Ermənistanın baş naziri Nikol Paşinyan bildirib ki, ölkəsi istənilən ərazi iddialarından imtina etdiyini bəyan etməlidir, əks halda dövlətçiliyini itirəcək:
"Ermənistan bəyan etməlidir ki, onun ərazi iddiası yoxdur və olmayacaq. Bu, bizə dövlət sahibi olmaq şansı verəcək yeganə prinsipdir. Əks halda, dörd tərəf hər şeyi edəcək ki, biz dövlət kimi mövcud olmayaq. Və bunu edirlər”, - Paşinyan çərşənbə günü parlamentdə keçirilən “hökumət saatı” çərçivəsində bəyanatında bildirib. O əlavə edib ki, “dövlət olmaq regional mühitdə normal münasibətlərin olması deməkdir”.
Paşinyan bu bəyanatı verməkdə nə dərəcədə səmimidir? Çünki onun əməllərində belə konstruktiv mövqe görsənmir.
Politoloq Rəşad Bayramov “Bakı-Xəbər”ə bildirdi ki, Paşinyanın bu cür bəyənatlarla çıxış etməsi ilk dəfə deyil: “Ümimiyyətlə, onun hakimiyyətə gələndən sonrakı davranışları, ayrı-ayrı yerlərdə etdiyi çıxışları, verdiyi bəyanatlar onu deməyə əsas verir ki, bu insan normal, adekvat insan deyil. Yəni mühitə, məkana uyğun olaraq bəyanatlar verir. Nəticə etibarı ilə onun bəyənatları ilə fəaliyyəti arasında uyğunsuzluq ortaya çıxır. Xatırlayırsızsa, Moskvaya gedib rus sülhməramlılarının səlahiyyətlərinin 15 ilə uzadılması ilə bağlı mövqe ortaya qoyan Paşinyan ondan bir həftə sonra Avropa İttifaqının vasitəsilə Brüsseldə keçirilən görüşdə Avropa İttifaqı müşahidə missiyasının regiona gəlməsi və regionda fəaliyyət göstərməsinə imza atdı. Bir tərəfdən “Ermənistan Azərbaycanın ərazi bütövlüyünü tanıyır”- bəyanatını verir, daha sonra dırnaqarası “Dağlıq Qarabağ”da yaşayan ermənilərin hüquqları məsələsini ortaya qoyur. Yəni sən Azərbaycanın ərazi bütövlüyünü tanıyırsansa, o zaman Qarabağda yaşayan insanların hüquqlarının sənə nə dəxli var? Bütün bunlar onu deməyə əsas verir ki, adam Ermənistanda daxili auditoriya üçün bəyanat verir, başqa bir ölkədə həmin ölkəyə xoş gəlmək üçün bəyanatlarla çıxış edir. Amma fakt ortadadı. Faktla bağlı da bundan iki gün qabaq Prezident İlham Əliyev Şuşada olan beynəlxalq konfransda məsələləri açıqladı və bildirdi ki, Vaşinqton görüşündən bir həftə qabaq Azərbaycanın sülh təklifinə şərhlərlə bağlı Ermənistan tərəfinin cavab məktubu alınıb. Cavab məktubunda da ərazi iddiaları bu və ya digər şəkildə yer alıb. Əgər məktubda ərazi iddiaları ortaya qoyursansa, belə çıxır ki, sənin Azərbaycanın ərazi bütövlüyünü tanıyırıq bəyanatların sadəcə dünyaya “Ermənistan sülh istəyir” - demək üçün, ucuz bir bəhanədir. Çünki bütün dünya qəbul edib ki, müharibənin dayanmasından sonra, dünyada doğrudan da nadir hadisədir ki, qalib ölkə ilk olaraq sülh təklifi ilə çıxış edir. Sülh təklifini imzalamayan da məğlub olan ölkədir”.
Ekspertin sözlərinə görə, burada uyğunsuzluq var və Paşinyanın xarici siyasətinə müsbət dividentlər gətirmir: “Ona görə də, belə bəyanatlarla guya sülh istədiklərini bildirmək istəyirlər. Amma sülhün arxasında olan addımlar onu göstərir ki, Ermənistan sülhə hazır deyil. Belə də olacaq. Əgər Ermənistan Rusiyanın vasitəsilə keçən danışıqlarda bir mövqe, ABŞ-ın vasitəsilə olan danışıqlarda başqa mövqe, Brüsseldə keçirilən görüşdə daha fərqli mövqe ortaya qoyacaqsa, bu o deməkdir ki, Ermənistanın müstəqil qərar qəbul etmək imkanı yoxdur. Hansı ölkədə olursa, o ölkənin təzyiqi ilə hərəkət etmək məcburiyyətində qalır. Real sülhdən o zaman söhbət gedəcək ki, Paşinyan bütün vasitəçi tərəfləri bir tərəfə atıb, birbaşa Azərbaycanla danışıqlar aparsın. Ümid edirəm ki, kənar təsirlər olmadan sülhdən danışmaq olacaq. Çünki kənar təsirlər olanda danışıqlarda həmin ölkələrin istək və tələbləri ortaya çıxır və bu da Azərbaycan tərəfindən məqbul hesab edilmədiyi üçün qəbul olunmur. O baxımdan düşünürəm ki, söhbət Azərbaycanın ərazi bütövlüyünün tanınmasından gedirsə, Ermənistan tərəfi ilk olaraq üçtərəfli bəyanatla üzərinə düşən vəzifələrin icrasını həyata keçirməlidir, erməni hərbi birləşmələrini ərazimizdən çıxarmalıdır, Zəngəzur dəhlizinin açılması istiqamətində konkret addımlar atılmalıdır. Ondan sonra sülh sazişi və sərhədlərin delimitasiyası və demarkasiyası məsələsi həll olmalıdır. Əks halda uduzan tərəf Ermənistan olacaq. Çünki Azərbaycanın kifayət qədər imkanları var ki, BMT qətnamələrini təkbaşına icra etdiyi kimi, Azərbaycan sərhədlərinin delimitasiya və demarkasiyasını da beynəlxalq dünya tərəfindən tanınan sərhədlər çərçivəsində aparsın, sərhədlərinin təhlükəsizliyini təmin etsin və Qarabağda olan ermənilərlə birbaşa danışıqlar aparsın. Bunun üçün hər hansı başqa ölkələrə də bizim ehtiyacımız yoxdur. Qısa olaraq deyim ki, hazırda top Ermənistan tərəfdədir. Bunu Paşinyan da, ayrı-ayrı vasitəçilər də dərk edir. Azərbaycanın geri çəkilmək və güzəştə getmək fikri yoxdur. Biz konkret sözümüzü demişik və tələblərimizi ortaya qoymuşuq. Bizim tələblər də beynəlxalq hüququn prinsiplərindən irəli gələn tələblərdir. Nə qədər tez sülh sazişi imzalayacaqlarsa, özləri də o qədər tez təcrid olunmuş vəziyyətdən qurtaracaq və iqtisadi, regional layihələrdə iştirak imkanı əldə edəcək. Nəticə etibarı ilə, bundan sonra müstəqil dövlət olmaq uğrunda addımlar atmağa başlayacaqlar. Əks halda Ermənistan üçün dəyişən heç nə olmayacaq”.
Məhəmmədəli QƏRİBLİ
