Turab Rzayev: "Türkiyə açıq şəkildə Rusiyanın Cənubi Qafqazdakı bütün iddialarını dəstəkləmir"
Rusiya xarici işlər nazirinin müavini Mixail Qaluzin Türkiyənin səfiri Tanju Bilgiç ilə görüşündə Ankaranı Qərbin Ukrayna ilə bağlı destruktiv siyasətində iştirakdan imtina etməyə çağırıb. Bu barədə Rusiya Xarici İşlər Nazirliyi məlumat yayıb.
Görüş zamanı Qaluzin Ukraynanı Qərb silahları ilə təmin etməyin yolverilməz olduğunu bəyan edib.
Onun sözlərinə görə, bu, münaqişəni yalnız uzadır və insan tələfatına səbəb olur. Maraqlıdır, Türkiyənin hansı addımları Rusiyanı belə qıcıqlandıra bilər?
Siyasi şərhçi Turab Rzayev "Bakı-Xəbər"ə açıqlamasında bildirdi ki, bu məsələdə bir neçə fərqli məqam var: "Rusiyanı narahat edən amillərdən biri Türkiyənin Ukraynaya özünün birbaşa silah satmasıdır. Rusiya buna dəfələrlə öz etirazını bildirib. Burada əsas söhbət Türkiyənin Ukraynaya göndərdiyi pilotsuz uçuş aparatları və zirehli döyüş maşınlarından gedir. Əgər əvvəldə Rusiya bu silahları test etmək istəyirdisə və düşünürdü ki, Ukraynanı tez bir zamanda işğal edəcək, yanıldığını gördü. Müharibənin uzanması Rusiyanı daha çox qıcıqlandırmağa başlayıb. Rusiya kim Ukraynaya silah satırsa, hamısına qəzəblidir və bunu açıq ifadə edir. Onlar vaxtıilə düşünürdülərsə ki, Ukraynaya gələn silahlar onlara heç bir problem yaratmayacaq, artıq müharibənin Rusiya ərazisinə keçdiyini görürlər. Başqa bir nüans odur ki, Türkiyə son vaxtlar Qərblə bağlı siyasətində müəyyən korrektələr edir. İqtisadi cəhətdən Rusiyaya sanksiyalar qoyulub. Rusiyaya bu yöndə kömək edən türk şirkətlərinə Qərbin təzyiqləri artıb. Buna görə də Türkiyə Rusiya ilə daha ehtiyatla ticarət edir. Hətta ucuz qiymətə olmasına baxmayaraq, Rusiyadan neft almaqsan imtina edirlər. Moskva Türkiyəni bundan daha artıq öz yanında görməyə çalışır. Digər məqam isə Türkiyənin Cənubi Qafqaz siyasəti ilə bağlı ola bilər. Türkiyə açıq şəkildə Rusiyanın Cənubi Qafqazdakı bütün iddialarını dəstəkləmir. Konkret olaraq Türkiyənin Ermənistanla münasibətlərini normallaşdırmaq istiqamətində addımlarını görürük. Bu da Rusiyanın bölgədən çıxarılması kimi planlara yardım edə bilər. Rusiya bütün bu faktorları nəzərə aldığı üçün belə sərt davranış nümayiş etdirir".
Dünya mediasında belə məlumatlara rast gəlinir ki, Türkiyə ilə Rusiyanın maraqları Suriya məsələsində də üst-üstə düşmür. Türkiyə Suriyadakı müxalif qüvvələri dəstəkləyirdi, amma Bəşər Əsədin hakimiyyətdə qalması ilə razılaşmağa məcbur oldu. Rusiya da artıq Suriya məsələsində Türkiyə ilə razılığa gəlir, çünki Türkiyə terrorçulara qarşı əməliyyatlarla onları öz sərhədlərindən uzaqlaşdırmağa müvəffəq olur. Danışıqlardakı məsələlərdən biri də terror təşkilatları ilə bağlıdır. Suriya terrorçuların Türkiyənin sərhədlərindən uzaqda olmasını təmin edəcək və onların Türkiyə tərəfinə keçməsinə icazə verilməyəcək. Bu barədə tərəflər arasında müzakirələr davam edir.
Türkiyə tələb edir ki, Suriya konstitusiyasında təhlükəsizlik, terror təşkilatları ilə bağlı məsələlər qeyd olsun, sərhədlər qorunsun. Görünür, Rusiyanın bu məsələyə baxışı fərqlidir.
Məhəmmədəli QƏRİBLİ
