Nikol Paşinyan müsahibəsində Ermənistanın Rusiyanın 2022-ci ilin avqustunda Ermənistan-Azərbaycan nizamlanmasına dair təklifi ilə razılaşmağa hazır olduğunu açıqlayıb.
Paşinyanın sözlərinə görə, Vaşinqtonda başlayan müzakirə Moskvada davam etdirilə bilər. Eyni zamanda o, Qərb və Rusiyanın bir-birindən fərqlənən layihələrinin olması ilə bağlı iddiaları təkzib edib:
“Bəzən materiallar oxuyuram, müsahibələri dinləyirəm, insanların nə danışdığını anlamaq istəyirəm. Baş nazir olmasaydım, fikirləşərdim ki, nədənsə xəbərim yoxdur”, - deyən Paşinyan Qərbdən yanaşmaların olduğunu, ancaq kağız üzərində yazılmış variant olmadığını bildirib:
“Yanaşma şifahidir və əgər biz onu kağıza köçürsək və oxusaq, səhv başa düşüldüyü ortaya çıxa bilər, bu qətiyyən doğru deyil. 2022-ci ilin avqustunda Rusiya tərəfi yazılı təklif verdi, biz qəbul etdik, Azərbaycan rədd etdi. Biz Rusiyanın ikinci dəfə bu variantı masaya qoyduğunu görməmişik”
Soçidə belə bir cəhd olubmu sualına aydınlıq gətirən Paşinyan cavabını təkrarlayıb ki, Moskva artıq belə cəhd etmir:
“O, masaya qoyulan anda biz onun üzərində irəliləməyə hazırıq”.
Maraqlıdır, ermənilər Vaşinqton görüşündən dərhal sonra Rusiyanın 2022-ci ildə təklif etdiyi sülh layihəsinə niyə yenidən qayıtmaq istəyir?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Ermənistanın mövqeyi, onun bir cinahdan digər cinaha atılması, təlatümlü və məntiqsiz hərəkətləri onu göstərir ki, Ermənistan iki yol arasında qalıb: “Onlar daim çalışır hər hansı bir tərəfdən imtiyaz alsın ki, ona xarici dəstək götürəcəyi ilə bağlı qarantiya verilsin. Bu Rusiya da ola bilər, Qərb də, üçüncü dövlət də. Onlar seçim edirlər. Bu müqayisəli yanaşma kiməsə rasional görünə bilər. Amma mənə elə gəlir ki, bu çox qeyri - peşəkar bir yanaşmadır. Çünki ölkənin özünün, xüsusilə siyasi regionla bağlı milli prioritetləri olmalıdır ki, onların fonunda çıxış yolu müəyyən etsin. Biz görürük ki, bu ölkənin özünün heç bir məntiqi yanaşması yoxdur, milli preoritetlərlə bağlı proqramı yoxdur. Digər tərəfdən onlar özləri də bilmirlər nə istəyirlər. Müharibəni uduzmuş ölkə məmləkəti sabitləşdirmək, öz gücünü toplamaq üçan ilk növbədə çalışır ki, sülh istiqamətində qələbə çalsın. Bu ölkənin son parlament seçkilərindəki seçimi göstərdi ki, Ermənistan artıq qarşıdurmalardan, müharibələrdən yorulub. Xalq ona görə məğlubiyyəti reallaşdıran Paşinyana səs verdi ki, o mənfur Köçəryanla Sarkisyanı rədd etsin. Belə də oldu. Onlar bir növ bildirdilər ki, biz sizə etimad edirik ki, siz bizim istəyimizi reallaşdırasız. Söhbət sülhdən, sabitlikdən və inkişafa yönəlik addımlardan gedir. Bu istiqamətdə isə Ermənistanın indiki siyasi rəhbərliyi yenə də alverlə məşğuldur. Aydındır ki, onu bütün tərəflərdən müxalif qüvvələr qısnayır. Çalışırlar ki, vəziyyəti sərt bir yola sövq edib onun mövqeyini zəiflətsinlər. Ancaq bunun özünün bir mövqeyi olmalıdır bildirsin ki, bax bizim seçimimiz budur. Əgər Rusiya vaxtında bu məsələni təklif edibsə, niyə Ermənistan inciklik göstərib və gedib Qərbin ayaqları altına yıxılıb? Qərb də onun gözləntilərinə cavab vermirsə, niyə heç bir bəyanat vermir, eyni düşüncələrdə qalır? Konkret olaraq, Ermənistanın rəhbəri Paşinyan bir fikir söyləmir. Burada Azərbaycan nə etməlidir? Əlbəttə, Azərbaycanın itirəsi heç bir şeyi yoxdur. Ona görə də biz görürük ki, Ermənistan çox götür-qoy edir və bir daha öz siyasi baqajının sıfıra bərabər olmasını nümayiş etdirir. Mən elə başa düşürəm ki, bəzi hallarda çox danışan siyasətçilər, əsasən də Paşinyan ancaq boş və məntiqsiz olurlar. Ortada isə heç bir şey yoxdur. Sonda əliyalın qalacaqlar. Onlar ancaq vaxtı ötürürlər. Zəngəzur dəhlizi ilə bağlı da saxta manevrlər edirlər. Onlar məsələnin həllində elə bir baqaja sahib deyil. Gərək oturub bütün tərəflərin təkliflərini, istəklərini nəzərə alsınlar ki, ortaq bir xətt istiqamətində hərəkətə başlasınlar. Mən düşünürəm ki, Ermənistan indi sülh yolunda da mübarizəni uduzmaqdadır”.
Ekspertin sözlərinə görə, qeyri-müəyyənlik Ermənistanın öz başını yeyəcək: “Çünki istər-istəməz, bu ölkənin sığortalayıcı variantları sıfıra bərabərdir, ancaq hamıdan imdad diləyir. Bu yaxıında kilsə ilə münasibətləri də korlandı. Mən onu anlayıram. Kilsə dini təsisat deyil. Erməni kilsəsi hərbi-siyasi, terror təşkilatıdır. İki seqment var ki, Paşinyanın əlindən dartaraq qoymur bir iş görə bilsin. Onlardan biri kilsə, digəri diaspordur. Ona görə də bu məndə əminlik yaradır ki, əgər kilsəyə qarşı getdisə, ola bilsin artıq oyanış prosesi baş verir. Ən yaxın zamanda hər hansı istiqamətdə olursa-olsun, bu tutarlı bir gedişə səbəb olacaq. Əgər elə olarsa, o zaman inanmaq olar ki, Ermənistan rəhbərliyi əməli fəaliyyətə yetişir, artıq kal deyil. Görək, bunun axırı necə olacaq. Amma yaddan çıxarmaq olmaz ki, Ermənistan terror ənənəsi çox güclü olan məmləkətlərdən biridir”.
Məhəmmədəli QƏRİBLİ
