyi və Rusiya sərhədçilərinin Ermənistan və Azərbaycan tərəfində olmasında təkid etdiyi üçün dayanıb:
"Biz Ermənistan XİN-in Rusiya Xarici işlər naziri Sergey Lavrovun dediklərinə reaksiyasını görmüşük. Bu, İrəvanın öz səhvinə görə günahı başqalarının üzərinə atmasının daha bir nümunəsidir, indiki halda Rusiyanın…Biz görürük ki, onlarda siyasət elə bir şəkildə müəyyən olunub ki, öz uğursuzluqlarına görə günahkar kimsə tapılmalıdır. Mən 9 noyabr 2020-ci il bəyanatının 9-cu bəndinin necə səsləndiyini xatırladacam. Rusiya xarici işlər naziri Sergey Lavrov da dediklərində məhz buna istinad edib.
Zaxarova məlum bəyanatın, o cümlədən Ermənistan baş naziri Nikol Paşinyan tərəfindən imzalandığını xatırladıb.
O, İrəvanı qərbli dostlarının fitvasına gedərək Cənubi Qafqazda nəqliyyat kommunikasiyalarının açılması ilə bağlı üçtərəfli işçi qrupun işini dondurmaqda ittiham edib. Rusiya XİN sözçüsü vurğulayıb ki, beləliklə, İrəvan Rusiya Federasiyası Federal Təhlükəsizlik Xidmətinin sərhəd xidməti tərəfindən nəqliyyat axınına nəzarətdən imtina edib və faktiki olaraq işçi qrupda iştirakını dondurub.
Zaxarovanın bu açıqlamasından belə məlum olur ki, Paşinyan Azərbaycanda da rus sərhədçilərinin olmasını tələb edib. Onun bu tələbi hansı məqsədə çatmaq üçün olub?
Siyasi şərhçi Ramiyyə Məmmədova "Bakı-Xəbər"ə bildirdi ki, Ermənistan həm də o "arqumenti" ortalığa qoyur ki, bəhs edilən 10 noyabr bəyanatına əsasən ermənilərin Qarabağa gedib-gəlməsini təmin etməli olan Laçın "dəhlizi" də onlar üçün əhəmiyyətini itirdiyindən, sənədin Zəngəzura aid sözügedən bəndi də qüvvədən düşmüş hesab olunur: "Son vaxtlar Ermənistan içtimai rəyində belə fikirlərə çox rast gəlinir. Ermənilərin Laçın "dəhlizi" ilə bağlı paralel gətirməyə haqqı yoxdur, çünki bunlar tamam fərqli məsələlərdir. Biz ermənilərin Qarabağa gedib-gəlməsi üçün o dəhlizi vermişdik. Ancaq o da var ki, həmin yolun beynəlxalq əhəmiyyəti yox idi. Zəngəzur dəhlizinin açılmasında isə bütün dünya maraqlıdır. Ermənistan bu vəziyyətlə hesablaşmalıdır və başqa yolu da yoxdur. Qalib Azərbaycanın da şərtləri göz önündədir. Hər bir azərbaycanlı ölkəsinin bir yerindən digərinə maneəsiz, yoxlanışsız gedib-gəlməlidir. Biz erməniləri Laçın dəhlizi ilə gedib-gəlmələri üçün bu şəraitlə təmin etmişdik. Bunu dəyərləndirə bilmədilərsə, özləri günahkardır. İndi zəhmət çəkib, eyni şəraiti Naxçıvanla ələqələrimiz üçün yaratsınlar. Bu onların borcudur. Həm də ona görə ki, 9-cu bəndində həmin şərtin ehtiva olunduğu 10 noyabr 2020-ci il üçtərəfli bəyanatına imza atıblar. Hələ ötən ildən başlayaraq, Ermənistan çığallıq etməyə başladı.
Ermənistan Baş nazirinin müavini Mqer Qriqoryan yerli mətbuata açıqlamasında demişdi ki, ölkə ərazisindən keçən bütün marşrutlara birmənalı olaraq Ermənistan qanunvericiliyinə uyğun şəkildə nəzarət ediləcək.
Zəngəzur dəhlizinə Rusiya FTX-nın nəzarət edəcəyi barədə suala isə Qriqoryan ziddiyyətli cavab vermişdi: "Kim deyir ki, orada FTX dayanacaq? Birincisi, əgər 9 noyabr sazişini nəzərdə tutursunuzsa, nədən söhbət getdiyini anlatmaq üçün gəlin FTX tərkibindəki sərhəd qoşunlarından danışaq. İkincisi, hələ onların fuhksiyalarının reallaşdırılması forması ilə bağlı müzakirələr aparılmalıdır". Göründüyü kimi, ermənilər rus hərbçilərini ora buraxmaq istəməyib. Paşinyan bilir ki, Azərbaycan heç Avropa Birliyinin müşahidəçi missiyasının ölkə ərazisindəki fəaliyyətinə icazə vermədi. Təbiidir ki, biz Rusiya FTX-na da bu icazəni verməzdik. Hətta Qarabağa yerləşən sülhməramlıların belə vaxtından əvvəl ölkəni tərk etməsinə nail olduq. Deməli, Paşinyan keçməsi mümkün olmayan tələbi ortaya atıb ki, Zəngəzur dəhlizinin açılmasından yayınsın. Buna başqa ad vermək olmaz".
Məhəmmədəli QƏRİBLİ
