Nəhayət, Naxçıvan Mərkəzi Seçki Komissiyası (MSK) Naxçıvan Muxtar Respublikasının (NMR) Ali Məclisinə 1 sentyabrda keçiriləcək növbədənkənar seçkilərdə qeydə alınmış namizədlərin siyahısını öz saytına (nmsk.gov.az) yerləşdirib. 45 yerlik Ali Məclisə seçkilərdə Muxtar Respublikanın ali hakimiyyət orqanı formalaşacaq.
Seçiləcək yeni tərkib yeni sədr və müavinlərini seçəcək. Əksəriyyəti bitərəf olan namizədlər arasında fəaliyyət sahəsi kimi anbardar, bərbər, fərdi təsərrüfat işçisi, müəllim, sahibkar, maşinist, pensiyaçı, sürücü, elektrik mütəxəssisi, operator, gözətçi, tibb bacısı, işsizlər üstünlük təşkil edir.
Siyahıya göz gəzdirdikdə "parlaq" fiqurlar gözə dəymir. Fakt budur ki, bu namizədlər siyahısında öz nüfuzu, təcrübəsi, tərcümeyi-halı ilə Naxçıvana rəhbərlik etməyə layiq bilinəcək, ümumilikdə Naxçıvan camaatının yaxşı tanıdığı bircə nəfər belə yoxdur.
Hakim Yeni Azərbaycan Partiyası (YAP) Milli Məclisə seçkilərdən fərqli olaraq Ali Məclisə namizədlər irəli sürməyib. İqtidar partiyasından dairələr üzrə qeydə alınmış namizədlərin hamısı öz təşəbbüsü ilə namizədliyini irəli sürüb. Bütün seçki dairələrində YAP-ın namizədləri var, 3 dairədə isə iqtidar partiyasının 2, 34 saylı Şahbuz şəhər seçki dairəsində isə nə az- nə çox, 4 namizədi bir-biri ilə yarışacaq.
Bəs onda Ali Məclisin yeni sədri kim ola bilər?
Siyahıda adı olanlarda diqqəti bir nəfərin adı cəlb edir. YAP üzvü, Badamlı seçki dairəsindən namizədliyini irəli sürmüş NMR Ali Məclis sədrinin köməkçisi Ramiz Məmmədov 30 saylı Naxçıvan şəhər seçki dairəsindən namizəddir. Bu şəxs uzun müddət Vasif Talıbovun köməkçisi olsa da, Fuad Nəcəflinin dönəmində də öz postunu qoruyub saxlaya bilib. Onun adı sədrliyə iddialılar sırasında çəkilir.
Ali Məclis sədrliyinə potensial namizədlərdən biri kimi adı hallananlardan biri də Naxçıvan MR MSK-nın sabiq sədri Əjdər Əliyevdir. O, seçki öncəsi maraqlı gediş edib.
22 iyul 2024-cü il tarixdə keçirilmiş MSK-nın iclasında komissiyanın sədri Əjdər Zahid oğlu Əliyev öz ərizəsi əsasında sədr vəzifəsindən azad edilib.
Onun addımı bununla əsaslandırılıb ki, Əjdər Əliyev 1 sentyabr 2024-cü il tarixdə Ali Məclisə keçiriləcək növbədənkənar seçkidə deputatlığa namizədliyini irəli sürüb. "Naxçıvan Muxtar Respublikası Ali Məclisinə seçkilər haqqında" Naxçıvan Muxtar Respublikası Qanununun müvafiq maddəsinə əsasən, Ali Məclisin deputatlığına namizəd olduqda seçki komissiyası üzvünün səlahiyyətlərinə xitam verilir.
Ancaq Naxçıvandakı proseslərə yaxından bələd olan, adının çəkilməsini istəməyən bir mənbəmiz Ali Məclisin sədri ola biləcək ən potensiallı adamın adını bizə dedi. Onun sözlərinə görə, bu posta ən real namizəd kimi Naxçıvan Müəllimlər İnstitunun rektoru, Pedaqogika üzrə fəlsəfə doktoru, dosent Novruzov Azad Sevindik oğlunun adı hallanır. İş burasındadır ki, bu şəxsin vəzifəyə seçilməsinə səlahiyyətli nümayəndə Fuad Nəcəfli də loyal yanaşır. Rektor 1965-ci il 01 iyun tarixdə Naxçıvan Muxtar Respublikası Şahbuz rayonunun Aşağı Qışlaq kəndində anadan olub.
Ən maraqlısı budur ki, Vasif Talıbov və Azər Zeynalovdan sonra Ali Məclisə rəhbərlik edən Anar İbrahimovun adı heç deputatlığa namizədlərin siyahısında belə yoxdur. İstənilən halda, Ali Məclisə rəhbər seçiləcək şəxs vaxtilə bu postu tutmuş sələflərindən daha çox tanınan şəxs olmayacaq…
Məhəmmədəli QƏRİBLİ
