“Əslində, biz Qarabağın muxtariyyətinə can atırıq, lakin Azərbaycan razı deyil, elə danışıqların bütün mahiyyəti budur”. Bu barədə Ermənistan parlamentinin “Şərəf duyuram” fraksiyasının katibi Tiqran Abramyan Facebook səhifəsində yazıb.
Daha sonra T.Abramyan bunları qeyd edib: “Son günlərdə Nikol Paşinyanın ən diqqətçəkən ifadəsi belə oldu: “İlham Əliyev Qarabağa geniş muxtariyyət verməyə hazır deyil”. Paşinyan, faktiki, bir il əvvəl Qarabağ məsələsində həddi aşağı salmağa məcbur olduğu fikrini ortaya qoydu. Etiraf etdi ki, onun ifadələri Qarabağın öz müqəddəratını təyinetmə və ya müstəqillik hüququ ideyası kimi deyil, Azərbaycanın tərkibindəki muxtariyyət kimi başa düşülməlidir. Əslində, onlar Qarabağın muxtariyyətinə can atırlar, lakin Azərbaycan bununla razılaşmır. Azərbaycan bu təkliflə nəniki razı deyil, heç bunu yaxın da buraxmır. Danışıqların bütün mahiyyəti budur”.
Görünən odur ki, Ermənistan tərəfi müharibədə məğlub olmasına baxmayaraq, bütün vasitələrlə Qarabağın Azərbaycana inteqrasiyasını əngəlləməyə çalışır. Əgər əvvəl yalnız Qqarabağın “müstəqilliyindən” dəm vururdularda, indi ən azından muxtariyyət adı altında öz mənfur planlarını reallaşdırmaq istəyirlər.
“Qətiyyən muxtariyyətlə bağlı təşəbbüsləri yaxın buraxmaq olmaz”
Məsələyə münasibət bildirən AMİP funksioneri Əli Orucovun fikrincə, qətiyyən muxtariyyətlə bağlı təşəbbüsləri yaxın buraxmaq olmaz: “Çünki bunun necə böyük bəla olduğunu hamıdan yaxşı bilirik. Məsələ ondadır ki, 1923-cü ildə Qarabağa muxtar vilayət statusu verilməsinin illər keçəndən sonra bizim başımıza necə bəla açdığını hamımız gördük. O zaman Qarabağa muxtariyyətin verilməsi ora qoyulan bir bomba idi və haçansa partlamalı idi. Nəticədə həmin bomba 1988-ci ildə Qarabağda separatçı hərəkatın başlaması ilə partladı. Nəticədə ötən 30 il ərzində olmazın məhrumiyyətlərə məruz qaldıq. Vətən müharibəsində qələbəmizdən sonra, ümumiyyətlə, Qarabağa hər hansı muxtariyyətin verilməsi gündəmdən çıxıb. Düzdür, rəsmi olaraq 26 noyabr 1991-ci ildə Azərbaycan parlamentinin qərarı ilə Dağlıq Qarabağ Muxtar Vilayəti ləğv edilib. Ancaq nəzərə alsaq ki, biz Birinci Qarabağ müharibəsində məğlub olduq, bu səbəbdən Minsk Qrupunun vasitəçiliyi ilə aparılan danışıqlarda muxtariyyət məsələsi müzakirə mövzusu idi. Ancaq Ermənistan tərəfi döyüşdə üstünlük qazanan tərəf olduğu üçün bunu qəbul etmirdi. Onlar ancaq müstəqillik istəyirdilər. Beləcə, 30 ilə yaxın mənasız danışıqlar getdi. İkinci Qarabağ müharibəsində qələbəmizdən sonra erməni tərəfi müəyyən qədər Qarabağla bağlı iddialarını azaldıb, amma əsl niyyətlərindən vaz keçməyiblər. Onlar, sadəcə, vaxtı uzatmaqla toparlanmaq və uyğun məqam gözləyirlər. Muxtariyyət adı altında yenidən əvvəlki planlarını həyata keçirmək istəyirlər. Bu səbəbdən qəti şəkildə hansısa güzəştə getməkdən söhbət gedə bilməz. Biz Qarabağla bağlı hər zaman maksimalist mövqedən çıxış etməliyik”.
Vidadi ORDAHALLI
