Avqustun 6-da Ukrayna ordusunun sərhədi keçərək Rusiyanın Kursk və digər bölgələrinə qəfil hücumlara başlamasından sonra bölgədə şiddətli toqquşmalar davam edir. Vaşinqtonda yerləşən Müharibənin Öyrənilməsi İnstitutu Ukraynanın üçüncü həftədir ki, genişmiqyaslı hücumlarında yeni irəliləyiş əldə etdiyini bildirib.
Rusiya isə bölgəni təkrar geri almaq üçün əks-hücumlarını davam etdirir. Rusiya döyüş təyyarələri və artilleriya ilə Kurskda Ukrayna qüvvələrini bombalayır. Rusiya ordusu Kursk vilayətində Ukrayna ordusu isə strateji körpüləri və obyektləri döyüş təyyarələri ilə dağıdaraq ruslarının Kurskda irəliləməsini dayandırmağa çalışır. Ukrayna Hərbi Hava Qüvvələri Kursk vilayətində 3 böyük körpünün vurulduğunu və Rusiya ordusunun keçidinin qarşısının alındığını açıqlayıb. Rus tank və maşınlarının Kurska doğru irəliləməsinin qarşısını almaq üçün bu taktikadan istifadə edən Ukrayna Hərbi Hava Qüvvələri əməliyyatlarda Qərb ölkələrindən tədarük edilən silah və sursatlardan istifadə edildiyini açıqlayıb.
Ukrayna Hərbi Hava Qüvvələrinin komandanı Nikolay Oleşçuk Ukrayna Hərbi Hava Qüvvələrinin döyüş təyyarələrinin AASM Hummer bombaları (Fransa tərəfindən Ukraynaya göndərilən bombalar) ilə rusların istifadə edə biləcəkləri keçidləri vurduqlarını deyib.
Bundan əvvəl Ukraynanın ABŞ-dan alınan HIMARS və JDAM raketlərindən Kursk şəhərində istifadə etdiyi, Almaniyadan alınan "Leopard" tanklarının da Kurska göndərdiyi xəbərləri yayılmışdı.
Rusiya isə Ukrayna ərazisində də hücumlarını gücləndirib. Ukraynanın Kurskda irəliləməsinə baxmayaraq, Donbas bölgəsində torpaqlarını itirməkdə davam edir.
Bu arada, Rusiya ABŞ muzdlularının Rusiya ərazisinə daxil olduğunu iddia edərək, ABŞ-ın Moskvadakı müvəqqəti işlər vəkili Stefani Holmsu Xarici İşlər Nazirliyinə çağırıb.
Nazirlik ABŞ muzdlularının Rusiya ərazisi olan Kurskda olmasına dair sübutların olduğunu və bunun ABŞ-ın Ukrayna müharibəsində birbaşa iştirak etdiyinə işarə edildiyinə diqqət çəkib.
Nazirliyin bununla bağlı açıqlamasında ABŞ jurnalistlərinin Kursk vilayətində olması da kəskin şəkildə pislənilib: "Açıq şəkildə qeyd olunub ki, ölkəmizin sərhədini qanunsuz keçən bütün xarici ekspertlər və muzdlular Rusiya Silahlı Qüvvələrinin qanuni hərbi hədəfinə çevriliblər".
Rusiyanın Xarici Kəşfiyyat Xidməti isə NATO ölkələrini Ukraynanın Kursk bölgəsinə hücumunun hazırlanmasında rol oynamaqda ittiham edib. Qeyd edilir ki, hücumun planlaşdırılmasında ABŞ, Böyük Britaniya və Polşanın kəşfiyyat xidmətləri iştirak edib. Rusiyanın kəşfiyyatı iddia edir ki, hücumda iştirak edən Ukrayna Silahlı Qüvvələrinin bölmələri İngiltərə və Almaniyadakı təlim mərkəzlərində hərbi təlim keçiblər. Həmçinin iddia olunur ki, NATO ölkələrinin hərbi müşavirləri Rusiya ərazisində əməliyyatlarda Ukrayna qoşunlarına bir başa rəhbərlik edirlər.
Həmçinin NATO ölkələrinin Rusiya hərbçilərinin bölgədəki mövqeləri ilə bağlı peyk kəşfiyyat məlumatlarını Ukrayna ordusuna ötürdüyü iddia edilir.
Qeyd edək ki, bundan əvvəl Belarus III Dünya Müharibəsinin başlayacağı ilə bağlı xəbərdarlıq edib. Belarus lideri Aleksandr Lukaşenko hətta Qərbi "dəhşətli nüvə hücumu" ilə hədələyib.
Lukaşenko Qərbin NATO əsgərlərini Ukraynaya göndərəcəyi halda 3-cü Dünya Müharibəsinin başlayacağını və bu halda həm taktiki, həm də strateji nüvə silahlarından istifadə ediləcəyini və buna qoxunc səviyyədə reaksiya veriləcəyini bildirib. O, NATO ilə döyüşmək istəmədiklərini, lakin dövlət sərhədləri keçilərsə, sərhədə ayaq basan kimi cavab verəcəklərini bildirib.
Kursk bölgəsinə hücuma görə Kiyevi günahlandıran Lukaşenko deyib ki, Ukrayna vəziyyəti gərginləşdirir: "Belə davam edərsə, bu gərginlik Ukraynanın məhvi ilə nəticələnə bilər".
TAHİR
